Read Timugon Murut KASAUKAN 31 Bible Online

KASAUKAN 31 - Timugon Murut bible

KASAUKAN 31

¹Norongog ri Jakub anak-anak ungkuyon ri Laban minindagu ragitio, “Inalap ri Jakub no ngaangai' rapu' ru ama' takano. Ngaangai' kalangkayaan nano, ginio intor ra rapu' ru ama' takano.”

²Nakito niayuk ri Jakub ra kalo boo masamba i Laban riso koson ragili.

³Indagu boo TUHAN ri Jakub, “Ruli' noyo ra pagun ru ama' muli am ra pabukat-pabukat muli. Alungin Tokou.”

⁴Panusub boo i Jakub ra ulun mongoi pambala' ri Ragil am i Liya ra tumuum io risilo giu' ra limayak ondo' napakatapan no ra biniag nano.

⁵Kono ra karuo ngaulun andu' nano, “Makito ku intor ra bulos ru ama' min ra kalo boo masamba io raki', sala' ka koson ragili. Kaa' alungin aku ri Aki Kapuuno' ru ama' kuli.”

⁶Nakapandai kau karuruo ra mapirot aku kaga' mangandoi ri ama' mino.

⁷Kaa' rinuung no aku am kinulau no gaji' kuno saboi inggopor. Kaa' kalo pinoloso ri Aki Kapuuno' io lumaat raki'.

⁸Paat ri ama' min minindagu, ‘Kambing ondo' gumutitikan no ginio okou tatangan,’ ngaangai' kambing no naganak ra anak gumutitikan, am paat io minindagu, ‘Kambing ondo' tangkakalut no okou tatangan,’ ngaangai' kambing no naganak ra anak tangkakalut.

⁹Ginio ra alapo' ri Aki Kapuuno' biniag ru ama' min am pataako' No raki'.

¹⁰“Paat ra mampapaa' bibiag-bibiag no, naginupi aku am nakito ku ngaangai' kambing gawayan ondo' mampaa' bibiisan, gumutitikan, am tangkakalut.

¹¹Ralalom inupi kuno minindagu malaikat ri Aki Kapuuno' no raki', kono, ‘Jakub!’ Taam aku, ‘Iou.’

¹²Kon poyo ru malaikat i, ‘Ilai', ngaangai' kambing gawayan ondo' mampaa' no bibiisan, gumutitikan am tangkakalut. Siningon ku ginio baalo' sabap ra nakito ku noyo ngaangai' ondo' binaal ri Laban no rirun.

¹³Aku noyo i Aki Kapuuno' ondo' minintalang rirun giu' ra Bitil i. Giu' i pinatimpok mu Raki' rondo' batu pangkaraan am inuasan mu ra umau jaitun, am nagibatan muli Raki'. Raino tampos no am ruli' ra tana' naganakan rirun no.’ ”

¹⁴Taam boo i Ragil am i Liya ri Jakub, konilo, “Kolondo' boo tayar ra sugulon mai intor ra kalangkayaan ri ama' maino.

¹⁵Akai ti kinara' no koson ulun bansa' ru bokon. Tinalan no akai am atan ondo' naalap nali kinai' no niayuk.

¹⁶Ngaangai' kalangkayaan ondo' inalap ri Aki Kapuuno' no intor ra ama' maino sotopot no longgom mai am lalaing-lalaing maino. Baalo' noyo atan ondo' nanusuban ri Aki Kapuuno' rirun.”

¹⁷Tampos boo i Jakub koson sumaguli' ra ama' nali giu' ra tana' ru Kanaan. Posokoyo' no ra unta anak-anak nano am andu'-andu' nano, am pasiguluo' no sampanon ra kambing domba nano nababaya' ra ngaangai' ondo' noowot no ra pagun Misopotamia.

¹⁸

¹⁹Paat raginio minongoi i Laban pagungkur ra bulu ru domba-domba nano, am paat raginio noyo tokowo' ri Ragil sinungkalalaing[73] ri Laban no.

²⁰Abawi' ri Jakub i Laban ra kalo nangimbalala' ra ugaran nilai.

²¹Alapo' ri Jakub ngaangai' rapu' nano am pagindibok ugar. Laup io ra Sungoi Iprat am ongoi ra libung ru kagunungan Giliad.

²²Kataluan noyo boo binalaan i Laban ra nagiru' i Jakub.

²³Timungo' boo ri Laban ulun-ulun nano am pababaya' ilo nanunu' ri Jakub buoi katuluan am kasunu' no giu' ra libung ru kagunungan Giliad.

²⁴Rondom raginio, ratong i Aki Kapuuno' ralalom inupi ri Laban am indagu riso, “Ilalai', pai' babanyou raguon muno ri Jakub.”

²⁵Pangkim i Jakub ra rondo' bulur, am pangkim i Laban nabaya' ra ulun-ulun nano ra libung ru kagunungan Giliad no.

²⁶Indagu boo i Laban ri Jakub, “Kua pagabau kou raki' am ibito' mu nagiru' anak-anak ruandu' kuti koson ra ulun rinakop ra pangayawan?

²⁷Kua pagabau kou raki' am pagiru' kou ra kalo nangimbalala' raki'? Amon ru nambala' kou, maaru' pintarin tokou ra maansukan am rimbayin ondo' sumbayaan ru tamburing am jitor?

²⁸Kalo poyo niayuk pinaalok mu aku ra akupu-akupu kuno am anak-anak ruandu' kuno. Sasambungon koson raginio!

²⁹Makakuasa' aku lumaat rirun, kaa' rondom i, napakara' i Aki Kapuuno' ru ama' muno raki' ra kalo babanyou raguon kuno rirun.

³⁰Napandayan ku ra okou minugar ti moogot kaga' muli' ra baloi ri ama' muno, kaa' kua tokowo' mu sinungkalalaing kuno?”

³¹Taam i Jakub ri Laban, “Malaa' aku sabap ra indoson kuni ra maaru' lair ra ingain mu anak-anak muno.

³²Kaa' amon ru sasangulun intor ramon ti narampatan mu nantakou ra sinungkalalaing muno, ukumin io ra potoyon. Uliato' noyo ngaangai' kuliamos kuno ra saang ru pabukat-pabukat tati, am amon ru matuum mu alapo'.” Kalo napandayan ri Jakub ra i Ragil nantakou ra sinungkalalaing no.

³³Umpos boo i Laban am uliato' no ra kim ri Jakub, am ongoi io ra kim ri Liya am ongoi ra kim ru karuo ngaulun ulipon ruandu' no, kaa' kalo natuum sinungkalalaing no. Ongoi io boo ra kim ri Ragil.

³⁴Alapo' boo ri Ragil sinungkalalaing no am pasubolo' no ra kantungan ru tuturungan ra unta nano, am turungi' no. Uliato' ri Laban ralalom kim ri Ragil no, kaa' kalo natuum no sinungkalalaing no.

³⁵Indagu boo i Ragil ra ama' nano, “Pai' sangit ama', sabap ra kalo makabigor aku uma' rirun sabap minatong raraa' malaat kutu ondo' moonong ruandu' mokoondo' ragitio.” Uyumo' toojo ri Laban kaa' kalo natuum no sinungkalalaing no.

³⁶Sangit boo i Jakub. “Atan kia kalaatan binaal kutu?” kono siminangit. “Atan kia ra susuban inanggal kuno saboi inilou mu aku?

³⁷Raino, nauliat mu noyo ngaangai' kuliamos kuno, natuum mu kia kuliamos ru baloi muli? Pabantaa' ra saang ru ulun-ulun muno am ulun-ulun kuti ra makito nilo, am ilo makapampili' ra osoi intor rito ondo' motopot.

³⁸Buoi ruo ngoopor ngambilor ti aku minayan rirun, kambing am domba muno kolondo' kalo nansayat am kalo poyo igondo' aku pakaakan ra kambing gawayan muno.

³⁹Biniag muno ondo' sinaam ru bibiag mangasigo, kalo igondo' ku ibito' taaki' rirun, kaa' aku galama' poyo nanampilon. Biniag ondo' tinakou ru ulun ra matawang kapoam rondom, masalok kou nansika' raki'.

⁴⁰Masalok aku malasuan ra matawang am masimuan ra rondom, am masalok aku poyo malukou.

⁴¹Ginio noyo baal kuno buoi nangandoi rirun ra ruo ngoopor ngambilor i. Nangandoi aku buoi mopor am apat ngambilor koson makapanangandu' ra karuo ngaulun anak ruandu' muno, am buoi onom ngambilor poyo koson makaalap ra kambing am domba muno. Buoi ru ginio pana kinulau mu pinagaji' muno raki' saboi inggopor.

⁴²Amon ru kalo inalungan aku ri Aki Kapuuno' ru kinamatuaan kuli, i Aki Kapuuno' ri Abragam am i Isak, maaru' paugaron mu aku ra kolondo' atan-atan ibiton. Kaa' nakito ri Aki Kapuuno' kapaganan kuno am kandoi ondo' binaal kuno, am rondom i nanaak Io ra pangakiman Nano.”

⁴³I Laban pana timinaam ri Jakub, “Karuo ngaulun ruandu' no anak kuno, anak nilono aku ra ampu', am ngaangai' biniag raginio aku ra ampu', am poyo ngaangai' ondo' makito muno ragiti aku ra ampu'. Kaa' kalo makapanginga' aku ra anak-anak kuti, kapoam ra anak nilono,

⁴⁴Ginio ra raino pabantu' to. Patunturo' to batu koson tatandu' ru nabantuan tano.”

⁴⁵Pangalap boo i Jakub ra rondo' batu am potolorogo' no koson ra batu pangkaraan.

⁴⁶Nanusub niayuk i Jakub ra ulun-ulun nano manimung ra batu. Pangalap ilo boo ra kukula' batu am tunturo' nilo. Pagagakan ilo ra kiing ru nanunturan no.

⁴⁷Inggalani' ri Laban nanunturan raginio Jigar Sagaduta,[74] kaa' inggalani' poyo ri Jakub ra Galid.[75]

⁴⁸Indagu i Laban ri Jakub, “Nanunturan ra batu ragitio pangkaraan to.” Ginio ra intok raginio ininggalanan ra Galid.

⁴⁹Indagu niayuk i Laban, “Gama' ru magalung rito TUHAN no ra ito makapaginggalur.” Ginio ra intok raginio piawon niayuk ra Mijpa.[76]

⁵⁰Indagu poyo ri Laban, “Amon ru lumaat kou ra anak-anak kuno kapoam manangandu' kou poyo ra bokon, kabalu' pana ra kolondo' makapandai, karaa' noyo ra i Aki Kapuuno' no magalung rito.

⁵¹Gitio noyo batu ondo' tinuntur kutu, am gitio batu pangkaraan.

⁵²Batu tinuntur ti am niayuk batu pangkaraan ti mapakara' rito ra kalo sailin ku batu tinuntur ti koson mamulunsar rirun, am okou pana kalo sailin batu tinuntur ti am batu pangkaraan ti koson mamulunsar raki'.

⁵³I Aki Kapuuno' ri Abragam am i Nagor[77] ondo' mangakim rito.” Pagibot boo i Jakub ralalom inggalan ri Aki Kapuuno' ondo' sambaan ri Isak ama' nano, koson suguton no bantu' nano.

⁵⁴Io pana nanaak ri Aki Kapuuno' ra taak simbalui giu' ra gunung no. Piniau no niayuk ulun-ulun nano magakan mababaya' riso am pombolong ra gunung no.

⁵⁵Katawang ra susuab no, pintor alok i Laban ra akupu-akupu nano am anak-anak ruandu' nano am pambarakat poyo risilo, am ugar boo i Laban saguli' ra baloi nali.