Read Timugon Murut KASAUKAN 32 Bible Online

KASAUKAN 32 - Timugon Murut bible

KASAUKAN 32

¹Paginjul i Jakub, am ongoi tuum malaikat-malaikat riso.

²Pakakito i Jakub risilo, indagu io, “Gitio nangkiman ri Aki Kapuuno'.” Ginio ra inggalani' no intok raginio Maganaim.[78]

³Kopongo raginio panusub i Jakub ra kukula' ngaulun magulu mongoi ra pagun ru Idom koson tumuum ra maayo ungkuyon nano i Isau.

⁴Kon ri Jakub risilo, “Indagu kau kon ragino ra tuan kuno, i Isau: ‘Aku i Jakub ulipon muli. Minayan aku ri Laban ra buoi ti am kinuliman ku ulian kuno saboi raino.

⁵Raino mokoondo' aku ra sapi', kaladai, domba, kambing am ulipon. Nanusub aku mapabala' ragitio rirun ra malansan maansayan kou raki'.’ ”

⁶Pakasaguli' ulun-ulun sinusub no ri Jakub, indagu ilo riso, “Nakatuum akai noyo ra maayo muli, i Isau am raino mangkiralan io mongoi tuum rirun am binaya' io niayuk ru apat ngaatus ngaulun.”

⁷Kaining ri Jakub ginio, kalaa' am magalabo io kaga'. Piruoo' no boo ulun nababaya' riso no ra ruo ngantayaran, am niayuk domba, kambing, sapi' am unta nano.

⁸Pamaguangan nano, “Amon ru matong i Isau am mampatoi ra santayaran ra kasaa' no, santayaran ra karuo no makapagiru' poyo.”

⁹Pakiasi' boo i Jakub, “Iou Aki Kapuuno' ondo' sambaan ru aki kuno i Abragam am i Isak ama' kuno, iningo' aku! Nakaindagu Kono raki' TUHAN ra sumaguli' ra pagun kuli am ra pabukat-pabukat kuno, am tandaan Mu raki' ngaangai'.

¹⁰Kalo maaya' aku mangapu ra ngaangai' togom am gagaya' Muno ondo' pinakito Muno raki', ulipon Mutu. Susukur kutu ayuk inibit ku liminaup ra Sungoi Jordan, kaa' raino siminaguli' aku ra ruo ngampulalayan ti.

¹¹Makiasi' aku toojo Rirun ra bayagon Mu aku intor maayo kuno i Isau. Malaa' aku ra maaru' matong io pampaluus ramon ngaangai', niayuk ruandu' am lalaing.

¹²Karaa' ra binantu' Mu noyo ra tandaan Mu raki' ngaangai' am manaak Kou raki' ra masuang papag saboi kalo mauntob ru sangulun pana sabap ra suang no koson ra agis giu' ra nagas ru raat.”

¹³Pokosorondom nombolong ra giu' no, timpoko' ri Jakub intor ra biniag nano, koson pataakon no ra maayo nano i Isau, iono ruo ngaatus kambing ruandu', ruo ngoopor kambing gawayan, ruo ngaatus domba ruandu', ruo ngoopor domba gawayan, talu ngoopor unta ondo' lakat poyo mapatiti' ra anak, mabaya' niayuk ra anak no, apat ngoopor sapi' ruandu', mopor sapi' gawayan, ruo ngoopor kaladai ruandu' am mopor kaladai gawayan.

¹⁶Tatayaro' no ra kukula' ngantayaran, am paalungi' no ra ulipon-ulipon nano moonong tayar, am indagu risilo, “Sigulu kau raki' am kaaluro' min lolot mino ra rondo' am bokon.”

¹⁷Indagu i Jakub ra ulipon kasaa' no, “Amon ru makapaguma' kou ra maayo kuno am mangkuot io rirun, ‘Osoi tuan muno, ati angayan muti am osoi ra ampu' ra biniag inuyung mutu?’

¹⁸Taamo' ra: ‘Longgom gitio ri Jakub ulipon muli. Pinaataran no gitio koson ra taak nano ri Isau, tuan nano. I Jakub galama' giu' ra tinaulian maino.’ ”

¹⁹Nogondo' susuban no ra ulipon karuo, ulipon katalu am ulipon-ulipon ra bokon no ondo' sinusub magalung ra biniag tinayar-tayar no, “Koson rinagu ku ra raitii' ni, mindagu kau ri Isau amon ru makauma' kau riso.

²⁰Musiti' kau mindagu riso, ‘I Jakub ulipon muli soroi ra tinaulian maino.’ ” Sabap ra pamaguangan nano, “Mamunduk aku ra guang nano ra taak ti, am paat ra makatuum aku riso, maaru' lair ru apuon no aku.”

²¹Pasiguluo' no boo taak-taak raginio paatari' kaa' io galama' nombolong ra nangkiman nali ra rondom raginio.

²²Rondom raginio niayuk tirong i Jakub am ibito' no karuo ngaulun andu' nano, karuo ngaulun ulipon ruandu' parulug nano, koopor am saa' anak nano am laup ra Sungoi Jabok.

²³Kalaupi' no ilo, palaupo' no niayuk ngaangai' rapu' nano.

²⁴Kaa' io galama' timinatang. Ratong boo sangulun ungkuyon giminabu' riso saboi natawangan.

²⁵Pakaliman ulun no ra kalo magula' no i Jakub, lambaa' no pulunguan ru paa ri Jakub, saboi natibas.

²⁶Indagu ulun no, “Paugaro' aku noyo sabap ra sumirang noyo mato ru orou no.” Taam i Jakub, “Kalo paugaron tokou amon ru kalo mambarakat kou raki'.”

²⁷Pangkuot ulun no ri Jakub, “Osoi inggalan muti?” Taam io, “I Jakub.”

²⁸Indagu ulun no, “Inggalan muno sala ka boo i Jakub. Giminabu' kou ri Aki Kapuuno' am ra ulun, am namanang kou. Ginio ra inggalan muno i Israil.”[79]

²⁹Indagu i Jakub, “Balai' aku ra inggalan muno.” Kaa' taam ulun no, “Kalo pana makapandai kou ra inggalan kuno.” Barakato' no boo i Jakub.

³⁰Indagu i Jakub, kono, “Nakauma' aku noyo ri Aki Kapuuno', am maayag aku poyo.” Ginio ra inggalani' ri Jakub intok raginio Piniil.[80]

³¹Paat sumirang mato ru orou, iruani' ri Jakub Piniil no, am isakirai io sabap ra pulunguan ru paa nano natibas.

³²Polos raino ulun ru Israil kalo mangakan ra kual ondo' minintup ra pulunguan ru paa ru bibiag, sabap ra mangkara' ra linamba' pulunguan ru paa ri Jakub i.