Read Timugon Murut KASAUKAN 34 Bible Online

KASAUKAN 34 - Timugon Murut bible

KASAUKAN 34

¹Paat ra rondo' orou, anak ruandu' ri Jakub am i Liya iono i Dina, minongoi pagayam ra ruandu'-ruandu' ru Kanaan.

²Paat ri Sikgim anak ungkuyon ri Gamor no, ulun ru Giwi, raja' ru libung raginio nakakito ri Dina, ibito' no nagiru' am sawaa' no.

³Kaa' kabunduk boo guang ri Sikgim no ri Dina saboi malaai io kaga', am mirot io mangambi' ra guang ru ralaa no.[83]

⁴Indagu i Sikgim ra ama' nano, “Ama', alapo' raki' ruandu' no ra anduon ku.”

⁵Naining ri Jakub ra anak ruandu' nano sinawa', kaa' anak-anak ungkuyon nano giu' ra limayak magalung ra biniag, am kalo nambaal io ra atan-atan saboi ilo makauli'.

⁶Ongoi boo tuum i Gamor, ama' ri Sikgim no ri Jakub koson makimansunur.

⁷Naintuma' raginio anak-anak ri Jakub minuli' intor ra limayak. Kaining nilo tunung no, naliangan ilo am nasisang ilo kaga'. Sabap ra sinawa' anak ruandu' ri Jakub no, nanauyu' i Sikgim ra ngaangai' ulun ru Israil.

⁸Indagu i Gamor ri Jakub, “I Sikgim, anak kuno malaai ra anak ruandu' muno. Kitaakon tokou mangiou ra anak kuno manangandu' ra anak muno.

⁹Pambaal to ra pangiawan ra bansa' muno am bansa' kuno matagandu'.

¹⁰Makaayan kau boo mabaya' ramon ra pagun ragitio ra ati ayuk kasagaan min. Guguang min ayuk mangindapu' am mokoowot ra rapu'.”

¹¹Indagu boo i Sikgim risilo sangamama', “Kiasii' min aku, aniin takamin ra atan ayuk kitaakon min.

¹²Raguo' min atan taak kasagaan min, am aruo' min noyo mulo no ra kula' ayuk pana suang no, gagayaan ku atan ayuk kitaakon mino amon ru iowon min i Dina no uoton ku.”

¹³Sabap ra napakauyu' i Sikgim no ri Dina, pagabau anak-anak ungkuyon ri Jakub ri Sikgim am ama' nano i Gamor.

¹⁴Indagu ilo risilo, “Kalo pawatin mai boborok mai ra ungkuyon ondo' kalo sinunatan, sabap ra ginio mapakauyu' ramon.

¹⁵Mangiou akai ru baalon mu rondo' ayuk kitaakon mai, iono musiti' okou masauk koson ramon ra sunatin min ngaangai' ungkuyon mino.

¹⁶Iowon mai boo ra itakau matagandu'.

¹⁷Kaa' amon ru kalo iowon min kitaakon maino, pulion mai ruandu' maino am mugar akai.”

¹⁸Kitaakon nilono koson matimpakan i Gamor am anak nano i Sikgim,

¹⁹am nataki' i Sikgim nangiou raginio, sabap ra malaai io kaga' ri Dina am poyo i Sikgim sangulun maatang kaga' ra baloi nilono.

²⁰Ongoi boo i Gamor am anak nano i Sikgim ra intok timungan giu' ra kulobon garabang ru bandar no am indagu ilo ra mamagun,

²¹“Mongoonsoi ulun-ulun ru Israil. Polosoon ilo noyo mayan ritakau am mongoi ra ati ayuk kasagaan nilo. Pagun ti malangka' ra ayanan nilo. Maguot takau ra anak ruandu' nilo am paguoton takau ilo ra anak ruandu' takau.

²²Kaa' ulun ru Israil mangiou ra mayan ritakau am masauk ra rondo' bansa' ritakau ra rondo' ayuk kitaakon nilo, iono ngaangai' ungkuyon takati sunatin mogondo' koson risilo.

²³Tauli no ngaangai' biniag am ngaangai' kuliamos nilo itakau tatangan. Iowon takau noyo ra makaayan ilo ritakau.”

²⁴Ngaangai' namagun ra bandar no nangiou ra rinagu ri Gamor am anak nano i Sikgim. Sunati' boo ngaangai' ungkuyon ondo' soroi ra giu' no.

²⁵Kataluan ragili, paat ra ngaangai' ungkuyon lakat poyo mangarualan sabap ra sinunatan, ruo anak ungkuyon ri Jakub, i Simion am i Liwi, maayo ri Dina, panangilang ilo am sinok ongoi ra bandar no am pampatoi ra ngaangai' ungkuyon ra giu' no,

²⁶nakaaya' potoyo' i Gamor am anak nano i Sikgim. Alapo' nilo boo i Dina intor ra baloi ri Sikgim am ugar.

²⁷Kopongo namatayan no, ratong poyo anak-anak ungkuyon ri Jakub ra bokon am ingkauto' ondo' soroi ra bandar koson nansuli' ilo ra nanauyuan ra boborok nilono.

²⁸Uyungo' nilo sampanon ru kambing, domba, sapi', kaladai am ngaangai' ondo' soroi ra bandar am limayak no.

²⁹Inalap nilo ngaangai' kuliamos mongologo am ngaangai' ruandu', lalaing am ngaangai' ondo' soroi ra baloi ru bandar no.

³⁰Indagu i Jakub ri Simion am i Liwi, “Napakapagon kau raki'. Raino ulun ru Kanaan, ulun ru Piris am ngaangai' mamagun ru pagun ragitio mangasisang raki'. Ulun takati kalo masuang, amon pantutuluk mamagun no koson gula' am bulunsar raki', itakau sasambaloi ti maluus.”

³¹Kaa' taam ilo, “Kalo polosoon mai pamakuan ra boborok maiti koson ra ruandu' mantalan ra inan.”