Read Timugon Murut KASAUKAN 40 Bible Online

KASAUKAN 40 - Timugon Murut bible

KASAUKAN 40

¹Kukula' buoi raginio, tingganai mansulung ra inumon am tingganai mansulung ra akanon ru raja' ru Misir makasala ra raja' no.

²Siminangit raja' ra karuo ngaulun tingganai no,

³pasubolo' no boo ilo ra lamin pangaputan ra baloi ru tingganai magagalung ra istana no, nogondo' ra nangaputan ri Jusup.

⁴Nabuoi ilo pinaayan ra nangaputan no am pinaalungan ru tingganai magagalung no ri Jusup karuo ngaulun no.

⁵Sarandaman raginio, giu' ra pangaputan no, tingganai mansulung ra inumon am tingganai mansulung ra akanon no naginupi am inupi nilai makaarati' ra nansala'.

⁶Pakaratong i Jusup tuum risilo ra suabon no, ilain no ilo koson mangiluk guang.

⁷Pangkuot i Jusup risilo, “Kua koson mangiluk guang min ra orou raiti'?”

⁸Taam ilo, “Akai ruo ti naginupi, kaa' kolondo' sangulun pana ragiti makapambala' toojo ra arati' ru inupi maili.” Indagu i Jusup, “I Aki Kapuuno' ayuk makapapaarati' ra inupi. Tunungi' min aku ra inupi mini.”

⁹Indagu tingganai mansulung ra inumon no, “Inupi kuli mokoondo' sampuun anggur ra saang kuti.

¹⁰Puun i mokoondo' talu raan. Bagu ayuk poyo nananraun, minungkalar noyo busak i am kaansak noyo kawa' ru anggur i.

¹¹Aku ti nampaguut ra sangkir ru raja'. Upuo' ku boo kawa' ru anggur i am pagaa' ku ruu' i ra sangkir am pataaki' ku ra raja'.”

¹²Indagu i Jusup, “Gitio arati' no: Talu nganraan i talu ngoorou.

¹³Ralalom kataluan ti ampunon kou ru raja' am palabuson kou intor ra pangaputan am pasagulion kou ra kandoi muli. Mampasulung kou ra inumon nano mogondo' koson ra galing i paat ra okou nasauk ra tingganai mansulung ra inumon nano.

¹⁴Kaa' karaa' aku paat ra okou moonsoi noyo. Posoboyo' tunung intor raki' ra raja' no am indangano' aku mingkual intor ra pangaputan ti.

¹⁵Sabap, sotopot no aku ti tinakou intor ra pagun ru ulun ru Ibrani, am giti ra pagun ru Misir ti pana, kalo nambaal aku ra atan ayuk pana kalaatan ondo' mangkinibit raki' ra aputon.”

¹⁶Pakapandai tingganai mansulung ra akanon no ra moonsoi arati' ru inupi ru tingganai mansulung ra inumon no, indagu io ri Jusup, “Aku pana naginupi, pinatampak ku talu ngambakul ruti' ra ulu kuti.

¹⁷Bakul ra ralimbou i mokoondo' nansalinut ruti' ru raja' kaa' ruti'-ruti' no inongoi tinduko' ru susuit i.”

¹⁸Taam i Jusup, “Gitio arati' no: Talu ngambakul i talu ngoorou.

¹⁹Ralalom kataluan ti palabuson kou ru raja' — am ingguluin no ulu muno! Mopongo raginio pilikon baangkai muno ra rondo' lugu' am ongoyon boo tinduko' kual muno ru susuit-susuit.”

²⁰Pakatalu ngoorou raginio, napaat ra orou naganakan ru raja' no, bunsagi' ru raja' no ngaangai' tingganai nano. Palabuso' no intor ra pangaputan tingganai mansulung ra inumon nano am tingganai mansulung ra akanon nano, am ibito' ra saang ru ngaangai' tingganai ru istana.

²¹Tingganai mansulung ra inumon no pinasaguli' ra kandoi nano ragili,

²²kaa' tingganai mansulung ra akanon no iningguluan no. Ngaangai' no nasauk koson ra tinunung ri Jusup i.

²³Kaa' liliani' boo ru tingganai mansulung ra inumon ru raja' no i Jusup. Nalilianan no toojo i Jusup no.