Read Timugon Murut KASAUKAN 43 Bible Online

KASAUKAN 43 - Timugon Murut bible

KASAUKAN 43

¹Bitilan giu' ra pagun ru Kanaan no liminanja' poyo,

²am paat nakayaan baloi ri Jakub ra gandum ondo' inibit intor ra pagun ru Misir, indagu i Jakub ra anak-anak nano, “Ongoi kau poyo ra pagun ru Misir am bali kasanganu ra gandum akanon takau.”

³Indagu i Jiuda ri Jakub, “Gabenor ru pagun ru Misir no naminson toojo ramon ra kalo tumuum io ramon amon ru kalo ibiton mai boborok maino.

⁴Amon ru makataak kou paayaan mai boborok maino, mugar akai am mambali rirun ra akanon.

⁵Amon ru kalo makataak kou paayaan mai boborok maino, kalo mongoi akai sabap ra gabenor no naminson toojo ramon ra kalo tumuum io amon ru kalo ibiton mai boborok maino.”

⁶Indagu i Jakub, “Kua pantipagon kau raki' ra nambala' ra gabenor no ra mokoboborok ungkuyon kau poyo?”

⁷Taam ilo, “Nangkukuot ulun no ramon am intor ra baloi takati. Kono, ‘Lakat poyo kia naayag ama' mino? Mokoboborok ungkuyon kau poyo kia?’ Tinaam mai ayuk pangkuatan nali. Ati koson mai makapandai ra manusub io ramon mapaibit ra boborok maino?”

⁸Indagu boo i Jiuda ra ama' nano, “Paayaa' noyo anak no raki' am tumampos akai mugar, maa' raginio kolondo' sangulun pana intor ritakau ti matoi ra bitilan.

⁹Aku noyo jaminan am sikaan mu aku amon ru kalo masagulian ku io ra maayag, aku mangapu ra ukum muno ra sabuoi-buoi no.

¹⁰Amon ru kalo nabuoi takau naginaa, maaru' induo takano paginduli'.”

¹¹Indagu boo ama' nilono, “Amon ru ginio poyo, baalo' min noyo. Pagibit kau ra karung mino ra ampos moonsoi kaga' intor ra pagun ti koson taak ra gabenor no, sanganu damar, sanganu ruu' maningot, apa' pampagamis ra akanon, kawa' pistasio am kawa' Badam.

¹²Pagibit kau niayuk ra ruit induo poyo suang no, sabap ra ruit ondo' natuum min ra karung mino musiti' pasagulion min toojo. Maaru' lair nalingawan.

¹³Ibito' min noyo boborok mino am saguli' kano ra mataki'.

¹⁴Gama' ru i Aki Kapuuno' Ondo' Maayo Kaga' Kuasa' mambaal ra gabenor no makaasi' ramuyun, saboi parulion no i Binjamin am i Simion ramuyun. Aku ti, amon ru maluusan aku pana ra anak, inda' am atan piboo kulaan.”

¹⁵Ibito' boo ru pagaka'-pagaka' ri Jusup ngaangai' taak no am niayuk ruit induo poyo suang no, am ongoi ilo ra pagun ru Misir nabaya' ri Binjamin. Pakasuku' ilo ra giu', ongoi ilo uma' ri Jusup.

¹⁶Pakakito i Jusup ri Binjamin nabaya' risilo, indagu io ra ulipon ondo' magalung ra baloi nano, “Ibito' ilo ti mumpos ra baloi. Mangakan aku mababaya' risilo ra tanga' ru orou no. Simbaluyo' noyo sanginan kana' am pongoono' noyo ginio.”

¹⁷Baalo' ru ulipon no nanusuban riso no am paumposo' no sangkaaka' no ra baloi ri Jusup.

¹⁸Tatanga' ilo mumpos ra baloi no, mangalaa' ilo am mampaguang ilo, “Inibit takau ragiti sabap ra ruit ra pinasaguli' ralalom ru karung takali ra kasaa' itakau minatong ragiti. Rokopon nilo pulalii' itakau, alapon nilo kaladai takano am saukon takau ra ulipon nano.”

¹⁹Ginio ra giu' ra kulobon ru baloi ri Jusup no, indagu ilo ra ulipon ondo' magalung ra baloi no,

²⁰“Tuan, makimaap akai, igondo' akai noyo ratong ragiti nambali ra akanon.

²¹Giu' ra intok mai nombolong ra iorondom ralalom pangkiralanan muli', binungkalar mai karung maili, am moonong ramon nakatuum ra ruit ralalom ru karung maili ondo' kalo nakulau suang. Kalo nakapandai akai osoi napasubol ra ruit i. Raino inibit mai am pasagulion rirun.

²²Nagibit akai niayuk kasuang ra ruit poyo koson mambali ra masuang akanon. Kalo nakapandai akai osoi napasubol saguli' ra ruit maili ra karung mai.”

²³Taam ulipon no, “Pai' pagalabo. Pai' kalaa'. I Aki Kapuuno' mino, iono i Aki Kapuuno' ru ama' mino ondo' napauli ra ruit i ra karung mino. Naapu ku noyo logo ru gandum mini.” Ibito' no boo i Simion risilo.

²⁴Ibito' ru ulipon no ilo mumpos ra baloi. Pangani' io risilo ra timug pambaguan ra kalayam nilono am pamakan io ra kaladai nilono.

²⁵Kopongo raginio tomposo' nilo taak ondo' pangngani' nilo ri Jusup ra tanga' ru orou no, sabap ra binalaan ilo ra magakan ilo mabaya' ri Jusup.

²⁶Pakasaboi i Jusup ra baloi, taaki' nilo riso taak nilono am igulatur ra saang nano.

²⁷Pangkuot i Jusup ra tanou nilo sigagama' am indagu, “Atan tanou ri ama' min ondo' pinatunung min raki'? Ati kulaan riso i? Moonsoi io kia?”

²⁸Taam ilo, “Ama' mai ulipon muno, moonsoi io ayuk.” Igulatur ilo am samba ilo ra saang ri Jusup.

²⁹Kakito ri Jusup boborok nano i Binjamin, indagu io, “Gitio kia pagaka' min ra pupusan ondo' pinaragu min raki' ragili? Mambarakat i Aki Kapuuno' rirun anak kuno.”

³⁰Ugar pamulali' i Jusup intor ra giu' no, sabap ra mainggaak guang nano moondom ra boborok nano. Kalo boo moorot no, umpos io ra lamin nano am pantangi'.

³¹Pakapanginjagup io, ingkual io saguli' am liliwa' mongorot ra guang nano, pabatangi' no akanon.

³²Mangakan i Jusup ra rondo' mija' nakatuliar, pagaka'-pagaka' nano mija' ra bokon. Ulun ru Misir ondo' soroi ra giu' no mangakan ra mija' ra bokon poyo, sabap ra maasaban ilo amon ru magulung pangakan ra ulun ru Ibrani.

³³Pagaka'-pagaka' ri Jusup nantulibung ra mija' ondo' tumingkuang ri Jusup maya' ra umur nilono, intor ra katuaan suku' ra pupusan. Kakito nilo baal ru panturungan nilono, posotontong ilo ra nangimuag.

³⁴Akanon ra pinabatang risilo no intor ra intok ri Jusup, am pinabatang ri Binjamin indimo suang intor ra pagaka'-pagaka' nano. Pagagakan am pagiginum ilo nababaya' ri Jusup saboi nangagauk.