Read Timugon Murut KASAUKAN 45 Bible Online

KASAUKAN 45 - Timugon Murut bible

KASAUKAN 45

¹Kalo boo moorot ri Jusup guang nano ra saang ru ulipon-ulipon nano, ginio ra susubo' no ilo mangiruan ra intok no. Kolondo' sangulun pana namparangan ri Jusup paat io nambala' ra osoi io sotopot no ra pagaka'-pagaka' nano.

²Io pana nantangi' ra mosongou kaga' saboi maining ru ulun-ulun ru Misir tangi' nano. Tanou raginio nakasuku' ra istana ru raja'.

³Indagu i Jusup ra pagaka'-pagaka' nano, “Aku i Jusup. Lakat poyo kia naayag i ama' i?” Kaa' mangalaa' kaga' pagaka'-pagaka' nano saboi kalo nakataam ilo.

⁴Indagu boo i Jusup risilo, “Ibok, inggaar kano raki'.” Inggaar ilo riso am indagu io risilo, “Aku pagaka' min i Jusup ondo' tinalan min ra pagun ru Misir.

⁵Raino pai' kau kalaa' kapoam pansagulian guang sabap ra nantalan raki'. Sotopot no i Aki Kapuuno' galama' ondo' nagibit raki' ragiti siminigulu ramuyun am makapamayag poyo ra masuang ulun.

⁶Raino bagu ruo ngambilor bitilan ra pagun ti am mokoondo' limo ngambilor poyo buoi no ulun kalo makapantanom kapoam makapangkumos.

⁷I Aki Kapuuno' nangator noyo raki' sumigulu ramuyun koson mamayag ramuyun ra ralan ru baal makaimuag ti, am koson manutun ramuyun am papag mino maayag.

⁸Ginio ra sotopot no, sala' ka akau nangator raki' kaa' i Aki Kapuuno'. Sinauk No aku ra gabenor ru raja' ru Misir. Aku maningganai ra titikop pagun. Aku no manguasa' ra titikop pagun ru Misir.

⁹Raino kataki' kano saguli' ri ama' am balai' io ra anak muli i Jusup minindagu koon ragitio, ‘Sinauk aku ri Aki Kapuuno' ra gabenor ra pagun ru Misir, ratong no ra mataki'.

¹⁰Makaayan kou ra libung ru Gosyin, makapaginggaar raki' — okou galama', anak-anak muno, akupu-akupu muno, kambing muno, domba muno, sapi' muno am ngaangai' longgom muno.

¹¹Amon soroi kou ra Gosyin, makapagalung aku rirun. Mokoondo' limo ngambilor poyo buoi ru bitilan ti, am marara' aku ra okou, sasambaloi muno am ngaangai' bibiag muno mangaitilan.’ ”

¹²Tungguli' poyo ri Jusup, “Raino akau galama' nakakito am okou niayuk Binjamin, ra aku ti totopot i Jusup.

¹³Balai' min i ama' ra maayo kaga' kuasa' kutu ra pagun ru Misir ti, am balai' min niayuk ra ngaangai' atan ondo' nakito min. Kataki' kano matong ragiti magibit ri ama'.”

¹⁴Ganggali' boo ri Jusup i Binjamin am pantangi' io. Pantangi' niayuk i Binjamin paat ra gumanggol ri Jusup.

¹⁵Lakat poyo mantangi', ganggali' ri Jusup pagaka'-pagaka' nano am alok risilo. Kopongo raginio tumalimpuun boo makimansunur sangkaaka' no ri Jusup.

¹⁶Paat ra nakasaboi tanou ru pagaka'-pagaka' ri Jusup no ra istana ru raja', naansayan raja' am tingganai-tingganai nano.

¹⁷Indagu raja' no ri Jusup, “Susubo' pagaka'-pagaka' muno mapasakoi ra masuang gandum ra kaladai nilono am uli' ra Kanaan,

¹⁸ongoi pagibit ra ama' am niayuk sasambaloi nilono mongoi ragiti. Aniin ku ilo ra tana' ondo' moonsoi kaga' ra Misir ti, am maulian ilo intor ra maukapan ra bayag nilono.

¹⁹Pagibito' ilo niayuk ra kukula' kurita' kuda intor ragiti, koson sakayan ru andu' am anak mongoborok nilono, am magibit ra ama' nilono matong ragiti.

²⁰Kalo pana malubatan ilo manatang ra ngaangai' kuliamos nilono, sabap ra ngaangai' kuliamos mongoonsoi kaga' ra titikop ru Misir ti masauk ra ilo tatangan.”

²¹Gagayaa' ru anak-anak ri Jakub nanusuban ru raja' no. Anii' ilo ri Jusup ra kukula' kurita' kuda sumugut ra susuban ru raja' i am lutui' ilo ra akanon ra pangkiralanan.

²²Inanian no ilo sigagama' ra ralinan, kaa' i Binjamin inanian no talu ngaatus ruit pirok am limo bayang ralinan.

²³Pootoro' no ra ama' nano mopor ngainan kaladai ondo' napasakayan ra kuliamos mongoonsoi kaga' intor ra Misir, am mopor kaladai poyo napasakayan ra gandum, ruti' am akanon ra bokon koson lutu' ru ama' nano ra pangkiralanan mongoi ra Misir ra tauli no.

²⁴Pintari' ilo ri Jusup, am tatanga' ilo mugar, indagu i Jusup risilo, “Pai' kau pansasangor ra pangkiralanan.”

²⁵Tatango' nilo pagun ru Misir am saguli' ra ama' nilo i Jakub giu' ra Kanaan.

²⁶Konilo nambala' ri Jakub, “Lakat poyo maayag i Jusup! Gabenor io ra titikop ru Misir!” Kaining ri Jakub tanou no nakasioro' io am kalo mangintopot io risilo.

²⁷Kaa' katunung nilo ngaangai' ondo' rinagu ri Jusup i risilo, am kakito no kurita' kuda ondo' pinaator ri Jusup koson sakayan mongoi ra Misir, pakatutun io boo intor ra naliangan.

²⁸Kono, “Anak ku i Jusup, lakat poyo maayag! Ginio ayuk boo koogot kuno! Musiti' tumuum aku riso ra aku kalo poyo matoi!”