Read Timugon Murut KASAUKAN 48 Bible Online

KASAUKAN 48 - Timugon Murut bible

KASAUKAN 48

¹Kukula' buoi raginio binalaan i Jusup ra ama' nano marualan ra malanjag. Ginio ra ibito' ri Jusup karuo ngaulun anak ungkuyon nano mongoi ilong ri Jakub.

²Kabalai' i Jakub ra nakaratong noyo i Jusup anak nano, ikang io am panturung ra nambalangan nano.

³Indagu i Jakub ri Jusup, “I Aki Kapuuno' Ondo' Maayo Kaga' Kuasa' minintalang raki' ra Lus giu' ra tana' ru Kanaan, am nambarakat noyo raki'.

⁴Indagu io raki', ‘Mangani' Aku rirun ra masuang anak maa' raginio papag muno masauk ra bansa' masuang. Taakin Ku ra papag muno tana' ragitio koson ilo ra ampu' ra sabuoi-buoi no!’ ”

⁵Tungguli' poyo ri Jakub, “Jusup, karuo ngaulun anak ungkuyon muno ondo' inanak ra Misir ra kalo poyo nakaratong aku ragiti, iloti aku ra ampu'. I Ipraim am i Manasi mogondo' koson ra anak ungkuyon kuno i Rubin am i Simion.

⁶Amon ru makaanak ungkuyon kou poyo, ilono kalo karaan ku ra anak kuno kaa' anak muno. Maapu nilo sugul intor ri Ipraim am i Manasi.

⁷Binaal ku gitio sabap ra ina' muli i Ragil. Tatanga' pangkiralanan kuno muli' intor ra bandar Misopotamia, ina' muli minatoi ra tana' ru Kanaan ondo' kalo maalur intor ra Iprata, mangiluk kaga' guang kuno. Linobong ku io giu' ra kiing ru ralan mongoi ra bandar Iprat.” (Raino Iprat mauligan ra Bitligim.)

⁸Kakito ri Jakub anak ri Jusup, pangkuot io riso, “Osoi kia anak-anak ungkuyon ti?”

⁹Taam i Jusup, “Ilo ti anak kuno ondo' pinataak noyo ri Aki Kapuuno' raki' giti ra Misir ti.” Indagu i Jakub, “Painggaaro' ilo raki' am mabarakat ku.”

¹⁰Mato ri Jakub kalo makakito toojo sabap ra matutuo io noyo. Kalo makito no toojo. Painggaaro' ri Jusup anak-anak nano ri Jakub, ganggali' ri Jakub am alaki' no ilo.

¹¹Indagu boo i Jakub ri Jusup, “Indos ku ru kalo boo makapantuum to, kaa' raino pinailong aku ri Aki Kapuuno' ra anak-anak muti niayuk.”

¹²Alapo' ri Jusup anak-anak nano intor ra sapau ri Jakub am igulatur io galama' ra saang ru ama' nano.

¹³Kopongo raginio poongoyo' ri Jusup i Ipraim ra kait ri Jakub am i Manasi ra pamiris.

¹⁴Kaa' pasandiapalo' ri Jakub kalindu' nano, pokopoo' no kalindu' pamiris nano ra ulu ri Ipraim kabalu' pana io anak ra mamulok, am kait nano ra ulu ri Manasi ondo' katuaan no.

¹⁵Barakato' no i Jusup,[99] kono, “Gama' ru i Aki Kapuuno' ondo' sambaan ru kinamatuaan kuli i Abragam am i Isak, mambarakat ra anak-anak ti. Gama' ru i Aki Kapuuno' ondo' nagalung raki' saboi orou raiti', mambarakat risilo.

¹⁶Gama' ru malaikat ondo' namayag raki' intor ra baal makalalaa', mambarakat risilo. Gama' ru inggalan kuno am inggalan ru kinamatuaan kuli, i Abragam am i Isak, magail sisiraan sabap ra anak-anak ragitio! Gama' ru mokoondo' ilo masuang anak am masuang papag!”

¹⁷Kalo naansayan i Jusup magilong ra ama' nano napakapo ra kalindu' pamiris nano ra ulu ri Ipraim. Ginio ra guuto' no kalindu' ru ama' nano, am pabandingo' no intor ra ulu ri Ipraim tapik ra ulu ri Manasi.

¹⁸Kono ra ama' nano, “Sala' ka koon ragino ama'. Gitio anak ra katuaan, pokopoo' noyo kalindu' pamiris muno ra ulu nati.”

¹⁹Kaa' ansang ama' nano ri Jusup, “Nakapandai aku, anak kuno, nakapandai aku. Masauk niayuk papag ri Manasi no ra bansa' maayo. Kaa' boborok nati makakuasa' poyo ka intor riso, am papag nano masauk ra bansa' mangaayo.”

²⁰Barakato' no boo anak-anak nano ra orou raginio, kono, “Sabiton ru ulun ru Israil inggalan mino paat ra ilo mambarakat ra ulun ra bokon. Raguon nilo, ‘Gama' ru i Aki Kapuuno' mapasauk ramuyun koson ri Ipraim am i Manasi.’” Intor raginio napasigulu i Jakub ri Ipraim intor ri Manasi.

²¹Indagu boo i Jakub ri Jusup, “Koson ra makito muno, patayan kuno mamaar noyo, kaa' sumbayaan kou ri Aki Kapuuno' am magibit Io saguli' rirun ra pagun ru kinamatuaan muno.

²²Okou noyo am sala' ka pagaka'-pagaka' muno ondo' papataakan kuno ra pagun ru Sikgim, libung malabung ondo' ginaau kuno intor ra ulun ru Amori ra ilang am panah kuno.”