Read Timugon Murut KASAUKAN 6 Bible Online

KASAUKAN 6 - Timugon Murut bible

KASAUKAN 6

¹Paat ra ulun giminaai suang am liminayak minayan ra titikop ra tana' ti am anak ruandu' anakon,

²ulun ru tana' ti[22] magilong ra ralaa-ralaa ti mangantalur. Ginio boo ra anduon nilo ralaa-ralaa ra kasagaan nilo.

³TUHAN pana mindagu boo, “Kalo polosoon Ku ulun maayag ra sabubuoi; ilo ulun mapandai matoi. Intor raino ti, umur nilo kalo masailan intor ra 120 ngambilor.”

⁴Paat ragili am niayuk kalupus paat ragili, makaulun mangaayo am mangapanggol. Papag ilo ru ralaa ru ulun ondo' natagandu' ra ulun ru tana' ti. Ulun-ulun raginio noyo tutumula' mapanggol ondo' nangauligan kaga' paat ra galing i.

⁵Paat nakito ru TUHAN ra mapara' laat ru ulun ru tana' ti am pangkaraan nilo magail malaat.

⁶Ginio ra pansagulian boo TUHAN napasauk risilo am napaayan ra tana' ti. Nasindualan kaga' TUHAN.

⁷Ginio ra indagu Io boo, “Pusoon Ku ngaangai' ondo' sinauk Kutu, susuit am bibiag ra bokon sabap pansagulian Aku kaga' napasauk risilo.”

⁸Kaa' i Nuu mapabansuk ra guang ru TUHAN.

⁹Gitio noyo tunung ri Nuu: Makaanak ungkuyon io talu ngaulun, i Siim, Japit am i Gam. Kalo igondo' i Nuu nambaal ra sala am io noyo rorondo' moonsoi kaga' paat ragili. Io ti masalok sumimpung ri Aki Kapuuno',

¹¹kaa' ngaangai' ulun ra bokon malaat ra pagilangan ri Aki Kapuuno' am makakalaatan ra ati ayuk intok.

¹²Nagilong i Aki Kapuuno' ra tana' ti am nakakito ra kalaatan ayuk am ngaangai' ulun malaat kaayagan.

¹³Indagu i Aki Kapuuno' ri Nuu, “Inaru' Ku noyo ra pupusin Ku kaayagan ru ngaangai' ulun. Ilo ngaangai' pusoon Ku sabap tana' ti napanu' ra kalaatan nilo.

¹⁴Pambaal noyo ra kapal intor ra tataun ondo' mokotog toojo; baali' ra lamin ralalom no am tapisi' ra tiir intor ralalom am liwar no.

¹⁵Baalo' gawar no 133 ngamito, 22 ngamito pila' no am sawat no 13 ngamito.

¹⁶Baali' ra taap[23] kapal no am anii' galur no ra gayo 44 ngasintimito lolot ru taap am rinding no. Am baali' niayuk ra talu sindur am baali' ra kulobon ra kiing no.

¹⁷Mopongo raginio porotongon Ku rosob koson mapaluus ra ngaangai' ondo' maayag ra tana' ti,

¹⁸kaa' mambaal Aku ra bantu' rirun. Subol kano ra ralalom ru kapal mabaya' ra andu' muno, anak-anak muno am andu' nilono.

¹⁹Pagibit noyo ra sanginan tandaa' am puunan intor ra moonong susuit am bibiag ru lantur maa' raginio ilo kalo maluus.

²¹Pagibit niayuk ra nansalinut akanon min am poyo akanon ru ngaangai' bibiag raginio.”

²²Binaal ngaangai' ri Nuu ondo' nanusuban ri Aki Kapuuno' riso.