Read Timugon Murut KASAUKAN 7 Bible Online

KASAUKAN 7 - Timugon Murut bible

KASAUKAN 7

¹Indagu boo TUHAN ri Nuu, “Ilain Ku ra okou ayuk rorondo' ondo' sumugut ra susuban Kuno. Ginio ra subol kano ralalom ru kapal no mabaya' ra akau ngaangai' sasambaloi.

²Pagibit noyo tulu' mantuop intor ra moonong bibiag ondo' mapasau, kaa' santuop ayuk intor ra moonong bibiag ra malaat.

³Pagibit niayuk tulu' mantuop intor ra moonong susuit. Baalo' noyo ginio maa' raginio moonong bibiag am susuit maalungan am makasayat saguli' ra tana' ti.

⁴Katuluan poyo maparatu' Aku ra rasam ondo' kalo tuminas-tinas buoi apat ngoopor ngoorou am apat ngoopor ngorondom koson mapaluus ra ngaangai' ilo ondo' maayag ondo' sinauk Kuli.”

⁵I Nuu pana nambaal ra ngaangai' ondo' nanusuban ru TUHAN riso.

⁶Umur ri Nuu 600 ngambilor paat ra rosob minatong ra tana' ti.

⁷I Nuu am andu' nano, anak-anak nilo am andu' nilono sumubol ralalom ru kapal koson minggalur ra rosob.

⁸Sanginan tandaa' am sanginan puunan intor ra moonong salinut ru susuit am bibiag, ondo' mapasau kapoam ondo' malaat,

⁹sumubol ralalom kapal mabaya' ri Nuu koson ra nanusuban ri Aki Kapuuno'.

¹⁰Katuluan noyo ragili, rosob pana minatong ra tana' ti.

¹¹Paat umur ri Nuu 600 ngambilor, iono orou koopor am tulu' ra sila' karuo, salalaput ayuk boo ngaangai' taur ru timug ra ragana' ru tana' ti. Ngaangai' kulobon ru timug ra limbowon minukab,

¹²am riminasam buoi apat ngoopor ngoorou am apat ngoopor ngorondom.

¹³Paat orou ragili niayuk, i Nuu am andu' nano siminubol ra ralalom kapal no mabaya' ra katalu anak ungkuyon nilo, iono i Siim, Japit, i Gam mabaya' ra andu' nilono.

¹⁴Nababaya' risilo, iono moonong salinut ru bibiag mangakaup am mangasigo, ondo' mangaayo am mongoborok am niayuk moonong salinut ru susuit.

¹⁵Sanginan tandaa' am sanginan puunan intor ra moonong salinut maayag ru tana' ti sumubol ralalom ru kapal no mabaya' ri Nuu,

¹⁶koson ra nanusuban ri Aki Kapuuno'. Pakaumpos ngaangai' no, angabi' ru TUHAN kulobon ru kapal no.

¹⁷Rosob ra tana' ti buoi apat ngoopor ngoorou timinuu' ra masawat kaga' saboi kapal no liminantau.

¹⁸Timug no timinuu' poyo am lalantau kapal rasawat ru timug.

¹⁹Timug no timinuu' poyo saboi gunung ra mangasawat kaga' pana nangalinjob.

²⁰Timug no pana narayus poyo timinuu' saboi tulu' ngamito poyo sawat intor ra tampak ru gunung.

²¹Ngaangai' maayag ra tana' ti naluus: ulun, susuit, bibiag ru lantur ra mongoborok am mangaayo.

²²Ngaangai' ondo' mamainawo ra tana' ti niayuk minatoi.

²³Napaluus TUHAN ra ngaangai' ondo' maayag ra tana' ti koson ra ulun, bibiag am susuit. Kaa' ondo' ayuk kalo minatoi, iono i Nuu am ngaangai' ondo' nababaya' riso ra kapal i.

²⁴Timug pana kalo miniit buoi 150 ngoorou.