Read Timugon Murut KASAUKAN 8 Bible Online

KASAUKAN 8 - Timugon Murut bible

KASAUKAN 8

¹Kalo napalilian i Aki Kapuuno' ri Nuu am ngaangai' bibiag ondo' nababaya' riso ralalom ru kapal no. Pinagangin No saboi miniit rosob.

²Ngaangai' taur ru timug ra ragana' ru tana' ti am ngaangai' kulobon ru timug ra limbowon tinauban No. Timininas boo rasam.

³Miniit boo timug. Kopongo 150 ngoorou, timug kalo boo kula' maayo.

⁴Paat ra orou koopor am tulu' sila' katulu', kapal no nakararal ra rondo' tampak ru kabuluran Ararat.

⁵Tumalimpuun miit timug paat ra orou kasaa' ra sila' koopor, am tampak ru gunung pana tumalimpuun makito.

⁶Kopongo apat ngoopor ngoorou, inukaban ri Nuu rondo' gigimpalan.

⁷Io pana nampalabus ra sanginan susuit bangkaak. Susuit ti kalo siminaguli', kaa' narayus ayuk nansiab ra ati ayuk intok saboi timug miniit toojo.

⁸Liliwa' raginio, palabuso' ri Nuu sanginan susuit asang koson makapandai ru miniit noyo timug.

⁹Kaa' kolondo' arapan ru susuit no sabap ra lakat poyo makatimug titikop ru tana' ti. Ginio ra saguli' boo susuit no ri Nuu, am apuo' no rokopo' pasubolo' ralalom ru kapal.

¹⁰Naginaa io buoi katuluan am palabuso' no poyo susuit asang no.

¹¹Paat mamai' minuli' susuit no am nagibit rondo' raun jaitun ondo' baguon kaga' ra tinduk nano. Ginio ra natutunan ri Nuu ra miniit noyo timug.

¹²Kopongo naginaa katuluan poyo, palabuso' no igondo' poyo susuit asang no; raino ti susuit no kalo boo siminaguli' riso.

¹³Paat ra umur ri Nuu 601 ngambilor, iono paat orou kasaa' ra sila' kasaa', miniit noyo toojo timug no. I Nuu pana nangukab ra kapal am pampulolou io ra liliut no. Ilai' no ralimbou ru tana' ti mapua' noyo toojo.

¹⁴Paat ra orou karuo ngoopor am tulu' ra sila' karuo, tana' ti mapua' noyo kaga'.

¹⁵Indagu boo i Aki Kapuuno' ri Nuu,

¹⁶“Ingkual kano intor ra kapal mabaya' ra andu' muno, anak-anak ungkuyon muno am andu' nilono.

¹⁷Ibito' noyo mingkual ngaangai' susuit am bibiag maa' raginio ilo ti mansasayat am lumayak ra titikop ru tana' ti.”

¹⁸Ingkual boo i Nuu intor ra kapal nabaya' ra andu' nano, anak-anak ungkuyon nano am andu' nilono.

¹⁹Ngaangai' bibiag am susuit miningkual ra kapal maya' ra salinut nilo sigagama'.

²⁰Nambaal i Nuu ra altar koson ra TUHAN. Pangalap io intor ra moonong salinut ru susuit am bibiag ondo' mapasau am pataako' no boo ngaangai' no koson ra taak simbalui.

²¹Owou ru taak ri Nuu no mapabansuk ra guang ru TUHAN am igindagu Io galama', “Kalo boo ulason Ku tana' ti sabap ra binaal malaat ru ulun; nakapandai Aku noyo ra intor ayuk poyo ra mamulok, guang ru ulun malaat. Kalo boo luuson Ku ngaangai' ondo' maayag koson ra kakabaal Kunii.

²²Buoi ru tana' ti soroi, masalok makamantanom, makamangkumos, bulintok masimu', bulintok malasu', bulintok tampio, bulintok rumasam, matawang am molondom.”