Read Timugon Murut 2 SAMUIL 17 Bible Online

2 SAMUIL 17 - Timugon Murut bible

2 SAMUIL 17

¹Kalo nabuoi raginio, indagu i Agitopil ri Absalom, “Iowo' aku mampili' ra mopor am ruo ngaribu ngaulun. Rondom no mugar aku koson mangilou ra Raja' Daut.

²Bulunsaron ku io paat ra io lakat poyo maagui am malawo guang. Malaa' io saboi ngaangai' ulun nano magigiru'. Raja' Daut ayuk ondo' potoyon kuno.

³Ngaangai' ru ulun nano pasagulion ku rirun koson ra ruandu' uoton sumaguli' ra ralaki. Sala' ka kia okou ayuk mompogogot ra rondo' painawo ru ulun?[39] Ulun ra bokon kalo jamarin.”

⁴Bilin raginio kinara' ra moonsoi ri Absalom am ru ngaangai' tingganai ru ulun ru Israil.

⁵Kabalu' pana koson raginio indagu i Abaslom, “Piawo' i Gusai. Rongogo' takau guangon nano.”

⁶Paat ri Gusai muma', pambala' i Absalom ra inatangan ri Agitopil, am indagu, “Ginio noyo bilin ri Agitopil. Moonsoi kia ru suguton takau bilin raginio? Amon ru kalo, pangani' ra inatangan ra bokon.”

⁷Taam i Gusai, “Bilin ri Agitopil ra raino ti kalo moonsoi.

⁸Okou nakapandai ra Raja' Daut am ulun-ulun nano tutumula' ondo' maikang ra baani. Ilo no koson ra kinasangit ru baawang ruandu' ondo' natatakan ra anak nano. Raja' Daut ti niayuk sangulun saujor makanailian, ondo' kalo igondo' pombolong ra rondom ti mabaya' ra ulun-ulun nano.

⁹Maaru' lair paat ra raino ti pana tatanga' io nansibuni giu' ra ralalom ru rondo' luang batu kapoam intok ra bokon. Paat ayuk ra ulun-ulun muno bulunsaron ru Raja' Daut, am mokoondo' ra matoi, maaru' ra osoi ayuk ondo' mokorongog ra baal raginio mindagu ra ulun-ulun muno kinala noyo.

¹⁰Kinibit ru ginio, ulun ondo' baani kaga' am maikang toojo koson ra singa' pana malaa'. Ngaangai' ulun giu' ra Israil makapandai ra ama' muno sangulun tutumula', am ra ulun-ulun nano tutumula' ondo' maikang ra baani.

¹¹Sabap raginio, bilin kutu koson ragitio: Timungo' ngaangai' ulun ru Israil intor ra titikop ru pagun, saboi ra kinasuang no koson ra kinasuang ru agis giu' ra nagas. Kopongo raginio okou galama' maningganai risilo jumalai ra mampatoi.

¹²Uyumon takau Raja' Daut ra ati ayuk intok nano, am bulunsaron takau io ra kalo poyo makaliman io ra atan ondo' masauk. Kolondo' sangulun pana ondo' makalabus, ioupana io am niayuk ulun-ulun nano.

¹³Amon ru magiru' io ra ralalom ru rondo' bandar, ngaangai' ru mamagun takau mangalap ra kalat-kalat am mamparalaat ra bandar no[40] am mamparatu' raginio ra ralalom ru rondo' limayak ondo' nakainggaar. Rondo' batu pana kolondo' matatang giu' ra tampak ru bulur no.”

¹⁴Kopongo i Absalom am ngaangai' ulun ru Israil nokorongog ra inatangan raginio, konilo, “Moonsoi poyo bilin ri Gusai intor ra bilin ri Agitopil.” Inaru' noyo ru TUHAN koson mongompong ra bilin ri Agitopil ondo' moonsoi no, maa' raginio matiu' i Absalom ra karaat.

¹⁵Kopongo raginio nambala' i Gusai ra Imam Jadok am Imam Abiatar intor ra bilin ri Agitopil am bilin nano galama' ri Absalom am ra ngaangai' tingganai ru Israil.

¹⁶Kon ri Gusai, “Ribaki'! Balai' Raja' Daut maa' raginio kalo mombolong ra rondom giu' ra intok laupan ra sungoi giu' ra tana' kaagisan. Musiti' io mataki' lumaup ra Sungoi Jordan. Amon ru kalo, io am ngaangai' ru ulun nano rokopon am potoyon.”

¹⁷Liliwa' raginio i Jonatan anak ri Abiatar am i Agimaas anak ri Jadok tatanga' maginaa mamaar ra taur ru timug In-Rogil, giu' ra kiing ru bandar Jirusalim. Kalo baani ilo mumpos ra bandar sabap ra malaa' ilain ru ulun. Koson ra kaindalaman, makaalap ilo ra tanou intor ra sangulun ulipon ruandu' ondo' mampasaboi ra tanou ondo' musiti' pabalaan ra Raja' Daut.

¹⁸Kaa' raino ti sangulun lalaing ungkuyon nakainamot ra nakakito risilo, am pabalaa' baal raginio ri Absalom. Ginio ra i Jonatan am i Agimaas nagindibok minugar am pansibuni giu' ra baloi ru sangulun mamagun ru kampung Bagurim. Giu' ra liliut ru baloi no mokoondo' rondo' tulubong, ilo pana siminubol ra ralalom ru tulubong no.

¹⁹Andu' ru tatangan ra baloi no napabingkal ra panaub ra rasawat ru luang ru tulubong no am pasasaro' gandum ra rasawat no, saboi tulubong no kalo makito.

²⁰Ulun sinusub ri Absalom minatong ra baloi no am pangkuot ra ruandu' no, “Ati kia i Agimaas am i Jonatan?” Taam io, “Bagu ilo ayuk liminaup ra sungoi.” Ulun sinusub no naguyum ra karuruo ngaulun buayoi no, kaa' kalo natuum nilo. Kopongo raginio uli' ulun sinusub no ra Jirusalim.

²¹Ingkual i Agimaas am i Jonatan intor ra tulubong no, am mataki' minugar tumuum ra Raja' Daut. Nambala' ilo ra ngaangai' ondo' nasauk. Konilo, “Nambilin i Agitopil koson mamulunsar rirun. Ginio ra ugar no raino niayuk am laup ra sungoi ti.”

²²Ginio ra Raja' Daut am ulun-ulun nano liminaup ra Sungoi Jordan, am nakasaboi ra sandaup paat ra tumawang.

²³Paat ri Agitopil nakapandai ra bilin nano kalo binaya', patampako' no palana ra kaladai nano am uli' ra bandar nano galama'. Kopongo nanalasai ra ngaangai' baalon nano, tair io galama'. Kopongo raginio linobong io ra kalabangan ru sasambaloi nano.

²⁴Nakasaboi noyo Raja' Daut ra bandar Maganaim paat ri Absalom liminaup ra Sungoi Jordan am binaya' ru ulun ru Israil. (

²⁵Napalantik noyo i Absalom ri Amasa masauk ra panglima saujor koson mamalit ri Joab. I Amasa anak ri Jitra, ulun ru Ismail;[41] ina' nano makainggalan ri Abigail anak ri Nagas, pabukat ra ruandu' ri Jiruya, ina' ri Joab.)

²⁶Nangkim i Absalom am ulun-ulun nano giu' ra libung Giliad.

²⁷Paat ra Raja' Daut nakasaboi giu' ra Maganaim, inuma' io ri Sobi anak ri Nagas intor ra bandar Raba giu' ra Amon, am i Makgir anak ri Amiil intor ra Lodibar, am i Barjilai intor ra Rogilim ra Giliad.

²⁸Nagibit ilo ra mangkuk, paliuk tana', am bajang ra Raja' Daut am ulun-ulun nano. Nagibit ilo niayuk ra gandum, barli, tapung, gandum sininggala', kasang malia', kasang malia' ra masalag, ruu' maningot, kiju, krim, am kukula' ngainan domba. Nakapandai ilo ra Raja' Daut am ulun-ulun nano naitilan, pinaason, am naagui sabap ra pangkiralanan giu' ra tana' kaagisan.