Read Timugon Murut 2 SAMUIL 5 Bible Online

2 SAMUIL 5 - Timugon Murut bible

2 SAMUIL 5

¹Kopongo raginio ngaangai' bansa' ru Israil minuma' ra Raja' Daut giu' ra Gibron. Konilo riso, “Akai ti okou poyo ngai'.

²Intor ragili, am poyo paat ra Raja' Saul lakat poyo raja' mai, okou noyo naningganai ra saujor ru Israil nangayou. Binantu' niayuk ru TUHAN no rirun ra okou maningganai ra ulun Nano am masauk ra raja' nilo.”

³Kon raginio noyo ngaangai' tingganai ru Israil minuma' ra Raja' Daut giu' ra Gibron. Nambaal Raja' Daut ra nabantuan risilo, sauko' nilo boo io ra raja' ru Israil.

⁴Talu ngoopor ngambilor umur ri Raja' Daut paat nasauk ra raja', am namarinta io buoi apat ngoopor ngambilor.

⁵Namarinta io giu' ra Gibron koson ra raja' Jiuda buoi tulu' ngambilor am naintanga', am giu' ra Jirusalim koson ra raja' ru titikop Israil am Jiuda buoi talu ngoopor am talu ngambilor.

⁶Paat ra sangarawan Raja' Daut am ulun-ulun nano minongoi pamulunsar ra Jirusalim. Ulun ru Jibusi ondo' minayan ra giu' no nangkara' ra kalo masaga' Raja' Daut mampakaala ra bandar no. Indagu ilo riso, “Kalo noyo toojo makasubol kou ragiti. Iou pana ulun bolou am kimpo' no pana makaanjung rirun.” (

⁷Kaa' totopot Raja' Daut nakagaau ra Sion kubu pangampinan nilo. Intor raginio kubu no ininggalanan ra “Bandar Daut.”)

⁸Paat orou raginio indagu Raja' Daut ra ulun-ulun nano, “Mokoondo' kia osoi-osoi ragiti ondo' masisang ra ulun ru Jibusi koson raki' masisang risilo? Sama' kia sisang nano saboi moogot io kaga' mamatoi risilo? Amon ru kon raginio, subol no ra babayaan ru timug am bulunsaro' ulun bolou am ulun kimpo' ondo' kasisangin kuno.” (Ginio sabap ra ulun mindagu, “Ulun bolou am ulun kimpo' inggalarin mumpos ra Baloi ru TUHAN.”)

⁹Kopongo Raja' Daut nampagaau ra kubu Sion, minayan io ra giu' no am ininggalanan no ra “Bandar Daut”. Nambaal io ra bandar giu' ra liput ru kubu no, inintaran ra tampilon ru sirangon ru bulur ondo' pinumpunan ra tana'.

¹⁰Buoi ka buoi giminaai ikang ru Raja' Daut sabap ra TUHAN, i Aki Kapuuno' Ondo' Maayo Kaga' Kuasa' no nangindangan riso.

¹¹Raja' Giram, intor ra pagun Tirus, nangator ra ulun-ulun sinusub nano mongoi ra Raja' Daut. Nangani' Raja' Giram ri Raja' Daut ra tataun sidar, manukang ra tataun am manukang ra batu koson mambaal ra istana.

¹²Ginio ra nakaliman i Raja' Daut ra TUHAN napaikang riso koson ra raja' ru Israil, am napasauk ra pamarintaan nano naukapan koson ra kaatangan ru ulun ru TUHAN.

¹³Kopongo Raja' Daut nabanding intor ra Gibron minongoi ra Jirusalim, mokoondo' io ra masuang poyo andu' am parulug, am niayuk anak ungkuyon am ruandu'.

¹⁴Gitilo noyo anak ungkuyon ri Raja' Daut ondo' inanak giu' ra Jirusalim: Syamua, Sobab, Natan, Salomo,

¹⁵Jibgar, Ilisua, Nipig, Japia,

¹⁶Ilisama, Ilyada am Ilipilit.

¹⁷Paat ra ulun ru Palistin nakapandai ra sinauk noyo Raja' Daut ra raja' ru Israil, ingkual saujor nilo koson mamparakop riso. Kaa' paat ra Raja' Daut nokorongog raginio, minongoi io sindung ra rondo' intok ondo' mokoondo' ra kubu.

¹⁸Nakasaboi ulun ru Palistin giu' ra Limayak Ripaim am ayan ra giu' no.

¹⁹Pangkuot Raja' Daut ra TUHAN, “Musiti' ku kia bulunsaron ulun ru Palistin? Aniin Mu kia aku ra kamanangan?” Taam TUHAN, “Bulunsaro' noyo! Mangani' Aku rirun ra kamanangan.”

²⁰Ginio ra minongoi i Daut giu' ra Baal-Pirasim am nangala ra ulun ru Palistin. Indagu io, “Jinunjung noyo ru TUHAN gagampin ru pantula' kuno, koson ra liur napajunjung ra ngaangai' no ra igondo' ayuk.” Ginio sabap ra intok no ininggalanan ra Baal-Pirasim.[5]

²¹Paat ra ulun ru Palistin nagiru' intor ra giu' no, tinatang nilo sinungkalalaing nilono. Alapo' boo ru Raja' Daut am ulun-ulun nano sinungkalalaing-sinungkalalaing no.

²²Kalo nabuoi raginio ulun ru Palistin siminaguli' ra Limayak Ripaim am ayan ra intok raginio poyo.

²³Igondo' poyo nangkuot Raja' Daut ra TUHAN. Taam TUHAN, “Pai' ilo bulunsaro' intor ragiti. Kaa' ugar no liputo' intok ti am bulunsaro' ilo intor ra talikuron, mamaar ra puun-puun ru kertau.

²⁴Paat ra morongog mu bolos koson ra ngaas-ngaas ru ulun baris giu' ra untu ru puun tataun no, patalimpuuno' noyo bulunsar sabap ra mugar Aku ra saang muno koson mangala ra saujor ru Palistin.”

²⁵Sinugut ri Raja' Daut susuban ru TUHAN am nakasugut io nangala ra ulun ru Palistin intor ra Giba saboi ra Gijir.