Read Timugon Murut 2 SAMUIL 7 Bible Online

2 SAMUIL 7 - Timugon Murut bible

2 SAMUIL 7

¹Nanindung TUHAN ra Raja' Daut intor ra ngaangai' taliasou ru pantula', saboi nakaayan io ra istana nano.

²Kopongo raginio indagu Raja' Daut ra Nabi Natan, “Ilai', aku minayan ra istana ondo' binaal intor ra tataun sidar, kaa' Kaban Nabantuan ri Aki Kapuuno' pinauli ralalom ru kim!”

³Taam i Natan, “Baalo' noyo atan ayuk kasagaan muno, sabap ra mangindangan TUHAN rirun.”

⁴Kaa' rondom raginio indagu TUHAN ri Natan,

⁵“Ongoyo' balai' ulipon kuno i Daut, ragu Kutu, ‘Sala' ka okou ondo' mambaal Raki' ra baloi.

⁶Intor ra Aku namayag ra ulun ru Israil intor ra Misir saboi raino, kalo igondo' Aku ayan ra ralalom ru baloi. Timinanggau Aku am mayan ralalom ru kim.

⁷Buoi ru pangkiralanan Kuno mabaya' ra ulun ru Israil, kalo igondo' aku pangkuot ra osoi pana tingganai[15] ondo' pinili' Kuno, atan sabap no ilo kalo nambaal Raki' ra baloi intor ra tataun sidar.’

⁸Ginio ra balai' ulipon Kuno Raja' Daut ra gitio noyo ragu Kutu, TUHAN Ondo' Maayo Kaga' Kuasa' no riso, ‘Nangalap Aku rirun intor ra magalung ra domba giu' ra padang am napasauk Aku rirun ra tingganai ru ulun Kuno Israil.

⁹Namaya' Aku rirun ra ati ayuk inangayan muno, am nangala Aku noyo ra pantula' muno paat ra okou namulunsar. Raino mapasauk Aku rirun ra mauligan kaga' koson ra tingganai-tingganai ondo' mangauligan kaga' ra tana' ti.

¹⁰Pinili' Ku noyo rondo' pagun tayar ru ulun Kuno Israil, am pinaayan Ku ilo ra giu' no. Kalo boo uliponon ilo ru osoi pana. Intor ra ilo minayan ra pagun no, binulunsar ilo ru ulun malaat, kaa' intor raino baal raginio kalo boo rumuli'. Mambantu' Aku mangampin rirun intor ra pantula' muno am mangani' rirun ra papag.

¹²Amon ru saboi ra pupus ru bayag muno, am lobongon kou ra kalabangan ru kinamatuaan muno, sangulun intor ra anak ungkuyon muno saukon Ku ra raja', am kapioton Ku pamarintaan nano.

¹³Io noyo ondo' mambaal Raki' ra baloi, am tutunon Ku maa' raginio saboi ra sabuoi-buoi no sangulun papag nano mamarinta koson ra raja'.

¹⁴Masauk Aku ra ama' nano am masauk io ra anak Kuno. Paat ra io mambaal ra sala, mangukum Aku riso koson ra sangulun ama' mangukum ra anak nano.

¹⁵Kaa' mantilayun togom Kuno riso nontopot ra bantu' Kuno. Bantu' Kuno riso rayuson Ku guuton, am sala' ka koson binaal Kuno ri Saul ondo' ininggi' Ku intor ra intok nano maa' raginio okou masauk ra raja'.

¹⁶Magail kou mokoondo' ra papag am patilayunon Ku pamarintaan muno. Pamarintaan muno kolondo' pupus.’ ”

¹⁷Koon raginio noyo nambalaan ri Natan no ra Raja' Daut ngaangai' ondo' pinabala' ri Aki Kapuuno' riso.

¹⁸Kopongo raginio umpos Raja' Daut ra ralalom ru kim ru TUHAN. Panturung io am pakiasi', “Iou TUHAN Raja', aku am sasambaloi kuno kalo maaya' mangapu ra ngaangai' moonsoi ondo' pinakito Muno raki' ra buoi ti.

¹⁹Kaa' raino binaal Muno nasailan poyo intor ra ngaangai' no, iou TUHAN Raja'. Binantu' Muno intor ra papag kuno paat ra orou matong, am mangiou Kou raki' magilong ra baal raginio, kabalu' pana aku ti ulun ayuk,[16] iou TUHAN Raja'!

²⁰Atan poyo ondo' maalap ku karagu Rirun! Makapandai Kou ra ngaangai' no intor ra ulipon Muti.

²¹Ginio sabap ra bantu' am kasagaan Muno galama', mambaal Kou ra baal mangaayo no koson mangila' ra ulipon Muti.

²²Matulai Kou kaga', iou TUHAN Raja'! Okou kolondo' pogondo'; intor ragili nakapandai akai ra Okou noyo rorondo' i Aki Kapuuno'.

²³Giti ra titikop ru tana' ti, kolondo' bansa' ra bokon koson ra Israil, ondo' binayag Mu noyo intor ra pangulipanan, am niayuk mapasauk risilo ra ulun Muno galama'. Binaal maayo am makaimuag no, ondo' binaal Muno risilo[17] napatulai noyo ra inggalan Muno ra titikop ru tana' ti. Napagiru'[18] Kou ra bansa'-bansa' ra bokon am dewa-dewa nilono paat ra ulun Muno jumalai mangayou, ulun ondo' binayag Muno intor ra Misir koson masauk ra ulun Muno galama'.

²⁴Sinauk Mu Israil ra ulun Muno ra sabuoi-buoi no. Okou, iou TUHAN, nasauk noyo ri Aki Kapuuno' nilo.

²⁵Raino, iou TUHAN i Aki Kapuuno', intopoto' noyo bantu' ondo' rinagu Muno intor ra inan kuno am papag kuno, koson ra sabuoi-buoi no. Suguto' noyo atan ondo' binantu' Muno.

²⁶Inggalan Muno matulai am koson ra sabuoi-buoi no ulun mindagu, ‘TUHAN Ondo' Maayo Kaga' Kuasa' iono i Aki Kapuuno' ru ulun ru Israil!’ Ginio ra tutunon Mu maa' raginio sangulun intor ra papag kuno mamarinta koson ra raja' ru bansa' ragitio koson mantilayun.

²⁷Iou TUHAN Ondo' Maayo Kaga' Kuasa', i Aki Kapuuno' ru ulun ru Israil! Baani aku makiasi' koon raginio sabap ra nambala' Kou raki' ulipon Mutu ra baal ragitio. Nambala' Kou raki' ra anak akupu kuno ra mansusunu' saukon Mu ra raja' ru bansa' ragitio.

²⁸Ginio ra iou TUHAN Raja', Okou noyo i Aki Kapuuno'! Magail Mu intopoton bantu' Muno, am binantu' Mu noyo raki' baal ondo' moonsoi.

²⁹Kitaakon kuno, kasaga' noyo mambarakat ra papag kuno maa' raginio marayus ilo makaliman ra togom Muno ra sabuoi-buoi no. Iou TUHAN Raja', ngaangai' ti binantu' Mu noyo, ginio ra papag kuno mantilayun barakaton Mu ra sabuoi-buoi no.”