Read Timugon Murut 2 SAMUIL 9 Bible Online

2 SAMUIL 9 - Timugon Murut bible

2 SAMUIL 9

¹Paat ra sangarawan pangkuot Raja' Daut, “Mokoondo' kia osoi-osoi intor ra sasambaloi ru Raja' Saul ondo' lakat poyo maayag? Amon ru mokoondo', masaga' aku makibonsoi riso sabap ri Jonatan.”

²Paat raginio mokoondo' sangulun ulipon ru sasambaloi ri Raja' Saul ondo' inggalan no i Jiba. Sinusub io muma' ra Raja' Daut. Pangkuot Raja' Daut riso, “Okou kia i Jiba?” Taam io, “Iou, raja' kuno.”

³Pangkuot poyo Raja' no riso, “Mokoondo' kia osoi-osoi intor ra sasambaloi ru Raja' Saul ondo' lakat poyo maayag, maa' raginio mokopobonsoi aku riso sumugut ra bantu' kuno ri Aki Kapuuno'?” Taam i Jiba, “Lakat poyo mokoondo' sangulun anak ungkuyon ri Jonatan. Io ti kimpo'.”

⁴Pangkuot Raja' Daut, “Ati io?” Taam i Jiba, “Giu' ra Lodibar, giu' ra baloi ri Makgir anak ri Amiil.”

⁵Ginio ra panusub Raja' Daut ra ulun mampiau ra anak ri Jonatan no.

⁶Paat ri Mipibosit anak ri Jonatan, akupu ru Raja' Saul no nakasaboi, kuku' io samba koson mangurumat ra Raja' Daut. Nanguma' Raja' Daut riso, am indagu, “Mipibosit,” am taam io, “Iou, raja' kuno.”

⁷Indagu Raja' Daut riso, “Pai' kalaa'. Mataau aku rirun sabap ri Jonatan, ama' muno. Mangani' aku rirun saguli' ra ngaangai' tana' ondo' ragili linonggom ru aki muli Raja' Saul. Magail kou kimaitin mangakan ra mija' kuno.”

⁸Kuku' samba i Mipibosit igondo' poyo am indagu, “Aku ti koson ayuk ra uku' minatoi. Kua kia koonsoi kou kaga' raki'?”

⁹Kopongo raginio pampiau Raja' Daut ri Jiba, ulipon ru Raja' Saul, am indagu riso, “Nakataak ku noyo ngaangai' longgom ru Raja' Saul am sasambaloi nano ri Mipibosit, akupu ru tuan muli.

¹⁰Okou, anak-anak muno am ulipon-ulipon muno, musiti' kondoyon tana' no tayar ru sasambaloi ru tuan muno, am pangani' ra ampos ru tana' no risilo koson mangukop ra pakuan nilo. Kaa' i Mipibosit magail mangakan ra mija' kuno.” (Mokoondo' i Jiba mopor am limo ngaulun anak ungkuyon am ruo ngoopor ngaulun ulipon.)

¹¹Taam i Jiba, “Suguton ku ngaangai' susuban muno.” Ginio ra i Mipibosit nangakan nagulung ra raja'[22] koson ra sangulun intor ra anak ungkuyon ru Raja' Daut galama'.

¹²I Mipibosit mokoondo' sangulun anak ungkuyon inggalan no i Mika, ondo' lakat poyo mamulok. Ngaangai' ru sasambaloi ri Jiba nasauk ra ulipon ri Mipibosit.

¹³Koon raginio noyo i Mipibosit ondo' kimpo' karuo-ruo kalayam nano minayan ra Jirusalim am magail mangakan ra mija' ru raja'.