Read Timugon Murut 1 RAJA'-RAJA' 1 Bible Online

1 RAJA'-RAJA' 1 - Timugon Murut bible

1 RAJA'-RAJA' 1

¹Raino ti Raja' Daut matutuo noyo kaga'. Kabalu' pana ulipon-ulipon nano mangusib riso ra bajang, lakat io poyo masimuan.

²Ginio ra indagu pagawai-pagawai nano riso, “Iowo' akai no maguyum ra sangulun ralaa koson masimpung rirun am magalung rirun. Rumulug io rirun am mampalasu' ra inan muno.”

³Kopongo raginio naguyum pagawai-pagawai ra sangulun ralaa ondo' mantalur giu' ra titikop ru pagun Israil. Nakatuum ilo ra sangulun ralaa ondo' ininggalanan i Abisag giu' ra Sunim, am inibit io ra raja'.

⁴Mantalur kaga' ralaa no. Mangandoi am magalung io ra raja', kaa' raja' no kalo namparulug riso.

⁵Kopongo i Absalom minatoi, i Adonia, anak ungkuyon ru Raja' Daut am i Gagit, nasauk ra anak ondo' matuuo toojo. I Adonia ti sangulun buayoi ondo' maindon kaga'. Raja' Daut, ama' nano, kalo igondo' sangit ri Adonia kabalu' pana nambaal io ra sala. Gumogot kaga' i Adonia masauk ra raja'. Ginio ra igukop io galama' ra kurita' kuda, pulalai mangkuda, am limo ngoopor ngaulun magalung riso galama'.

⁶

⁷Nansunur i Adonia ri Joab (ina' ri Joab inggalan no i Jiruya) am Imam Abiatar. Karuo-ruo nilo nangiou koson manungka' ri Adonia.

⁸Kaa' Imam Jadok, i Binaya anak ri Joyada, Nabi Natan, i Simii, i Rii, am magalung galama' ru Raja' Daut kalo manungka' ri Adonia.

⁹Paat ra sangarawan nampataak i Adonia ra taak simbalui domba, sapi' gawayan, am anak ru sapi' ondo' molomok. Ngaangai' ru taak simbalui no pinataak giu' ra Batu Kukuo, mamaar ra taur ru timug In-Rogil. Nampiau i Adonia ra anak-anak ungkuyon ru Raja' Daut ra bokon no, am pagawai-pagawai ru raja' intor ra Jiuda mongoi ra bunsag no,

¹⁰kaa' kalo nampiau io ri Salomo boborok pansukapu nano, Nabi Natan, i Binaya, am magalung galama' ru raja'.

¹¹Kopongo raginio Nabi Natan minongoi tuum ri Batsyiba, ina' ri Salomo, am pangkuot riso, “Kalo kia igondo' kou pokorongog ra i Adonia anak ri Gagit, misauk io galama' ra raja'? Kaa' Raja' Daut kalo nakapandai ra baal raginio!

¹²Amon ru masaga' kou mamayag ra painawo muno galama' am painawo ri Salomo, anak ungkuyon muno, rongogo' noyo bilin kutu.

¹³Ongoi no ra mataki' uma' ra Raja' Daut, am kuati' io, ‘Sala' ka kia okou nambantu' ra i Salomo, anak ungkuyon muno malit rirun koson ra raja'? Kua kia raino i Adonia no boo nasauk ra raja'?’ ”

¹⁴Kon poyo ru Nabi Natan, “Tatanga' ra okou mindagu ra Raja' Daut ra maagu no, matong aku am mangiou ra ragu-ragu muno.”

¹⁵Ginio ra uma' i Batsyiba ra raja' giu' ra lamin kaalangan nano. Matutuo noyo kaga' raja' no am i Abisag, ralaa intor ra Sunim no tatanga' magalung riso.

¹⁶Igulatur i Batsyiba ra saang ru raja', am pangkuot raja' no riso, “Atan kia kitaakon muno?”

¹⁷Taam i Batsyiba, “Okou raja' nambantu' noyo ralalom inggalan ru TUHAN, i Aki Kapuuno' muno, ra i Salomo, anak ungkuyon muno malit rirun koson ra raja'.

¹⁸Kaa' raino i Adonia noyo nasauk ra raja', am okou no kalo nakapandai ra baal raginio.

¹⁹Nampataak io noyo ra masuang sapi' gawayan, domba, am anak ru sapi' ondo' molomok koson ra taak simbalui, am niayuk nampiau ra anak-anak ungkuyon muno, Imam Abiatar, am i Joab, panglima saujor muno, mongoi ra bunsag no, kaa' i Adonia no kalo nampiau ri Salomo ti, anak ungkuyon mutu.

²⁰Raino ngaangai' ru mamagun tatanga' maginaa ra ragu muno intor ra osoi ondo' malit rirun koson ra raja'.

²¹Amon ru kalo mamatas kou raginio, maaru' ra okou kakapatoi no, i Salomo, anak ungkuyon muno am aku ti uwin ra manumbalik.”

²²Liliwa' i Batsyiba mindagu, Nabi Natan nakasaboi ra istana.

²³Binalaan Raja' Daut ra ratangan ru Nabi Natan, am umpos Nabi Natan am igulatur ra saang ru raja'.

²⁴Indagu Nabi Natan ra raja', “Nakaindagu kou kia raja' ra i Adonia malit rirun koson ra raja'?

²⁵Paat ra orou raiti' nampataak i Adonia ra masuang sapi' gawayan, domba am anak ru sapi' ondo' kinolomok koson ra taak simbalui. Nampiau io ra ngaangai' ru anak ungkuyon muno, i Joab panglima ru saujor muno[1] am Imam Abiatar. Paat ra raino ti tatanga' ilo rumamai liliwa' gumolok ra, ‘Naayag kou Raja' Adonia!’

²⁶Kaa' kalo nampiau i Adonia raki', Imam Jadok, i Binaya anak ri Joyada am i Salomo.

²⁷Nangiou kou kia ri Adonia mambaal ra ngaangai' no ra kalo nambala' ra pagawai-pagawai muno ra osoi ondo' malit rirun koson ra raja'?”

²⁸Indagu Raja' Daut, “Susubo' kon i Batsyiba mumpos am muma' saguli'.” Umpos i Batsyiba am bigor ra saang ru raja'.

²⁹Kon ru raja' no riso, “Nambantu' aku ralalom inggalan ru TUHAN ondo' naayag no, ondo' namayag raki' intor ra ngaangai' kapaganan,

³⁰ra orou raiti' suguton ku bantu' kuli rirun ralalom inggalan ru TUHAN, i Aki Kapuuno' ru Israil, ra anak ungkuyon muno i Salomo malit raki' koson ra raja'.”

³¹Igulatur i Batsyiba am indagu, “Naayag kou, raja' kuno!”

³²Kopongo raginio pampiau Raja' Daut ri Jadok, i Natan am i Binaya. Paat ra ilo minuma',

³³kon ru Raja' Daut risilo, “Ibito' i Salomo, anak ungkuyon kuno, mongoi ra taur ru timug giu' ra Gigon. Polosoon io mangura' ra baghal kuno am ibito' min pagawai-pagawai ru istana mababaya' ramuyun.

³⁴Giu' no musiti' i Jadok am i Natan mapalantik ri Salomo masauk ra raja' ru Israil. Mopongo raginio musiti' kau manamput ra bujung am gumolok, ‘Naayag Raja' Salomo!’

³⁵Sumbayaa' io sumaguli' ragiti maa' raginio manturung ra kurisi' ru raja' kutu. Malit io raki' koson ra raja' sabap ra io noyo pinili' kuno koson masauk ra panguasa' ra Israil am Jiuda.”

³⁶Taam i Binaya, “Iou, raja' kuno. Gama' ru baal ragitio iniou ru TUHAN, i Aki Kapuuno' muno.

³⁷Koson ra TUHAN nabaya' rirun, gama' ru Io niayuk mabaya' ri Salomo am mampasauk ra pamarintaan nano langkaya' poyo intor ra pamarintaan muno.”

³⁸Kopongo raginio i Jadok, i Natan, i Binaya am ulun magalung galama' ru raja' nangkimait ri Salomo nangura' ra baghal ru Raja' Daut, am namaya' riso mongoi ra taur ru timug giu' ra Gigon.

³⁹Alapo' ri Jadok intok nambulian ra umau jaitun ondo' inibit no intor ra Kim ru TUHAN, am nangumau ri Salomo ra umau no koson mapalantik riso. Nanamput ilo ra bujung am ngaangai' ru ulun giminolok ra, “Naayag Raja' Salomo!”

⁴⁰Kopongo raginio namaya' ilo ra Raja' Salomo siminaguli' ra istana liliwa' giminolok-golok am nanamput ra tulali. Bolos nilono mosongou kaga' saboi tana' ti koson ra lumapak sabap ra gogolos no.

⁴¹I Adonia am ulun-ulun piniau nano bagu nopongo rumamai paat ra ilo nokorongog ra gogolos no. Paat ri Joab nokorongog ra bolos ru bujung no, pangkuot io, “Atan kia nangkinibit ra gogolos giu' ra ralalom ru bandar no?”

⁴²Tatanga' io mindagu, i Jonatan anak ru Imam Abiatar nakasaboi. Indagu i Adonia riso, “Okou ulun moonsoi, maaru' nagibit kou ra tanou moonsoi. Umpos no.”

⁴³Taam i Jonatan, “Aku ti kalo nagibit ra tanou moonsoi. Raja' Daut nampalantik ri Salomo nasauk ra raja'.

⁴⁴Nanusub io ri Jadok, i Natan, i Binaya am ulun magalung galama' ru raja' koson mamaya' ri Salomo. Pinasakoi nilo i Salomo ra baghal ru raja'.

⁴⁵I Jadok am i Natan nampalantik ri Salomo nasauk ra raja' ra inumau ulu nano ra umau, giu' ra taur ru timug Gigon. Kopongo raginio minumpos ilo ra bandar liliwa' gogolos. Ginio noyo gogolos ondo' norongog min ra raitii' ni.

⁴⁶Raino i Salomo ondo' nasauk ra raja'.

⁴⁷Ra niayuk poyo, pagawai-pagawai ru istana minumpos minuma' ra Raja' Daut koson mindagu ra maringkuanang riso. Konilo riso, ‘Gama' ru i Aki Kapuuno' muno mapasauk ra Raja' Salomo no mauligan poyo kaga' intor rirun, am gama' ru langkaya' poyo intor ra pamarintaan muno.’ Kopongo raginio igugulatur Raja' Daut giu' ra intok kaalangan nano koson sumamba ra TUHAN,

⁴⁸liliwa' makiasi', ‘Koompor Kono, iou TUHAN, i Aki Kapuuno' ru Israil. Paat ra orou raiti' nampalantik Kou noyo ra sangulun ra papag kuno masauk ra raja' malit raki'. Nangiou Kono raki' tumainu raginio!’ ”

⁴⁹Kopongo raginio ulun piniau ri Adonia mangalaa'. Bigor ilo am pangiruan ra intok raginio, sigagama' minugar minaya' ra ralan galama'.

⁵⁰Malaa' kaga' i Adonia ra Raja' Salomo saboi minongoi io ra Kim ru TUHAN, am guut ra sangau-sangau ru altar.[2]

⁵¹Binalaan Raja' Salomo ra malaa' i Adonia riso am tatanga' io mampaguut ra sangau-sangau ru altar. Kon ri Adonia, “Kalo mugar aku intor ragiti ra kalo poyo magibot Raja' Salomo ra kalo potoyon no aku.”

⁵²Taam Raja' Salomo, “Amon ru gumagaya' i Adonia no, kalo ukumin io ra sanganu pana. Kaa' amon ru kalo gumagaya' io, maaru' potoyon io.”

⁵³Kopongo raginio panusub Raja' Salomo ra ulun mampatuun ri Adonia intor ra altar no. Ratong i Adonia uma' ra raja' am igulatur ra saang nano. Indagu raja' no riso, “Uli' no.”