Read Timugon Murut 1 RAJA'-RAJA' 12 Bible Online

1 RAJA'-RAJA' 12 - Timugon Murut bible

1 RAJA'-RAJA' 12

¹I Rigabiam minongoi ra Sikgim, sabap ra ngaangai' ru bansa' giu' ra tampilon ralayo natitimung ra giu' no koson mampalantik riso masauk ra raja'.

²Paat ri Jirobiam anak ri Nibat nokorongog ra tanou no, minugar io intor ra Misir.[41] Ragili minongoi i Jirobiam ra Misir sabap ra nagiru' io intor ra Raja' Salomo.

³Bansa'-bansa' giu' ra ralayo nampiau ri Jirobiam, am nababaya' riso minuma' ra Raja' Rigabiam am indagu riso,

⁴“Ama' muli, Raja' Salomo, malaat pinamakuan no ramon am nangani' ra saanin ondo' maagat. Raino amon ru mampamaan kou ra saanin mai am moonsoi pamakuan ramon, masauk akai ra mamagun ondo' gumagaya' rirun.”

⁵Taam Raja' Rigabiam, “Ratong poyo malupus talu ngoorou; mambala' aku ra taaman ra maagu no.” Ginio ra ilo pana minugar.

⁶Nakipinson Raja' Rigabiam intor ra tingganai-tingganai tuu' lair ondo' nangandoi koson ra maminson ra ama' nali. Pangkuot io, “Ati kulaan kinua' pataamon ku ra ulun-ulun raginio? Atan pinson min?”

⁷Taam ilo, “Amon ru masaga' kou mambaal ra moonsoi ra mamagun, iowo' kitaakon nilo, am ilo pana mambaal ra moonsoi am gumagaya' rirun.”

⁸Kaa' Raja' Rigabiam kalo nampalio ra pinson ru tingganai-tingganai tuu' lair no. Lukiat io nangkuot piboo ra ulun mamulok ondo' santuu' riso, am ondo' raino nasauk ra maminson riso.

⁹Indagu io, “Atan kia pinson mino? Atan kia musiti' ku pataamon ra ngaangai' ulun no, ondo' nakimaan raki' ra saanin maagat nilono?”

¹⁰Taam ilo, “Ragui' ilo, ‘Titingkis kuno maayo poyo intor ra awak ru ama' kuno!’[42]

¹¹Ragui' ilo, ‘Ama' kuli nangani' ramuyun ra saanin maagat, kaa' mangani' aku ramuyun ra saanin ondo' maagat poyo. Ama' kuli nampalapos ramuyun ra pitol lalapos, kaa' loposon takamin ra pitol lalapos ondo' makaruui ru basi'!’ ”

¹²Kopongo talu ngoorou no, i Jirobiam am mamagun no riminatong poyo muma' ra Raja' Rigabiam, sumugut ra rinagu nali.

¹³Kalo nampalio raja' no ra pinson ru tingganai-tingganai tuu' lair no. Lukiat io nanugut ra pinson ru ulun mamulok am indagu ra mamagun ra malasang, “Ama' kuli nangani' ramuyun ra saanin ondo' maagat, kaa' mangani' aku ramuyun ra saanin ondo' maagat poyo. Ama' kuli nampalapos ramuyun ra pitol lalapos, kaa' mampalapos aku ramuyun ra pitol lalapos ondo' makaruui ru basi'!”

¹⁵Masaga' TUHAN manugut ra ragu Nano ondo' pinasaboi ri Jirobiam anak ri Nibat ondo' pinabala' galing ra Nabi Agia intor ra Silo. Ginio sabap ra raja' no kalo nampalio ra kitaakon ru mamagun.

¹⁶Paat ra mamagun no nakaliman ra kalo masaga' raja' no mangiou ra kitaakon nilo, golok ilo, “Pai' lioo' Raja' Daut am sasambaloi nano? Kalo igondo' ilo pambaal ra atan-atan ritakau! Ngaangai' ulun ru Israil, ibok kano uli' takau! Polosoon noyo Raja' Rigabiam migalung galama' ra inan nano!” Ginio ra gumuor ulun ru Israil,

¹⁷am i Rigabiam nasauk ra raja' ru mamagun ru wilayah Jiuda ayuk.

¹⁸Kopongo raginio nanusub Raja' Rigabiam ri Adoniram, magalung ra kuli', mongoi ra ulun ru Israil, kaa' nomobol ilo riso saboi minatoi. Ginio ra naringkaagou Raja' Rigabiam nagiru' ra Jirusalim ra nangkurita' kuda.

¹⁹Intor raginio, mamagun giu' ra tampilon ralayo ru pamarintaan ru Israil magail gumuor ra raja'-raja' ru papag ru Raja' Daut.

²⁰Paat ra ulun ru Israil nokorongog ra minuli' noyo i Jirobiam intor ra Misir, nangkimait ilo riso mongoi ra rondo' pantuuman ru mamagun, am nampalantik riso masauk ra raja' ru Israil. Bansa' ru Jiuda ayuk ondo' gumagaya' ra papag ru Raja' Daut.

²¹Paat ra Raja' Rigabiam nakasaboi giu' ra Jirusalim, nanimung io ra 180,000 ngaulun saujor ondo' moonsoi kaga' intor ra bansa' ru Jiuda am Binjamin. Raja' Rigabiam masaga' mangayou koson mapatapuli' ra kuasa' nano ra bansa'-bansa' ru Israil giu' ra tampilon ralayo.

²²Kaa' i Aki Kapuuno' nanusub ra Nabi Simaya

²³mampasaboi ra ragu Nano ra Raja' Rigabiam am ngaangai' bansa' ru Jiuda am Binjamin,

²⁴“Koon raginio ragu ru TUHAN, ‘Pai' bulunsaro' ulun ru Israil, pabukat muno galama'. Uli' kano ngaangai'! Atan ondo' nasauk iono kasagaan Kuno.’ ” Giminagaya' ilo ngaangai' ra susuban ru TUHAN am uli' ra baloi.

²⁵Raja' Jirobiam, raja' ru Israil, nambaal saguli' ra bandar Sikgim giu' ra kabuluran Ipraim am ayan ra giu' no ra buoi. Kopongo raginio nangiruan io intok raginio, am pambaal ra bandar Pinuil.

²⁶Koon nano ralalom ru guang, “Ralalom ru baal ra raino ti, amon ru mamagun kuno mongoi ra Jirusalim koson mampataak ra taak simbalui ra TUHAN giu' ra Baloi ru TUHAN, gagaya' nilono mongoi ra Raja' Rigabiam giu' ra Jiuda, am mamatoi ilo raki'.”

²⁸Kopongo ra nabuoi nangkara', Raja' Jirobiam nambaal ruo sinungkalalaing sapi' gawayan intor ra mas am indagu ra mamagun nano, “Sama' noyo buoi min minongoi sambayang giu' ra Jirusalim. Raino, akau Israil, gitio noyo tuhan-tuhan min ondo' nagibit ramuyun miningkual intor ra Misir!”

²⁹Raja' Jirobiam noposoroi rondo' sinungkalalaing ru sapi' mas giu' ra Bitil am rondo' poyo giu' ra Dan.

³⁰Koon raginio noyo mamagun makatula sabap ra minongoi ilo sambayang giu' ra Bitil am giu' ra Dan.[43]

³¹Nambaal niayuk i Jirobiam ra intok-intok sambayangan giu' ra rasawat ru bulur-bulur, am nampili' ra imam-imam ondo' sala' ka intor ra bansa' ru Liwi.

³²Raja' Jirobiam niayuk namuun ra rondo' pangiantakan ru ugama paat ra orou koopor am limo ra sila' kabalu', koson ra pangiantakan giu' ra Jiuda. Giu' ra rasawat ru altar ra Bitil, nampataak io ra taak ra ngaangai' sinungkalalaing ru sapi' mas ondo' binaal nano. Raja' Jirobiam nampaayan ra imam-imam giu' ra Bitil, iono imam-imam ondo' mangandoi ra intok-intok sambayangan ondo' binaal nano.

³³Paat ra orou koopor am limo ra sila' kabalu', orou ondo' inaru' nano galama', minongoi io ra Bitil koson mampataak ra taak simbalui giu' ra rasawat ru altar, koson mangiantak ra pangiantakan ondo' inaru' nano ra tayar ru ulun ru Israil.