Read Timugon Murut 1 RAJA'-RAJA' 13 Bible Online

1 RAJA'-RAJA' 13 - Timugon Murut bible

1 RAJA'-RAJA' 13

¹Paat raginio mokoondo' sangulun nabi intor ra Jiuda. Sinusub io ru TUHAN koson mongoi ra Bitil. Nabi no nakasaboi ra giu' no paat ra Raja' Jirobiam minigor ra saang ru altar koson mampataak ra taak simbalui.

²Sumugut ra susuban ru TUHAN, golok nabi no ra altar no, “Okou altar, altar, koon raginio noyo ragu ru TUHAN: Sangulun anak ondo' inggalan no ri Josia anakon ralalom ru sasambaloi ru Raja' Daut. Okou altar, giu' ra rasawat muno, manimbalui io ra imam-imam ondo' mangandoi ra intok sambaan ra sinungkalalaing, am ondo' mampataak ra taak simbalui ra rasawat muno. Monolob io ra bungul-bungul ru ulun ra rasawat muno.”

³Rinayus poyo ru nabi no ragu nano, “Mapuut altar ti, am kaau ondo' soroi ra rasawat no malayak. Ginio noyo inono' no ra minindagu TUHAN no ra pinabala' galing raki'.”

⁴Paat ra Raja' Jirobiam nokorongog ra baal raginio, indagu io liliwa' nanulu' ra nabi no, “Rokopo' io!” Paat raginio niayuk longon ru raja' no kiminotog saboi ra kalo mabunduk no saguli'.

⁵Namulali' altar no napuut am kaau no nalayak ra tana', koson ra rinagu ru nabi no ralalom inggalan ru TUHAN.

⁶Indagu Raja' Jirobiam ra nabi no, “Pakiasi' noyo ra TUHAN, i Aki Kapuuno' muno ra bala kuno, am kitaako' noyo maa' raginio mamabas Io ra longon kutu!” Pakiasi' nabi no ra TUHAN, am longon ru raja' no binabas.

⁷Indagu raja' no ra nabi no, “Ibok ongoi akan giu' ra baloi kuno. Mangayup aku rirun ra tangguang ra binaal moonsoi muno.”

⁸Taam nabi no, “Kabalu' pana ra mangani' kou raki' ra sampiruo intor ra rapu' muno, kalo maya' aku rirun, kapoam mangakan manginum mabaya' rirun.

⁹Nanusub TUHAN raki' maa' raginio kalo mangakan kapoam manginum ra atan pana am kalo muli' maya' ra ralan binayaan kuli ra aku minatong ragili.”

¹⁰Koon raginio noyo nabi no kalo minuli' minaya' ra ralan binayaan nano ragili, kaa' minaya' ra ralan ra bokon.

¹¹Paat raginio, mokoondo' sangulun nabi matutuo ondo' minayan ra Bitil. Anak-anak nano[44] minatong nambala' riso ra atan ondo' binaal ru nabi intor ra Jiuda paat ra orou raginio giu' ra Bitil, am atan ondo' rinagu nano ra Raja' Jirobiam.

¹²Pangkuot nabi matutuo no ra anak-anak nano, “Nabi intor ra Jiuda no minaya' ra ati ralan paat io minuli'?” Nanulu' ilo ra ralan ondo' binayaan ru nabi no riso.[45]

¹³Nanusub nabi matutuo no ra anak-anak nano nampabanta' ra palana no ra kaladai nano. Kopongo nilo ginio, nangura' io ra kaladai no

¹⁴am minilou ra nabi intor ra Jiuda no. Kopongo raginio natuum no nabi no tatanga' manturung ra saau ru sampuun tataun makalu. Pangkuot nabi matutuo no riso, “Okou kia nabi intor ra Jiuda?” Taam nabi no, “Iou.”

¹⁵Indagu nabi no, “Ibok no muli' am mangakan mabaya' raki'.”

¹⁶Kaa' taam nabi intor ra Jiuda no, “Kalo makaaya' aku rirun, kapoam mumpos ra baloi muno. Aku ti kalo makainum kapoam makaakan ra atan-atan ragiti.

¹⁷Nanginggalar TUHAN no raki' mangakan kapoam manginum ra atan-atan pana, am nanginggalar raki' muli' maya' ra ralan binayaan ku minatong ragili.”

¹⁸Indagu boo nabi matutuo intor ra Bitil no riso, “Aku pana sangulun nabi koson rirun. Sumugut ra susuban ru TUHAN, rondo' malaikat nanusub raki' magibit rirun muli' am mampaakan rirun giu' ra baloi kuno.” Sotopot no nabi matutuo no nagabau.

¹⁹Ginio ra nabi intor ra Jiuda no minaya' riso minuli' am nangakan nabaya' riso.

²⁰Tatanga' ra ilo mangakan, indagu TUHAN no ra nabi matutuo no,

²¹am posoboyo' no ra ragu raginio ra nabi intor ra Jiuda no, “Minindagu TUHAN ra kalo gumagaya' kou Riso, am ra kalo nambaal kou ra susuban Nano.

²²Tumbalik no, okou minuli' am nangakan giu' ra intok ondo' nanginggalaran Nano. Ginio ra potoyon kou, am baangkai muno lobongon giu' ra kalabangan ru sasambaloi muno.”

²³Kopongo nangakan, nabi matutuo no napabanta' ra palana ru kaladai no ra bala ru nabi intor ra Jiuda,

²⁴am nabi no pana minugar. Giu' ra tanga' ru ralan, sanginan singa' nansaam riso am namatoi riso. Baangkai nano nokoloso ra tanga' ru ralan, liliwa' kaladai am singa' no minigor ra kiing nano.

²⁵Kukula' ngaulun ondo' nansail ra giu' no nakakito ra baangkai no am singa' ondo' minigor ra kiing nano. Minongoi ilo ra Bitil am nambala' ra baal raginio.

²⁶Pakaining nabi matutuo no raginio, indagu io, “Ginio nabi ondo' kalo gumagaya' ra susuban ru TUHAN! Ginio ra nangator TUHAN ra sanginan singa' koson mansaam am mamatoi riso, koson ondo' rinagu ru TUHAN.”

²⁷Kopongo raginio indagu io ra anak-anak nano, “Pabantaa' palana ru kaladai kuno.” Ilo pana nambaal raginio.

²⁸Nangura' io ra kaladai nano am ugar. Natuum no baangkai ru nabi no nakalangan ra tanga' ru ralan, am kaladai am niayuk singa' minigor ra kiing nano. Singa' no kalo nangakan ra baangkai no kapoam nansaam ra kaladai no.

²⁹Nabi matutuo no nangkayang ra baangkai no, posokoyo' no ra kaladai nano, am ibito' no minuli' ra Bitil. Nanulaboi io riso am linobong no giu' ra kalabangan ru sasambaloi nano galama'. Io am anak-anak nano nanulaboi riso am indagu, “Alii boo rirun, pabukat kuno, pabukat kuno!”

³¹Kopongo raginio indagu nabi no ra anak-anak nano, “Paat ra aku matoi, makilobong aku ra kalabangan ragitio, am pabantaan baangkai kuno ra sapapa' ru baangkai nano.

³²Ragu ru TUHAN ondo' pinasaboi nano ra altar giu' ra Bitil no am ngaangai' intok sambayangan giu' ra bandar-bandar ru Samaria maaru' masauk.”

³³Raja' Jirobiam, giu' ra Israil lakat poyo kalo timinalikur ra binaal nano ra malaat. Nampili' io ra imam intor ra sasambaloi sala' ka Liwi koson mangandoi ra altar-altar ondo' binaal nano. Nampalantik io ra osoi ayuk ondo' masaga' sumauk ra imam.

³⁴Tula ru raja' ti nagibit ra karatuan am kapusaan ru pamarintaan ru papag nano.