Read Timugon Murut 1 RAJA'-RAJA' 14 Bible Online

1 RAJA'-RAJA' 14 - Timugon Murut bible

1 RAJA'-RAJA' 14

¹Paat raginio, i Abia, anak ungkuyon ru Raja' Jirobiam marualan.

²Indagu Raja' Jirobiam ra andu' nano, “Salu no maa' raginio kolondo' osoi pana makaulig rirun. Ongoi no ra Silo, intok inayanan ri Agia, nabi ondo' nanala' ra masauk aku ra raja' ru Israil.

³Ibiti' io ra mopor ruti', am sambutul ruu' ru maingot. Kuati' io ra atan ondo' masauk ra anak tati. Mambala' io rirun.”

⁴Ongoi boo andu' ru Raja' Jirobiam ra baloi ri Agia giu' ra Silo. I Agia kalo boo makakito sabap ra matutuo noyo kaga'.

⁵Nambala' TUHAN ri Agia ra andu' ru Raja' Jirobiam matong mangkuot riso intor ra anak nano ondo' marualan. Nambala' noyo TUHAN no riso ra atan ondo' musiti' raguon nano. Paat ra andu' ru Raja' Jirobiam no nakasaboi, mitambingai io masauk ra ulun ra bokon.

⁶Kaa' paat ri Agia nokorongog ra matong io giu' ra kulobon, indagu i Agia, “Umpos no. Nakapandai aku ra okou no andu' ru Raja' Jirobiam. Kua mitambingai masauk ra ulun ra bokon? Mokoondo' aku ra tanou malaat rirun.

⁷Ongoi noyo balai' Raja' Jirobiam ra koon raginio ragu ru TUHAN, i Aki Kapuuno' ru Israil riso, ‘Nampili' Aku rirun intor ra gino ngai' ru mamagun, am mampasauk Aku rirun ra raja' ru ulun Kuno Israil.

⁸Mangalap Aku ra pamarintaan ri Daut intor ra papag nano am pataakin rirun. Kaa' okou kalo koson ra ulipon kuli i Daut. Gumagaya' io Raki' am gumagaya' Io ra susuban Kuno. Binaal no ayuk atan ondo' kasagaan Kuno.

⁹Tula muno maayo poyo intor ra ulun ondo' namarinta nakapagulu intor rirun. Nangimpai kou Raki'. Napatabual kou ra sangit Kuno paat ra okou nambaal ra sinungkalalaing sambaan am sinungkalalaing intor ra basi'.

¹⁰Ginio sabap ra mamparatong Aku ra karaat ra papag muno. Mamatoi Aku ra ngaangai' ru papag muno ondo' ungkuyon, ondo' mamulok am niayuk ondo' matutuo. Liomon Ku sasambaloi muno. Saliiron ilo koson magalus ra majamol.

¹¹Ngaangai' ulun ru sasambaloi muno ondo' matoi giu' ra ralalom ru bandar akanon ru uku', am ondo' matoi giu' ra padang akanon ru susuit. Aku, TUHAN nakaindagu noyo.’ ”

¹²Rinayus poyo ri Agia ragu-ragu nano ra andu' ru Raja' Jirobiam, “Raino, uli' no. Makasubol kou ayuk ra bandar, matoi anak ungkuyon muno.

¹³Ngaangai' ulun ru Israil mangulir am mompolobong ra anak ungkuyon ru raja' no. Anak ungkuyon raginio rorondo' ra sasambaloi ru Raja' Jirobiam ondo' lobongon ra matanda', sabap ra io no ayuk ondo' kaansayin ru TUHAN, i Aki Kapuuno' ru Israil.

¹⁴Lantikon ru TUHAN sangulun raja' ra tayar ru Israil, am raja' raginio mamupus ra pamarintaan ru sasambaloi ru Raja' Jirobiam, tumalimpuun raino niayuk.

¹⁵Ukumin ru TUHAN ulun ru Israil saboi ra ilo sauyog-uyog koson ra galaga giu' ra ralalom ru timug. Bubulon ru TUHAN ulun ru Israil intor ra tana' ondo' moonsoi ti, ondo' tinaakan No ra kinamatuaan nilai. Pantabuliason No ilo giu' ra sandaup ru Sungoi Iprat, sabap ra napatabual ilo ra sangit Nano paat ra ilo nambaal ra sinungkalalaing Dewi Asyira.

¹⁶Mangiruan TUHAN ra Israil, sabap ra makatula noyo Raja' Jirobiam am nangkinibit ra ulun ru Israil makatula.”

¹⁷Kopongo raginio siminaguli' andu' ru Raja' Jirobiam ra Tirja. Topot ra pakasubol ayuk andu' ru raja' no ra baloi nano, patoi anak ru raja' no.

¹⁸Ulun ru Israil nangulir am nompolobong ra anak ru raja' no koson ra ragu ru TUHAN ondo' pinabala' ru ulipon Nano, Nabi Agia.

¹⁹Ngaangai' binaal ru Raja' Jirobiam, pangayawan ondo' namanangan nano am pamarintaan nano, tinulisan ralalom ru buuk Sejarah ru Raja'-Raja' ru Israil.

²⁰Raja' Jirobiam namarinta koson ra raja' buoi ruo ngoopor am ruo ngambilor. Kopongo ra io minatoi am linobong, i Nadab, anak ungkuyon nano, minalit riso koson ra raja'.

²¹Raja' Rigabiam anak ungkuyon ru Raja' Salomo makaumur apat ngoopor am saa' paat ra io nasauk ra raja' ru Jiuda. Raja' Rigabiam namarinta buoi mopor am tulu' ngambilor giu' ra Jirusalim, bandar ondo' pinili' ru TUHAN intor ra titikop intok ra Israil koson ra intok sambayangan Riso. Ina' ru Raja' Rigabiam iono i Naama, sangulun ruandu' ru Amon.

²²Mamagun ru Jiuda makatula ra TUHAN. Binaal nilono napatabual poyo ra sangit ru TUHAN intor ra ngaangai' binaal ru kinamatuaan nilai.

²³Nambaal ilo ra intok-intok sambaan ra dewa am nampatirong ra lugu'-lugu' ru sinungkalalaing sambaan am tatandu'-tatandu' ru Dewi Asyira koson sambaan giu' ra bulur-bulur am ra saau ru puun-puun tataun makalu.

²⁴Giu' ra intok-intok no nambaal ilo ra mantalan ra inan koson sumamba ra dewa. Mokoondo' poyo ungkuyon am ruandu' ondo' mangandoi ra intok-intok raginio koson ra mantalan ra inan. Mamagun ru Jiuda nambaal ra baal makauyuyu' ondo' binaal ru bansa'-bansa' ondo' pinagiru' ru TUHAN ragili, paat ra ulun ru Israil mayan ra pagun no.

²⁵Paat ra bilor kalimo ru pamarintaan ru Raja' Rigabiam, Raja' Sisak intor ra Misir namulunsar ra Jirusalim.

²⁶Nampagaau Raja' Sisak ra ngaangai' rapu' giu' ra Baloi ru TUHAN am giu' ra istana, nakaaya' perisai-perisai mas ondo' binaal ru Raja' Salomo.

²⁷Koson ra palit ru perisai-perisai mas no, nambaal Raja' Rigabiam ra perisai-perisai gangsa'. Pinalansan ru raja' no ngaangai' raginio ra pagawai-pagawai ondo' magalung ra kulobon-kulobon garabang ru istana.

²⁸Moonong raja' no sumubol ra Baloi ru TUHAN, ulun-ulun magagalung mangakat ra perisai-perisai no, am malupus raginio, pasagulion nilo ngaangai' no ra lamin ru ulun magagalung.

²⁹Ngaangai' binaal ru Raja' Rigabiam tinulisan ralalom ru buuk Sejarah ru Raja'-Raja' Jiuda.

³⁰Raja' Rigabiam am Raja' Jirobiam magail mangayou buoi ru pamarintaan ru Raja' Rigabiam.

³¹Raja' Rigabiam minatoi am linobong giu' ra kalabangan ru raja' giu' ra bandar Daut, am i Abiam anak ungkuyon nano, minalit riso koson ra raja'.