Read Timugon Murut 1 RAJA'-RAJA' 15 Bible Online

1 RAJA'-RAJA' 15 - Timugon Murut bible

1 RAJA'-RAJA' 15

¹Paat ra bilor ru koopor am balu' ru pamarintaan ru Raja' Jirobiam giu' ra Israil, i Abiam nasauk ra raja' giu' ra Jiuda.

²Talu ngambilor buoi ru Raja' Abiam namarinta ra Jirusalim. Ina' nano i Maakga papag ru Abisalom.

³Koson ra ama' nali, Raja' Abiam niayuk makatula am kalo giminagaya' ra TUHAN, i Aki Kapuuno' nano. Io kalo koson ra Raja' Daut, kinamatuaan nali.

⁴Kaa' sabap ri Raja' Daut, TUHAN, i Aki Kapuuno' nano nanaak ra Raja' Abiam no ra sangulun anak ungkuyon ondo' namarinta giu' ra Jirusalim nalupus Raja' Abiam, am koson mapaikang ra bandar no.

⁵Binaal ru TUHAN ginio sabap ra Raja' Daut napabansuk ra guang Nano. Kalo igondo' Raja' Daut no anggal ra susuban ru TUHAN, ondo' ayuk am ralalom ru baal ri Uria, ulun ru Git no.

⁶Buoi ru Raja' Abiam naayag, pansangaran ondo' timinalimpuun ra Raja' Rigabiam am Raja' Jirobiam lakat poyo nasauk.

⁷Ngaangai' binaal ru Raja' Abiam tinulisan ra ralalom ru buuk Sejarah ru Raja'-Raja' Jiuda.

⁸Raja' Abiam minatoi am linobong giu' ra Bandar Daut. I Asa, anak ungkuyon ru Raja' Abiam, namalit riso koson ra raja'.

⁹Paat ra bilor karuo ngoopor ru pamarintaan ru Raja' Jirobiam giu' ra Israil, i Asa nasauk ra raja' ru Jiuda,

¹⁰am namarinta buoi apat ngoopor am rondo' ngambilor giu' ra Jirusalim. Aru' nano i Maakga papag ri Abisalom.

¹¹Raja' Asa nambaal ra baal-baal ondo' iniou ru TUHAN, koson ra binaal ru Raja' Daut, kinamatuaan nano.

¹²Ngaangai' ru ulun mantalan ra inan ungkuyon am ruandu' ondo' nangandoi giu' ra intok-intok sambaan ra dewa pinaingkual ra pagun; io niayuk nangimpai ra ngaangai' sinungkalalaing sambaan ondo' binaal ru raja'-raja' nakapagulu intor riso.

¹³Nangimpai Raja' Asa ra aru' nano, i Maakga, intor ra intok nano koson ra ina' ru raja' ruandu', sabap ra nambaal i Maakga rondo' sinungkalalaing makauyuyu', Dewi Asyira, sinungkalalaing sambaan ondo' makatatandu' ra kalabungan. Raja' Asa napalunsai ra sinungkalalaing sambaan raginio am sinolob no giu' ra Limayak Kidron.

¹⁴Kabalu' pana Raja' Asa kalo namuso ra ngaangai' intok sambaan ra sinungkalalaing, kaa' giminagaya' io ra TUHAN ayuk buoi ru bayag nano.

¹⁵Pinabanta' no ngaangai' kuliamos ondo' patimpokon ru ama' nano ri Aki Kapuuno' giu' ra ralalom ru Baloi ru TUHAN, koon niayuk ra kuliamos mas am pirok ondo' pinatimpok nano galama'.

¹⁶Raja' Asa giu' ra Jiuda am Raja' Baisa giu' ra Israil magail mangayou buoi ru pamarintaan nilo.

¹⁷Namulunsar Raja' Baisa ra Jiuda am tumalimpuun mangikang ra bandar Rama koson mongompong ra ralan mingkual sumubol ra Jiuda.

¹⁸Ginio ra Raja' Asa nangalap ra ngaangai' pirok am mas ondo' lakat poyo soroi giu' ra Baloi ru TUHAN am giu' ra istana, am pinaumbaya' ra kukula' ngaulun pagawai nano, Raja' Asa nangator ra ngaangai' no giu' ra Damsyik, pinoongoi ra Raja' Bingadad giu' ra Siria. Raja' Bingadad akupu ri Tabrimon am akupu ri Gijion. Raja' Asa nangator ra ngaangai' no nabaya' ra bilin ragitio,

¹⁹“Ibok pakimabukat takano koson ra binaal ru ama' takali ragili. Mas am pirok ti tangguang rirun. Ukato' pabukatan muno ra Raja' Baisa giu' ra Israil, maa' raginio majajalan raja' ru Israil no mampalugut saguli' ra saujor nano intor ra wilayah kuno.”

²⁰Raja' Bingadad nangiou ra inatangan ru Raja' Asa, am nangator ra panglima-panglima nano am saujor nano koson mamulunsar ra bandar-bandar ru Israil. Nampagaau ilo ra Iyon, Dan, Abil-Bit-Maakga, Kinirot mamaar ra Tasik Galilia am ngaangai' ru wilayah Naptali.

²¹Pokorongog Raja' Baisa ra baal raginio, longgo' io nangikang ra Rama, am ongoi ra Tirja.

²²Kopongo raginio minindagu Raja' Asa ra ngaangai' mamagun ru Jiuda am nanusub ra moonong mamagun, kolondo' matatang, maa' raginio magaut ra batu am balak ondo' pakayon ru Raja' Baisa koson mangikang ra bandar Rama. Kuliamos-kuliamos raginio noyo nangikang Raja' Asa ra bandar Mijpa am Giba, rondo' bandar giu' ra wilayah Binjamin.

²³Ngaangai' binaal ru Raja' Asa, kinapanggol nano mantula' am bandar-bandar ondo' inikang nano, tinulisan ralalom ru buuk Sejarah ru Raja'-Raja' Jiuda. Kaa' paat ra io matutuo, kalayam nano natiu' ra maruol malanjag.

²⁴Raja' Asa minatoi am linobong giu' ra kalabangan ru raja' giu' ra Bandar Daut. Kopongo raginio i Josapat, anak ungkuyon nano minalit riso koson ra raja'.

²⁵Paat ra bilor karuo ru pamarintaan ru Raja' Asa giu' ra Jiuda, i Nadab anak ungkuyon ru Raja' Jirobiam nasauk ra raja' ru Israil. Ruo ngambilor buoi ru Raja' Nadab namarinta ra Israil.

²⁶Koson ra ama' nali ragili, Raja' Nadab pana makatula ra TUHAN, am nangkinibit ra Israil makatula.

²⁷I Baisa anak ri Agia intor ra bansa' Isakar nakimaguum koson manggal ra Raja' Nadab, am namatoi riso. Paat raginio, Raja' Nadab am saujor nano tatanga' nangawang ra bandar Gibiton giu' ra pagun ru ulun ru Palistin.

²⁸Kasaukan ragitio nasauk paat ra bilor katalu ru pamarintaan ru Raja' Asa giu' ra Jiuda. I Baisa pana namalit ra Raja' Nadab koson raja' ru Israil.

²⁹Kasauk ayuk i Baisa ra raja', tumalimpuun io mamatoi ra ngaangai' ulun ru sasambaloi ru Raja' Jirobiam. Koson ra ondo' rinagu ru TUHAN ondo' pinabala' galing ra ulipon Nano, Nabi Agia intor ra Silo, ngaangai' ru sasambaloi ru Raja' Jirobiam pinatoi; kolondo' sangulun pana pinoloso naayag.

³⁰Baal raginio nasauk sabap ra Raja' Jirobiam napaingkual ra sangit ru TUHAN, i Aki Kapuuno' ru Israil; Raja' Jirobiam makatula noyo, am io niayuk nangkinibit ra ulun ru Israil makatula.

³¹Ngaangai' binaal ru Raja' Nadab tinulisan ra ralalom ru buuk Sejarah ru Raja'-Raja' ru Israil.

³²Raja' Asa giu' ra Jiuda am Raja' Baisa giu' ra Israil magail mangayou buoi ru pamarintaan nilo.

³³Paat ra bilor katalu ru pamarintaan ru Raja' Asa giu' ra Jiuda, Raja' Baisa anak ri Agia nasauk ra raja' ra titikop ru Israil. Ruo ngoopor ngambilor buoi ru Raja' Baisa namarinta giu' ra Tirja.

³⁴Koson ra Raja' Jirobiam ragili, Raja' Baisa pana makatula ra TUHAN, am nangkinibit ra ulun ru Israil makatula.