Read Timugon Murut 1 RAJA'-RAJA' 17 Bible Online

1 RAJA'-RAJA' 17 - Timugon Murut bible

1 RAJA'-RAJA' 17

¹Sangulun nabi ondo' inggalan nano i Ilia intor ra Tisbi giu' ra Giliad mindagu ra Raja' Agab, “Ralalom inggalan ru TUHAN ondo' maayag, i Aki Kapuuno' ru Israil ondo' sambaan kuno, mambala' aku rirun ra buoi ru ruo kapoam talu ngambilor kolondo' bolobou kapoam rasam saboi ra aku mindagu ra mokoondo' ra rasam.”

²TUHAN pana mindagu boo ri Ilia,

³“Iruani' intok ragitio am ongoi no ra tampilon ra sirangon. Pansibuni no mamaar ra sungoi boborok Kirit, giu' ra tampilon sirangon ru Sungoi Jordan.

⁴Makainum kou intor ra sungoi boborok no, am manusub aku ra susuit bangkaak magibit rirun ra akanon ra giu' no.”

⁵Ginagaya' ri Ilia susuban ru TUHAN no. Ongoi io ayan ra kiing ru sungoi boborok Kirit.

⁶Manginum io intor ra sungoi boborok no, am susuit bangkaak magibit ra ruti' am kual riso ra moonong susuab ti am mai' ti.

⁷Kalo nabuoi raginio, sungoi boborok no nalasak sabap ra kolondo' rasam.

⁸TUHAN pana mindagu boo ri Ilia,

⁹“Ongoi no ra bandar Sarpat mamaar ra Sidon, am ayan no ra giu' no. Nanusub aku noyo ra sangulun ruandu' napuor ondo' namagun ra giu' no koson mangani' rirun ra akanon.”

¹⁰I Ilia pana minongoi ra Sarpat. Pakasaboi io ra kulobon garabang ru bandar no, nakito no sangulun ruandu' napuor tatanga' manimung ra luton. Indagu i Ilia riso, “Makitaak aku ra timug inumon.”

¹¹Paat ra ruandu' napuor no mongoi pangalap ra timug, indagu poyo i Ilia, “am makitaak aku ra ruti' niayuk.”

¹²Taam ruandu' napuor no, “Ralalom inggalan ru TUHAN ondo' maayag, i Aki Kapuuno' ondo' sambaan muno, magibot aku ra kolondo' ruti' kuno. Soroi ayuk raki' sogonggom tapung ralalom ru mangkuk am sanganu umau jaitun ralalom ru butul. Tatanga' aku manimung sanganu luton koson ibiton muli' maa' raginio makapangansak aku ra akanon kuno am anak kuno. Ginio noyo akanon mai ondo' pupus; malupus raginio mangkuliman akai ra matoi ayuk.”

¹³Kon ri Ilia riso, “Pai' kaimamang. Ongoi no pangatang ra akanon muno. Kaa' kalo poyo raginio, pagulu baalo' ruti' boborok intor ra tapung am umau no am atari' raki'. Mopongo raginio baalo' ruti' no koson akanon min magina',

¹⁴sabap ra koon raginio ragu ru TUHAN, i Aki Kapuuno' ru Israil, ‘Tapung ralalom ru mangkuk no kalo makai' am umau ralalom ru butul no kalo maawai saboi ra paat Kuno, TUHAN, mampatuun ra rasam.’ ”

¹⁵Ruandu' napuor no minugar am nambaal ra atan ondo' nanusuban ri Ilia. Ilo talu ngaulun naukapan ra akanon ra orou ka orou buoi no.

¹⁶Tapung ralalom ru mangkuk no kalo makai'-kai', am umau ralalom ru butul no kalo maawai sumugut ra ragu ru TUHAN ondo' pinabala' galing ri Ilia.

¹⁷Kalo nabuoi raginio, karuali' anak ungkuyon ru ruandu' napuor no. Liminanjag maruol nano, am pupus no minatoi io.

¹⁸Indagu ruandu' napuor no ri Ilia, “Okou ulipon ri Aki Kapuuno', kua kia baalo' mu baal ragitio raki'? Ginio kia ra okou minatong ti koson mampakara' ri Aki Kapuuno' ra tula kuno, am mangkinibit ra patayan ru anak kuno?”

¹⁹Kon ri Ilia, “Ibito' anak no raki'.” Alapo' ri Ilia anak no intor ra ina' nano, am ibito' no anak raginio ra intok ra rasawat, giu' ra lamin ondo' nambalangan ri Ilia. Paluyaa' no anak raginio ra rasawat ru papangkau.

²⁰I Ilia pana pakiasi' boo ra bolos mosongou, “Iou TUHAN, i Aki Kapuuno' kuno, kua kia baalo' Mu baal ra masaran ti ra ruandu' napuor no? Pinaayan no aku, kaa' pinatoi Mu anak nati!”

²¹I Ilia pana nampakubu ra inan nano ra rasawat ru anak no intalu liliwa' makiasi', “Iou TUHAN, i Aki Kapuuno' kuno, bayago' saguli' anak ragitio!”

²²Nangiou TUHAN ra pakiasian ri Ilia. Anak no tumalimpuun maminawo saguli', am naayag saguli'.

²³Ibito' ri Ilia anak no timinuun ra ragana', am pataako' ra ina' nano. Kon ri Ilia, “Ilai' kon, anak mutu naayag saguli'!”

²⁴Kon ru ruandu' napuor no, “Raino bagu aku makapandai ra okou ti sangulun ulipon ri Aki Kapuuno' am ra TUHAN topot-topot minindagu pinabala' galing rirun.”