Read Timugon Murut 1 RAJA'-RAJA' 18 Bible Online

1 RAJA'-RAJA' 18 - Timugon Murut bible

1 RAJA'-RAJA' 18

¹Kalo nabuoi raginio, paat ra bilor katalu ru tampio no, indagu TUHAN ri Ilia, “Ongoi no uma' ra Raja' Agab sabap ra mampatuun Aku ra rasam.”

²I Ilia pana minugar. Bitilan giu' ra Samaria paat raginio ra najanjayan kaga',

³ginio ra pampiau Raja' Agab ri Obaja, manalingapu ra istana nano. (I Obaja no sangulun ondo' topot-topot sumambayang ra TUHAN.

⁴Paat ri Ijibil namatoi ra nabi-nabi ru TUHAN, binuni ri Obaja maatus ngaulun nabi giu' ra ralalom ru luang batu. Tinayar no ilo ra ruo ngampulalai, limo ngoopor ngaulun sampulalai. Nangani' io risilo ra akanon am inumon.)

⁵Indagu Raja' Agab no ri Obaja, “Ongoi takau ilai'[46] moonong taur ru timug am lonor ru sungoi ra pagun ti. Maaru' lair mokoowot takau ra sakot koson mamayag ra kuda am baghal, maa' raginio kalo pana boo mamatoi ra sanginan pana intor ra bibiag takau.”

⁶Inaru' nilo libung ondo' ongoyon ru sigagama', am ugar ilo nantuliar ra tingkuangan.

⁷Giu' ra tanga' ralan, nakatuum i Obaja' ri Ilia. Nakaulig io ri Ilia am igulatur ra saang nano, am pangkuot, “Topot kia okou ti, i Ilia?”

⁸Taam i Ilia, “Topot, aku ti Ilia. Ongoi balai' raja' muno ra soroi aku ragiti.”

⁹Taam i Obaja, “Atan kia kasalaan kutu saboi okou mapakinuo ra painawo kuno am makipatoi aku ra Raja' Agab?

¹⁰Ralalom inggalan ru TUHAN ondo' maayag, i Aki Kapuuno' muno, magibot aku ra naguyum noyo raja' no rirun giu' ra moonong pagun ra tana' ti. Paat ra panguasa' intor ra rorondo' pagun mambala' ra kalio kou ra pagun nano, kitaakon ru Raja' Agab maa' raginio magibot panguasa' no ra kalio kou natuum ra pagun nano.

¹¹Raino masaga' kou raki' mongoi pambala' riso ra soroi kou ragiti.

¹²Ati kulaan amon ru Ambiluo ru TUHAN magibit rirun mongoi ra intok ra bokon ondo' kalo mapandayan ru ulun, ra kakaugar ku ayuk mangiruan ra intok ragitio? Paat ra aku mambala' ra raja' ra soroi kou ragiti am raja' no kalo makauyum rirun, mamatoi io raki'. Karaa' noyo, topot-topot aku sumambayang ra TUHAN intor ra aku lakat poyo mamulok.

¹³Kalo kia nakapandai kou ra paat ri Ijibil namatoi ra nabi-nabi ru TUHAN, nambuni aku ra maatus ngaulun nabi giu' ra ralalom ru luang batu? Tinayar ku ilo ra ruo ngampulalai, limo ngoopor ngaulun sampulalai. Aku pana nangani' risilo ra akanon am inumon.

¹⁴Kua kia panusub kou raki' mambala' ra raja' no ra soroi kou ragiti? Maaru' potoyon aku ru raja' no!”

¹⁵Taam i Ilia, “Ralalom inggalan ru TUHAN ondo' maayag, Ondo' Maayo Kaga' Kuasa', ondo' sambaan kuno, mambantu' aku mongoi uma' ra raja' ra orou raiti' niayuk.”

¹⁶Ginio ra ongoi i Obaja pambala' ra raja', am raja' pana minongoi tuum ri Ilia.

¹⁷Paat ra Raja' Agab nakakito ri Ilia, indagu Raja' Agab, “Gitio gili, i jumajou giu' ra Israil!”

¹⁸Taam i Ilia, “Aku ti sala' ka i jumajou. Okou raja' am sasambaloi muno ia jumajou no. Kalo nampagagaya' kou ra susuban ru TUHAN am sinamba mu sinungkalalaing Baal.

¹⁹Raino susubo' noyo ngaangai' ulun ru Israil koson tumuum raki' giu' ra Gunung Karmil. Ibito' apat ngaatus ngaulun nabi ru Baal am apat ngaatus ngaulun nabi ru Dewi Asyira ondo' tinampilanan ru Raja' Ruandu' Ijibil.”

²⁰Raja' Agab pana nanusub boo ra ngaangai' ru ulun ru Israil am nabi ru Baal tumimung giu' ra Gunung Karmil.

²¹Tingkuang i Ilia ra ulun-ulun no am indagu, “Saboi sanggilan kia magulayun karuoon min guang? Amon ru TUHAN no i Aki Kapuuno', sambaa' noyo TUHAN; kaa' amon ru Baal no i Aki Kapuuno', sambaa' noyo Baal!” Kaa' ulun-ulun no kalo naguta'.

²²I Ilia pana mindagu, “Nabi ru TUHAN soroi aku ayuk sangulun, sotopot no nabi ru Baal mokoondo' apat ngaatus am limo ngoopor ngaulun.

²³Ibito' ruo ngainan sapi' gawayan; polosoon nabi-nabi ru Baal mangalap sanginan, manimbalui raginio, puputulon ginio, am patampakon ra luton, kaa' pai' paangi' apui. Aku niayuk mambaal koon raginio ra sapi' gawayan ondo' sanginan poyo.

²⁴Polosoon noyo nabi-nabi Baal makiasi' ra dewa nilo, am aku makiasi' ra TUHAN. Ondo' tumaam am mangator ra apui, Io noyo i Aki Kapuuno'.” Nabaya' ra bolos ondo' mosongou ngaangai' ru mamagun giminolok ra mangiou ilo.

²⁵Kopongo raginio indagu i Ilia ra nabi-nabi ru Baal, “Sabap ra masuang kau, polosoon akau galing momongo ra sapi' gawayan no. Pakiasi' no ra dewa mino, kaa' pai' paangi' apui ra tataun no.”

²⁶Alapo' nilo sanginan sapi' gawayan ondo' tinaakan risilo no, pomongo ilo ginio, am pakiasi' ra Baal saboi tanga' ru orou. Pampiau ilo, “Iou Baal, taam no ramon!” Binaal nilo koon raginio liliwa' saligo'-ligo' giu' ra liput ru altar ondo' binaal no, kaa' kolondo' taam.

²⁷Paat ra tanga' ru orou, tumalimpuun i Ilia magasab-gasab risilo, kono, “Pakiasi' ra mosongou poyo! Baal tuhan alia ginio! Maaru' lair tatanga' io magilampuang kapoam minongoi ra jamban. Maaru' lair niayuk tatanga' io minongoi ra intok ra bokon! Kapoam maaru' lair niayuk tatanga' io nombolong, am musiti' kau mangkarat riso!”

²⁸Ginio ra nabi-nabi ru Baal no nakiasi' ra mosongou poyo. Namilat ilo niayuk ra inan ra ilang am tutura' sumugut ra kaulayan nilo, saboi raraa' miningkual.

²⁹Narayus ilo napaugar raginio saboi namayian kaga', kaa' kolondo' tumaam, am kolondo' bolos morongog.

³⁰I Ilia pana mindagu boo ra ngaangai' ulun ra giu' no, “Ibok inggaar kau raki'.” Ilo pana timinimung ra liput nano. Tumalimpuun i Ilia mamuna' ra altar ru TUHAN ondo' nalunsai no.

³¹Pangalap io ra mopor am ruo batu, moonong rondo' manguakil ra rondo' ra bansa' intor ra mopor am ruo bansa' ru papag ri Jakub, iono ulun ondo' ininggalanan ri Israil ru TUHAN.

³²Ra batu-batu raginio, i Ilia nambaal saguli' ra altar intok sambayangan ra TUHAN. Giu' ra liliut ru altar no nangkali i Ilia ra parit ondo' makapanuang ra timug suang mopor am limo ngalito.

³³Io pana napatampak boo ra luton giu' ra rasawat ru altar, namumutul ra sapi' gawayan no am patampako' ginio ra rasawat ru luton no. Kon ri Ilia, “Totopo' apat ngampuun rarapu' no ra timug, am pasasaro' timug no ra rasawat ru taak simbalui no am tataun no.” Binaal nilo nanusuban no.

³⁴Kon ri Ilia, “Baalo' poyo.” Binaal nilo poyo. Kon ri Ilia, “Baalo' igondo' poyo.” Ilo pana nambaal igondo' poyo,

³⁵saboi timug no tumilis giu' ra liput ru altar no am parit nano napanu' ra timug.

³⁶Paat ra mapataak ra taak simbalui ru mamai', inggaari' ru Nabi Ilia altar no am pakiasi', “Iou TUHAN, i Aki Kapuuno' ri Abragam, i Isak am i Jakub, raino painonoo' ra Okou i Aki Kapuuno' ru Israil am ra aku ti ulipon Muno. Painonoo' niayuk ra binaal ku gitio ngaangai' sumugut ra susuban Muno.

³⁷Taamo' aku no, iou TUHAN. Taamo' aku no maa' raginio ulun ragitio makapandai ra Okou, TUHAN i Aki Kapuuno', am ra Okou tatanga' magibit risilo sumaguli' Rirun.”[47]

³⁸Kopongo raginio nampatuun TUHAN ra apui intor ra limbowon am nonolob ra taak simbalui no nabaya' ra luton, batu am tana' saboi timug giu' ra parit no mapua'.

³⁹Pakakito ulun raginio ra kasaukan raginio, kubu samba ilo liliwa' mindagu, “TUHAN noyo i Aki Kapuuno'; TUHAN noyo rorondo' i Aki Kapuuno'!”

⁴⁰I Ilia pana nanusub, “Rokopo' nabi-nabi ru Baal no; pai' polosoo' sangulun pana makapagiru'!” Rokopo' nilo ngaangai' nabi no. Nagibit i Ilia risilo mongoi ra Sungoi Kison am pamatoi risilo.

⁴¹I Ilia pana mindagu boo ra Raja' Agab, “Ongoi no akan, sabap ra nokorongog aku ra ngoos ru rasam ondo' matong ra mataki'.”

⁴²Liliwa' Raja' Agab mongoi akan, pagaloi i Ilia ra tampak ru Gunung Karmil. Giu' no igulatur samba io saboi ra tana' ra ulu nano giu' ra karuo-ruo ru atur nano.

⁴³Kono ra ulipon nano, “Pagaloi no, ilai' tampilon ra raat.” Ugar ulipon no, am saguli' am indagu, “Kolondo' atan-atan nakito ku.” Saboi intulu' i Ilia nanusub riso mongoi pagilong tampilon ra raat.

⁴⁴Paat io sumaguli' ra kaintulu' no, indagu io, “Nakito ku gaun boborok koson ra palar ru kalindu' ru ulun siminimpor intor ra raat.” Panusub i Ilia ra ulipon nano, “Ongoi no uma' ra Raja' Agab. Susubo' io sumakoi ra kurita' kuda nano am paulio', ra kalo poyo maaput io ru rasam.”

⁴⁵Kalo nabuoi raginio, limbowon nototop ra gaun maitom am tumalimpuun magangin ra mapuor, am rumasam ra maawas. Raja' Agab siminakoi ra kurita' kuda nano am ongoi ra Jijriil.

⁴⁶Paat raginio kuasa' ru TUHAN timinuun ra rasawat ri Ilia; pinabangkos no bayang nano ra awak, am pasimbul siminigulu ra Raja' Agab buoi nangkiralan saboi ra kulobon garabang ru bandar Jijriil.