Read Timugon Murut 1 RAJA'-RAJA' 20 Bible Online

1 RAJA'-RAJA' 20 - Timugon Murut bible

1 RAJA'-RAJA' 20

¹Paat ra sangarawan no, Raja' Bingadad, raja' ru pagun Siria nanimung ra ngaangai' pulalai ru saujor nano. Raja' Bingadad no inindangan ru talu ngoopor am ruo ngaulun raja' ra bokon nababaya' ra kuda am kurita' kuda nilo. Kopongo raginio Raja' Bingadad jiminalai am nagawang, am niayuk namulunsar ra bandar Samaria.

²Pangator Raja' Bingadad ra kukula' ngaulun sinusub mongoi ra Raja' Agab, raja' ru Israil, giu' ra bandar no nabaya' ra bilin, “Raja' Bingadad mangitaak

³maa' raginio pataakon mu pirok am mas ru raja', andu'-andu', am niayuk anak-anak muno ondo' mapanggol kaga' riso.”

⁴Taam Raja' Agab, “Balai' Raja' Bingadad no ra mangiou aku. Iowon io mangalap raki' am ngaangai' rapu' kuno.”

⁵Kopongo raginio ulun-ulun sinusub no siminaguli' ra Raja' Agab am napasaboi ra rondo' poyo pangitaakan intor ra Raja' Bingadad, “Ragili Raja' Bingadad no nangitaak maa' raginio mapataak kou ra pirok am mas muno, andu'-andu' am niayuk anak-anak muno.

⁶Kaa' raino manusub io ra ulun-ulun tutumula' nano manguliat ra istana muno am baloi ru pagawai-pagawai muno. Mangalap ilo ra ngaangai' ondo' karaan ra mologo risilo.[50] Matong ilo olo'-olo' paat koson raino ra susuab no.”

⁷Pampiau Raja' Agab ra ngaangai' tingganai ru pagun nano am indagu, “Ilai', ulun no masaga' mamuso ritakau. Nangator ulun no ra tanou raki' am mangitaak maa' raginio andu'-andu' am anak-anak kuno, pirok am mas kuno pataakon riso, am nangiou aku.”

⁸Kaa' taam tingganai-tingganai am mamagun, “Pai' lioo' ulun raginio, pai' gagayaa' pangitaakan nano!”

⁹Ginio ra indagu Raja' Agab ra ulun-ulun sinusub no, “Balai' raja' no ra mangiou aku ra pangitaakan no ra kasaa' no, kaa' kalo mangiou aku ra pangitaakan no ra karuo no.” Ugar ulun-ulun sinusub no, am saguli' poyo am papasaboi ra ragu

¹⁰intor ra Raja' Bingadad, “Raja' maino matong ra masuang kaga' saujor koson mamuso ra bandar mutu, saboi makapagibit ilo ra kaau intor ra nangaurus ru bandar ralalom ru kalindu' nilo. Nagibot ilo maa' raginio dewa-dewa mamatoi riso amon ru kalo mambaal io raginio!”

¹¹Taam Raja' Agab, “Balai' Raja' Bingadad ra sangulun saujor toojo maansayan ra kinaayo nano malupus pampatayan, sala' ka kalo poyo raginio!”

¹²Nakaapu Raja' Bingadad ra taaman ru Raja' Agab no paat ra io am raja'-raja' nangindangan riso no tatanga' manginum giu' ra pangkiman nilono. Nanusub Raja' Bingadad ra saujor nano tumampos koson mangayou, am ilo pana timinampos.

¹³Liliwa' raginio, sangulun nabi minuma' ra Raja' Agab am indagu, “Koon raginio ragu ru TUHAN, ‘Pai' kalaa' ra pulalai ru saujor ondo' maayo no! Paat ra orou raiti' mangani' Aku rirun ra kamanangan am makapandai kou ra Aku noyo TUHAN.’ ”

¹⁴Pangkuot Raja' Agab, “Osoi kia maningganai ra pamulunsaran?” Taam nabi no, “Sumugut ra ragu ru TUHAN, saujor-saujor ra mamulok ondo' tiningganai ru pagawai-pagawai ru libung no maningganai ra pamulunsaran.” Pangkuot raja', “Kaa' osoi kia ondo' mamuun ra pamulunsaran?” Taam nabi no, “Okou no raja'!”

¹⁵Ginio ra pampiau raja' no ra ngaangai' saujor mamulok ondo' tiningganai ru pagawai-pagawai ru libung, suang no 232 ngaulun saujor. Kopongo raginio pampiau io poyo ra saujor ru Israil am suang no 7,000 ngaulun.

¹⁶Pamulunsaran raginio pinuunan paat ra tanga' ru orou paat ra Raja' Bingadad am talu ngoopor am ruo ngaulun raja' ra paguum nano tatanga' nangagauk giu' ra pangkiman nilono.

¹⁷Saujor-saujor ra mamulok no nagulu namulunsar. Paat ra ulun pansigo ondo' sinusub ru Raja' Bingadad nambala' ra mokoondo' rondo' pulalai ru saujor matong intor ra Samaria,

¹⁸indagu Raja' Bingadad, “Rokopo' ilo ra biag-biag, ilo ondo' matong koson mangayou kapoam matong koson mobonsoi!”

¹⁹Saujor-saujor ra mamulok no naningganai ra pamulunsaran, sunuo' ru saujor ru Israil,

²⁰am sigagama' namatoi ra pantula' ondo' tinula' nilo. Saujor ru pagun Siria nagiru' liliwa' inilou ru saujor ru Israil. Kaa' Raja' Bingadad nakapagiru' intor ra pamulunsaran raginio. Nagiru' io nangura' ra sanginan kuda, binaya' ru kukula' ngaulun saujor nangkuda.

²¹Raja' Agab niayuk minongoi pamulunsar am pamuso[51] ra kuda am niayuk kurita' kuda ru pantula', saboi ulun ru Siria naala ra masaran.

²²Kopongo raginio minongoi uma' nabi no ra Raja' Agab am indagu, “Uli' no am kaikango' noyo saguli' saujor muno. Pambaal no ra pangatangan ondo' moonsoi, sabap ra bulintok mambusak ra bilor sumunu', raja' ru pagun Siria mamulunsar poyo rirun.”

²³Ngaangai' pagawai ru Raja' Bingadad mindagu riso, “Tuhan-tuhan ru Israil no tuhan-tuhan ru gunung. Ginio sabap ra makapangala ilo ritakau. Kaa' maaru' makapangala takau risilo amon ru mampapatoi takau giu' ra tana' marata'.

²⁴Raino aligi' talu ngoopor am ruo ngaulun raja' no ra panglima.

²⁵Mopongo raginio timungo' pulalai ru saujor koson ra gayo ru pulalai ondo' nangiruan rirun ragili. Tomposo' kuda am kurita' kuda ondo' suang no nogondo' koson ragili. Anggalon takau saujor ru Israil giu' ra tana' marata', am maaru' makapangala takau risilo.” Nangiou Raja' Bingadad am nanugut ra pinson nilo.

²⁶Bulintok ra mambusak ra sumunu' no, nanimung Raja' Bingadad ra saujor nano am nababaya' jumalai risilo mongoi ra Apik koson mamulunsar ra Israil.

²⁷Saujor ru Israil niayuk tinimung am inukapan ra kinandoi mangayou. Jalai ilo, am pangkim ralalom ru ruo pulalai ondo' nantaluma' ra ulun ru Siria. Saujor ru Israil no ilain boborok, koson ayuk ra ruo ngampulalai kambing amon ru pinogondo' ra saujor ru Siria ondo' namapak ra intok raginio.

²⁸Sangulun nabi minuma' ra Raja' Agab am indagu, “Koon raginio ragu ru TUHAN: ‘Sabap no ra ulun ru Siria minindagu ra Aku ayuk makakuasa' giu' ra gunung am kalo makakuasa' giu' ra tana' marata', manaak Aku rirun ra kamanangan ra saujor nilo ondo' masuang kaga' no. Okou am mamagun muno makapandai ra Aku noyo TUHAN.’ ”

²⁹Buoi tulu' ngoorou saujor ru Siria am saujor ru Israil soroi giu' ra pangkiman nilono, nantaluma' ra rondo' am bokon. Paat ra orou katulu' no, tumalimpuun ilo mangayou am saujor ru Israil namatoi ra 100,000 ngaulun saujor ru Siria.

³⁰Saujor ondo' nakapagiru' intor ra giu' no minongoi ra bandar Apik, am giu' ra bandar no suang 27,000 ngaulun poyo naabaan ru timbok ru bandar no. Raja' Bingadad niayuk nagiru' minongoi ra ralalom ru bandar am siminindung giu' ra lamin talikuron ru rondo' baloi.

³¹Pagawai-pagawai ru Raja' Bingadad minuma' riso am indagu, “Nokorongog akai ra raja'-raja' ru Israil makaasi'. Iowo' akai no mongoi uma' ra raja' ru Israil ra mapatapi' ra karung ra awak mai koson tatandu' ru pansagulian guang, am kalat ra liog mai koson tatandu' ru naala. Gama' ru mamayag raja' no rirun raja'.”

³²Ginio ra pinatapi' nilo konoon karung ra awak am kalat ra liog nilo am ongoi uma' ra Raja' Agab. Konilo, “Ulipon muli, Raja' Bingadad nakitaak maa' raginio bayagon mu io.” Indagu Raja' Agab, “Lakat poyo kia naayag io? Iou noyo! Io no koson ra pabukat kuno galama'!”

³³Pagawai-pagawai ru Raja' Bingadad tatanga' noyo maginaa ra tatandu' moonsoi. Ginio ra paat ra Raja' Agab nanabit “pabukat”, nangalap ilo ra kaluagan am indagu, “Koson ra rinagu muno, Raja' Bingadad no pabukat muno!” Panusub Raja' Agab, “Ibito' io raki'.” Pakasaboi Raja' Bingadad, kimaiti' ru Raja' Agab no Raja' Bingadad sumakoi ra kurita' kuda nano.

³⁴Indagu Raja' Bingadad riso, “Bandar-bandar ragili ondo' ginaau ru ama' kuli intor ra ama' muli, pasagulion ku rirun. Patirongon mu pusor pantalanan giu' ra Damsyik koson ragili ondo' pinatirong ru ama' kuli giu' ra Samaria.” Taam Raja' Agab, “Ra kitaakon ti palabuson ku raja'.” Nambaal ilo ra pangiawan, Raja' Agab pana nangiou ra Raja' Bingadad minugar.

³⁵Ralalom susuban ru TUHAN, sangulun intor ra santimungan nabi nanusub ra sangulun nabi ra bokon mapalamba' riso, kaa' marara' nabi no.

³⁶Ginio ra nabi ondo' kasaa' ra raitii' ni mindagu ra nabi raginio, “Sabap ra kalo gumagaya' kou ra susuban ru TUHAN, saamon kou ru sanginan singa' malupus ayuk ra okou mangiruan raki'.” Kopongo ayuk nabi no minugar, saamo' io ru sanginan singa'.

³⁷Kopongo raginio nabi ondo' kasaa' no minugar am ongoi ra ulun bokon am indagu, “Lambaa' aku!” Ulun ti napalamba' riso ra mapuor kaga' saboi napilat nabi no.

³⁸Bongkoso' ru nabi no bulos nano ra konoon am salu ra ulun bokon. Nanturung io ra kiing ru ralan am mangkuliman ra raja' ru Israil mansail ra giu' no.

³⁹Paat ra raja' sumail, pampiau nabi no riso am indagu, “Raja' kuno, paat ra aku mangayou, mokoondo' ulun nagibit ra sangulun rinakop raki'. Kon ru ulun no, ‘Ilai' ulun ti! Amon ru magiru' io, musiti' kou mambayar riso ra painawo muno, kapoam tagion ra suang talu ngaribu ngampila' ruit pirok.’

⁴⁰Kaa' kumantisuk aku ra baal ra bokon, saboi nagiru' ulun no.” Taam raja' no, “Inukum mu inan muno galama'. Ginio ra musiti' kou mambayar raginio.”

⁴¹Rilako' ru nabi no bangkos ra bulos nano, am paat raginio niayuk raja' no nakaulig riso sangulun nabi.

⁴²Nabi no pana mindagu boo ra raja', “Koon raginio ragu ru TUHAN, ‘Sabap no ra ulun ondo' susubon Kuno ra potoyon no pinoloso mu nagiru', raino musiti' kou mambayar raginio ra painawo muno galama', am saujor muno mapuso sabap ra nompoloso kou ra saujor ru pantula' nagiru'.’ ”

⁴³Kopongo raginio uli' Raja' Agab giu' ra Samaria ra guang ondo' pansagulian am siminangit.