Read Timugon Murut 1 RAJA'-RAJA' 21 Bible Online

1 RAJA'-RAJA' 21 - Timugon Murut bible

1 RAJA'-RAJA' 21

¹Maar ra istana ru Raja' Agab giu' ra Jijriil mokoondo' sampila' umo ru anggur longgom ru sangulun makainggalan ri Nabot.

²Paat ra sangarawan indagu Raja' Agab ri Nabot, “Pataako' raki' umo ru anggur muno, sabap ra umo no maar ra istana kuno. Alapon ku ginio ra umo ru sayur. Aligin ku ginio ra umo ru anggur ondo' moonsoi poyo. Kapoam amon ru masaga' kou, bayarin ku ginio ra logo ra matanda'.”

³Kaa' taam i Nabot, “Umo ru anggur ti pinatungkus ru kinamatuaan kuli. Ralalom inggalan ru TUHAN, kalo pataakon ku ginio rirun raja'!”

⁴Uli' Raja' Agab ra guang pansagulian am siminangit sabap ra ragu ri Nabot no. Luya' Raja' Agab ra intok kaalangan, tumingkuang ra timbok am marara' mangakan.

⁵Inggaar andu' nano i Ijibil am pangkuot, “Kua rirun raja' pansagulian kaga' am marara' mangakan?”

⁶Taam Raja' Agab, “Kalo maansayan aku ri Nabot. Masaga' aku mambali ra umo ru anggur nano am pataako' ku ruit riso, kapoam umo no aligin ra umo ru anggur ra bokon, kaa' marara' i Nabot mapataak raki'!”

⁷Kon ri Ijibil, “Sala' ka kia raja' kou? Sukal no, bansuko' guang muno am akan no. Alapon ku rirun umo ri Nabot no!”

⁸Kopongo raginio panulis i Ijibil ra kukula' surat, saini' no ralalom inggalan ru Raja' Agab am sinaapan ra saap ru raja', am paatari' no ginio ra kukula' ngaulun pagawai am tingganai ru bandar ru Jijriil.

⁹Gitio noyo suang ru surat no: “Potonowo' noyo mampali, timungo' noyo mamagun am anii' rondo' panturungan ondo' maurumat kaga' ri Nabot.

¹⁰Mopongo raginio susubo' ruo ngaulun malaat manturung mantaluma' ri Nabot am manguu' riso ra nagulas io ri Aki Kapuuno' am raja'. Mopongo raginio ibito' io mingkual ra bandar am bobolo' io saboi matoi.”

¹¹Pagawai-pagawai am tingganai ru mamagun ru Jijriil napaugar ra susuban ri Ijibil.

¹²Napatanou ilo ra mampali, am nanimung ra mamagun am nangani' ri Nabot rondo' panturungan ondo' maurumat kaga'.

¹³Ratong ruo ngaulun malaat no am turung ra taluma' ri Nabot. Nanguu' ilo ri Nabot ra saang ru ulun masuang ra nagulas io ri Aki Kapuuno' am raja'. Ginio ra inibit i Nabot miningkual ra bandar am binobol saboi minatoi.

¹⁴Tanou ri Nabot binobol saboi minatoi pinasaboi ri Ijibil.

¹⁵Kaapu ayuk ri Ijibil tanou raginio, Kono ra Raja' Agab, “Minatoi noyo i Nabot. Raino ongoi no am alapo' noyo umo ru anggur ondo' marara' no talanon rirun.”

¹⁶Paat raginio niayuk Raja' Agab minongoi koson mompolonggom ra umo ru anggur no.

¹⁷Kopongo raginio indagu TUHAN ri Ilia, nabi intor ra Tisbi no,

¹⁸“Ongoi no ra Raja' Agab giu' ra Samaria. Makatuum kou riso giu' ra umo ru anggur ri Nabot. Soroi io ra giu' no koson sumuali ra umo no.

¹⁹Ragui' io ra Aku, TUHAN mindagu riso, ‘Kopongo ra okou namatoi ra ampu' no, sumuali kou poyo kia ra rapu' nano poyo?’ Pambala' riso ra koon raginio ragu Kuno, ‘Giu' ra intok ru uku'-uku' nantila' ra raraa' ri Nabot, ra giu' no niayuk raraa' muno tilain ru uku'!’ ”

²⁰Paat ra Raja' Agab nakatuum ri Ilia, indagu io, “Okou pantula', pupus ti nakasugut kou nakatuum raki'!” Taam i Ilia, “Topot. Binaal muno malaat ra pagilangan ru TUHAN.

²¹Ginio ra indagu TUHAN no rirun raja', ‘Maparatong Aku ra karaat rirun. Inggion Tokou am ngaangai' ungkuyon ralalom ru sasambaloi muno, ondo' mangamulok am niayuk ondo' mangatutuo.

²²Sasambaloi muno masauk koson ra sasambaloi ru Raja' Jirobiam anak ri Nibat, am koson ra sasambaloi ru Raja' Baisa anak ri Agia, sabap ra napaingkual kou ra sangit Kuno am niayuk nangkinibit ra ulun ru Israil makatula.’

²³Intor ri Ijibil, mindagu TUHAN ra uku' mangakan ra baangkai nano giu' ra bandar Jijriil.

²⁴Osoi ayuk pana ulun ru sasambaloi muno raja' ondo' matoi ralalom ru bandar akanon ru uku', am osoi ayuk pana matoi giu' ra padang akanon ru susuit.” (

²⁵Kolondo' osoi pana ondo' igondo' nambaal ra malaat ra pagilangan ru TUHAN nakasail intor ra Raja' Agab — ngaangai' ru kalaatan no binaal sabap ra nasusuk ru andu' nano i Ijibil.

²⁶Nambaal Raja' Agab ra tula ondo' malaat kaga', sabap ra siminamba io ra sinungkalalaing koson ra binaal ru ulun ru Amori, ondo' pinagiru' ru TUHAN paat ra ulun ru Israil nangayan ra tana' ti ragili.)

²⁷Kopongo i Ilia minindagu, rilako' ru Raja' Agab bayang nano. Inalus no bayang nano am sulungi' konoon karung koson tatandu' ru pansagulian guang. Nampali Raja' Agab, am pombolong io ra mambayang ra konoon karung. Mugar Raja' Agab mongoi ra giu' giti ra bulos malaut am mangiluk guang.

²⁸Indagu TUHAN ra Nabi Ilia,

²⁹“Nakito mu kia ra Raja' Agab minggana' guang ra saang Kuno? Sabap ra nambaal io koon raginio, kalo maparatong Aku ra karaat no riso paat ra io maayag no. Maparatong Aku ra karaat no ra sasambaloi nano paat ra anak nano maayag.”