Read Timugon Murut 1 RAJA'-RAJA' 5 Bible Online

1 RAJA'-RAJA' 5 - Timugon Murut bible

1 RAJA'-RAJA' 5

¹Raja' Giram intor ra Tirus magail rumangan ra Raja' Daut. Ginio ra paat Raja' Giram nokorongog ra Raja' Salomo namarinta minalit ra Raja' Daut ama' nano, nanusub io ra sangulun duta mongoi ra Raja' Salomo.

²Kopongo raginio nangator Raja' Salomo ra bilin ti ra Raja' Giram,

³“Nakapandai kou ra Raja' Daut, ama' kuno magail mantula' kalalaat manggal ra pantula' intor ra pagun-pagun ra paginggaar nano. Kalo poyo nanaak TUHAN riso ra kamanangan ra ngaangai' ru pantula' nano, kalo nakapambaal io ra Baloi intok sumamba ra TUHAN, i Aki Kapuuno' nano.

⁴Kaa' raino TUHAN, i Aki Kapuuno' kuno nanaak ra kaansayan giu' ra titikop ru pagun kuno. Kolondo' pantula' kuno, am kolondo' boo baal malaat intor ra ati pana.

⁵Nambantu' noyo TUHAN ra Raja' Daut ama' kuno. Ragu Nano, ‘Anak ungkuyon muno ondo' lantikon Kuno masauk ra raja' koson malit rirun mambaal ra Baloi Kuno.’ Ginio ra namatas aku noyo koson mambaal ra Baloi intok sumamba ra TUHAN, i Aki Kapuuno' kuno.

⁶Susubo' mamagun muno mongoi ra Libanon koson mantagar raki' ra tataun sidar. Mamagun kuno maguyu ra mamagun muno. Bayarin ku mamagun muno, sumugut ra suang ondo' aruon muno. Koson ra napandayan mu noyo, mamagun muno mapandai poyo mantagar ra tataun intor ra mamagun kuno.”

⁷Naansukan kaga' Raja' Giram nangapu ra bilin ru Raja' Salomo no. Kono, “Koompor noyo TUHAN ra orou raiti', sabap ra nanaak Io ra sangulun anak ungkuyon ondo' mapintar kaga' ra Raja' Daut koson malit riso mamarinta ra bansa' ondo' maayo no!”

⁸Kopongo raginio nangator Raja' Giram ra taaman ragitio ra Raja' Salomo, “Nakaapu aku noyo ra bilin muli, am nakatampos aku no manugut ra atan ayuk kitaakon muno. Tomposon ku tataun sidar ru Libanon am tataun sipris.

⁹Mamagun kuno magibit ra tataun no tumuun intor ra Libanon mongoi ra raat. Bongkoson nilo tataun-tataun no masauk ra rakit am abason pasisilon ra nagas mongoi ra intok aruon muno. Giu' no mamagun kuno mamugal ra rakit-rakit no, am maalap boo ru mamagun muno. Ulaan muno iono mampaakan ra mamagun kuno.”

¹⁰Ginio ra Raja' Giram nangani' ra Raja' Salomo ra ngaangai' tataun sidar ru Libanon am tataun sipris ondo' kinitaak nano.

¹¹Raja' Salomo no pana nangani' ra Raja' Giram ra 322,500 ngakilogram gandum am 400,000[10] ngalito umau jaitun kopoyo ra moonong bilor koson akanon ru mamagun ru Raja' Giram.

¹²Nanugut TUHAN ra bantu' Nano. Nanaak Io ra Raja' Salomo ra kapintaran. Moonsoi pabukatan ru Raja' Giram am Raja' Salomo, am ilo ruo no nambaal ra nabantuan.

¹³Raja' Salomo nanimung ra 30,000 ngaulun ungkuyon intor ra titikop ru Israil koson ra kandoi jajalin,

¹⁴am nampalantik ri Adoniram nasauk ra mantamung risilo. Raja' Salomo nantayar risilo ra talu ngampulalai, 10,000 ngaulun sampulalai. Moonong pulalai mangandoi buoi sansila' giu' ra Libanon am mayan ra baloi buoi ruo ngansila'.

¹⁵Mokoondo' niayuk Raja' Salomo ra 80,000 ngaulun ungkuyon giu' ra kagunungan koson mangimbatu; 70,000 ngaulun ungkuyon mangkayang ra batu-batu no.

¹⁶Mandur nano 3,300 ngaulun koson magalung ra kandoi nilo.

¹⁷Ralalom ru panusuban ru Raja' Salomo, nangimbatu ilo ondo' mangaayo am moonsoi koson saukon ra lugu' maatang ru Baloi ru TUHAN.

¹⁸Ulun mangngandoi ra Raja' Salomo am mangngandoi ra Raja' Giram, am niayuk intor ra bandar Gibal nanampos ra batu am tataun koson mambaal ra Baloi ru TUHAN.