Read Timugon Murut 1 RAJA'-RAJA' 7 Bible Online

1 RAJA'-RAJA' 7 - Timugon Murut bible

1 RAJA'-RAJA' 7

¹Nambaal niayuk Raja' Salomo ra rondo' istana nano galama', am buoi ru nambaalan no mopor am talu ngambilor.

²Ralalom ru istana no nambaal Raja' Salomo ra rondo' dewan ondo' ininggalanan ra Dewan Kataunan Libanon.[12] 44 ngamito gawar ru dewan no, 22 ngamito pila' no, am 13.5 ngamito sawat no. Dewan no mokoondo' ra talu ngambaris lugu' intor ra tataun sidar, am moonong baris mokoondo' mopor am limo lugu' koson manungka' ra tataun-tataun bandayan. Pinuusan no niayuk binaal intor ra tataun sidar am nakasimpung lamin pambulian ra kuliamos, ondo' niayuk sinungka' ru lugu'-lugu' raginio.

⁴Giu' ra rinding tampilon ra kait am pamiris ru dewan mokoondo' kukula' ngantulus gigimpalan: talu ngantulus ra sarindingan ondo' nantaluma' ra talu ngantulus ra rinding ra bokon. Baluntur ru kulobon am gigimpalan no segiempat bujur baal no.

⁵

⁶Nambaal niayuk Raja' Salomo ra Dewan Lugu'. Dewan Lugu' no 22 ngamito gawar no am 13.5 ngamito pila' no. Giu' ra saang ru dewan no mokoondo' serambi ondo' makataap, am sinungka' ru lugu'-lugu'.

⁷Mokoondo' poyo dewan ondo' sabiton ra Dewan Takhta, ondo' niayuk sabiton ra Dewan Pangakiman. Dewan no inangkupan ra tataun sidar, intor ra sulig saboi ra tataun bandayan no.[13]

⁸Intok inayanan ru Raja' Salomo galama' binaal ra liliut ra bokon, giu' ra talikuron ru Dewan Pangakiman. Baal no nogondo' ra bangunan ra bokon. Nambaal niayuk Raja' Salomo ra rondo' baloi ondo' nogondo' koson ra andu' nano anak ruandu' ru raja' ru Misir.

⁹Ngaangai' bangunan no, nakaaya' liliut no ondo' maayo, intor ra lugu' maatang saboi ra pinuusan, binaal intor ra batu ondo' moonsoi. Batu-batu no tinampos giu' ra kuari am pinutul maya' ra tuku' ondo' inaru'; tampilon ra ralalom am tampilon ra liwar binanis ra garagaji'.

¹⁰Lugu' maatang ru bangunan no binaal intor ra batu mangaayo ondo' inula' ru kuari; mokoondo' 3.5 ngamito gawar no am mokoondo' niayuk ondo' 4 ngamito.

¹¹Rasawat ru batu-batu maatang no, inanian ra batu-batu ra bokon ondo' mologo, ondo' binonsoi ra pahat sumugut ra tutuku', am sinilian ra tataun sidar.

¹²Liliut ru istana am liliut tampilon ra ralalom ru Baloi ru TUHAN, am lamin giu' ra tampilon ra saang ru Baloi ru TUHAN mokoondo' ra timbok ondo' natatampas: satampas intor ra tataun sidar ra rasawat ru moonong talu pinagintun batu.

¹³Nanusub Raja' Salomo ra ulun mongoi pangalap ra sangulun ondo' makainggalan ri Guram, sangulun manukang ra gangsa' ondo' minayan giu' ra bandar Tirus.

¹⁴Ama' ri Guram, ondo' minatoi noyo, intor ra bandar Tirus. Ragili ama' ri Guram no pana sangulun manukang ra gangsa' ondo' mapandai kaga'. Ama' ri Guram papag ru bansa' ru Naptali. I Guram ti sangulun manukang ondo' mapandai kaga', am mokoondo' ra nailian. Nangapu io ra piau ru Raja' Salomo koson mangandoi mambaal ra kuliamos intor ra gangsa'.

¹⁵Nambaal i Guram ra ruo ngantaun lugu' gangsa'; moonong lugu' 8 ngamito sawat no am 5.3 ngamito ra rilit no.[14]

¹⁶Io niayuk nambaal ra ruo ulu ru lugu' intor ra gangsa'; moonong ulu ru lugu' no 2.2 ngamito sawat no, am pinatampak ra rasawat ru lugu'-lugu' no.

¹⁷Tampilon ra rasawat ru lugu'-lugu' no binungaan ra pinatair rantai pinitol

¹⁸am ruo ngambaris kawa' ru dalima' ondo' binaal intor ra gangsa'.

¹⁹Ulu ru lugu' no koson ra bunga' bakung, 1.8 ngamito sawat no,

²⁰am pinabanta' ra tampilon ra mapungol ra rasawat ru rantai pinitol no. Ngaangai' no mokoondo' 200 kawa' ru dalima' ralalom ru ruo ngambaris ra moonong ulu ru lugu'[15]ondo' karuo no.

²¹Pinabigor ri Guram lugu'-lugu' no giu' ra saang ru kulobon Baloi ru TUHAN. Lugu' ondo' tampilon ra rabugus ininggalanan ra Jakgin,[16] am ondo' tampilon ra ralayo ininggalanan ra Boas.[17]

²²Ulu ru lugu' ondo' koson ra bunga' bakung am binaal intor ra tambaga' pinabanta' ra rasawat ru lugu'. Koon raginio noyo i Guram nomongo ra nambaalan ra lugu'-lugu' no.

²³Kopongo raginio nambaal i Guram ra rondo' tangki' mapungol intor ra tambaga'; 2.2 ngamito landom no, 4.4 ngamito garis ru tanga' no am 13.2 ngamito rilit no.

²⁴Ruo ngambaris ra kawa' ru lalabu' ondo' binaal pinagampan nabaya' ra tangki' no pinamunga' ra liliut ru kiing tampilon ra liwar ru tangki' no.

²⁵Tangki' no pinabanta' ra rasawat ru bakulung ru mopor am ruo ngainan sapi' gawayan ondo' binaal intor ra tambaga', ondo' pinatingkuang ra liwar: talu pinatingkuang ra ralayo, talu tampilon ra kalasaan, talu tampilon ra rabugus am talu tampilon ra sirangon.

²⁶75 ngamilimito kinakapal ru kiing ru tangki' no. Kiing ru tangki' no koson ra kiing ru sangkir, ondo' koson ra tapi' ru bunga' bakung minungkalar. Tangki' no masuangan ra timug olo'-olo' 40,000 ngalito.

²⁷I Guram niayuk nambaal ra mopor kurita'-kurita' pedati ru gangsa'. Moonong kurita' no 1.8 ngamito gawar no, 1.8 ngamito pila' no am 1.3 ngamito sawat no.

²⁸Kurita' pedati no binaal intor ra papan-papan apat persegi ondo' mokoondo' ra bingkai,

²⁹am binungaan ra ukiran gambar ru singa', sapi' gawayan am kirub. Giu' ra tataun bingkai no, tampilon ra rasawat am tampilon ra ragana' ru gambar singa' am sapi' gawayan no, mokoondo' ukiran pinaujak busak ra pinangkikiting.

³⁰Moonong kurita' pedati no mokoondo' apat luda' tambaga' am pampaguut ra luda' no intor ra tambaga' niayuk. Ginio ra kaapat-apat pisuk ru kurita' pedati no mokoondo' ra sungka' tambaga' koson manungka' ra rondo' bisin. Sungka' no binungaan ra ukiran pinaujak busak ra pinangkikiting.

³¹Tampilon ra rasawat ru kaapat-apat sungka' no pinatunggul ru rondo' tataun bingkai mapungol koson manungka' ra bisin no. Susungka' no nakaingkual ra 44 ngasintimito sawat no giu' ra rasawat ru papan apat segi no, am 22 ngasintimito ra ragana' no. Giu' ra liput ru tataun bingkai no mokoondo' ra ukiran.

³²Luda' ru kurita' pedati no 66 ngasintimito sawat no, am pinatakin ra ragana' ru papan-papan ondo' makatataun baluntur. Pampaguut ra luda' no nogondo' ra kurita' kuda.

³³Luda' ru kurita' pedati no koson ra luda' ru kuda. Pampaguut ra luda', rim, kakalindu' no, am pusor ru luda' kurita' pedati no ngaangai' no binaal intor ra tambaga'.

³⁴Tampilon ra ragana' ru kaapat-apat pisuk ru moonong kurita' pedati no, mokoondo' apat sungka' ondo' nogondo' ra kurita' pedati no.

³⁵Giu' ra liput ru tampilon rasawat ru kurita' pedati no mokoondo' pinakiing 22 ngasintimito pila' no. Susungka' ru kurita' pedati no am papan-papan no nogondo' ra kurita' pedati no.

³⁶Ngaangai' ru susungka' no am papan no mokoondo' ra ukiran ru gambar kirub, singa' am puun tataun palma giu' ra ngaangai' intok ondo' maalap ra ukir, am niayuk binungaan ra ukiran pinaujak busak ra pinangkikiting ra liput no.

³⁷Koon raginio noyo kurita'-kurita' pedati no binaal; ngaangai' no nogondo', baal am gayo no.

³⁸I Guram niayuk nambaal ra 10 bisin, rondo' ra moonong kurita' pedati no. Garis tatanga' ru moonong bisin no 1.8 ngamito am masuangan ra timug olo'-olo' 800 ngalito.

³⁹Pinabanta' ri Guram limo ra kurita' pedati no giu' ra tampilon rabugus ru Baloi ru TUHAN, am limo no poyo giu' ra tampilon ralayo. Tangki' gangsa' no pinabanta' no giu' ra pisuk tampilon ra sirangon rabugus.

⁴⁰I Guram niayuk nambaal ra pagangan, susuuk am mangkuk. Nopongo no ngaangai' kandoi nano koson ra Raja' Salomo koson pakayon giu' ra Baloi ru TUHAN. Gitio noyo inggalan ru kakamot-kakamot binaal nano: 2 ngantaun lugu' 2 ulu ru lugu' ondo' koson ra mangkuk ondo' pinatampak ra rasawat ru lugu'-lugu' Rantai pinitol ra moonong ulu ru lugu' 400 kawa' ru dalima' intor ra tambaga' ondo' pinabanta' ruo ngambaris ra liliut ru rantai pinitol ra moonong ulu ru lugu' 10 kurita' pedati 10 bisin 1 tangki' tambaga' 12 ngainan sapi' gawayan intor ra gangsa' koson napatampakan ra tangki' Pagangan-pagangan, pagangan-pagangan tana', susuuk-susuuk am mangkuk-mangkuk. Ngaangai' kakamot ru Baloi ru TUHAN ondo' binaal ri Guram koson ra Raja' Salomo binaal intor ra tambaga' ondo' inisasan.

⁴¹

⁴²

⁴³

⁴⁴

⁴⁵

⁴⁶Topot koson ra susuban ru raja', ngaangai' kakamot no binaal giu' ra pambaalan ra basi' lolot ru Sukot am Sartan, giu' ra Limayak Jordan.

⁴⁷Raja' Salomo kalo nanimbang ra kakamot-kakamot tambaga' no, sabap ra masuang kaga'. Ginio ra kalo napandayan bagat no.

⁴⁸Raja' Salomo niayuk nanusub ra ulun mambaal ra kakamot mas koson ra Baloi ru TUHAN: Altar, mija' ru ruti' ondo' pataakon ri Aki Kapuuno',

⁴⁹mopor tampakan ra lampung ondo' pinabanta' ra saang ru Lamin Matulai Kaga' — limo ra tampilon rabugus am limo ra tampilon ralayo, busak, lampung, sumpit,

⁵⁰sangkir, kakamot mangimpasau ra sumbu' ru lampung, mangkuk, pinggan intok pambulian ra kaminyan, baa ru apui, ingsil ru kulobon Lamin Matulai Kaga' am kulobon-kulobon ra liwar ru Baloi ru TUHAN. Ngaangai' ru kakamot no binaal intor ra mas.

⁵¹Kopongo Raja' Salomo nambaal ra Baloi ru TUHAN, nambuli io ra pirok, mas am kakamot ra bokon ondo' patimpokon ra TUHAN ru Raja' Daut, ama' nano. Kakamot-kakamot raginio pinauli giu' ra ralalom ru stor-stor ru Baloi ru TUHAN.