Read Timugon Murut 1 RAJA'-RAJA' 8 Bible Online

1 RAJA'-RAJA' 8 - Timugon Murut bible

1 RAJA'-RAJA' 8

¹Kopongo raginio Raja' Salomo nanusub ra ngaangai' tingganai ru bansa'-bansa' ru Israil muma' riso giu' ra Jirusalim, koson mapabanding ra Kaban Nabantuan ru TUHAN intor ra Sion, bandar Daut, mongoi ra Baloi ru TUHAN.

²Ilo ngaangai' matitimung paat ra Pangiantakan Mangkalukub ra Raun, iono ralalom sila' katulu', ralalom ru sila' Itanim.

³Kopongo ngaangai' ru tingganai no natitimung, imam-imam nangkayang ra Kaban Nabantuan

⁴am nagibit raginio ra ralalom ru Baloi ru TUHAN. Ulun ru Liwi am imam-imam niayuk napabanding ra Kim ru TUHAN am ngaangai' ru kakamot no ra Baloi ru TUHAN.

⁵Raja' Salomo am ngaangai' ru ulun ru Israil natitimung giu' ra saang ru Kaban Nabantuan, am nampataak ra taak simbalui iono domba am sapi' ondo' masuang kaga', saboi kalo mauntob suang no.

⁶Kopongo raginio imam-imam nagibit ra Kaban Nabantuan no ra ralalom ru Baloi ru TUHAN, am napabanta' raginio giu' ra Lamin Matulai Kaga', giu' ra ragana' ru sinungkalalaing kirub.

⁷Kawo ru kirub-kirub no nabingkal am nakataub ra Kaban Nabantuan am niayuk tataun-tataun pamandas no.

⁸Tataun pamandas no maawar kaga' saboi pompor no makito intor ra saang ru Lamin Matulai Kaga', kaa' kalo makito intor ra tampilon ra bokon. (Tataun-tataun pamandas no lakat poyo ra giu' no saboi raino.)

⁹Kaban Nabantuan sinuangan ayuk ra ruo batu ondo' pinabanta' ra giu' no ri Musa, giu' ra Gunung Sinai ragili, paat ra TUHAN nambaal ra nabantuan Nano ra ulun ru Israil, kalupus ilo miningkual intor ra Misir.

¹⁰Tatanga' ru imam-imam mangiruan ra Baloi ru TUHAN, pulali' ru Baloi no natikop ra gaun.

¹¹Gaun no manguliat ra katulayan ru sinda ratangan ru TUHAN, saboi ra ilo kalo makasubol saguli' koson mampaugar ra kandoi nilo.

¹²Kopongo raginio pakiasi' Raja' Salomo, “Iou TUHAN, Okou noposoroi ra mato ru orou giu' ra limbowon,[18] kaa' masaga' Kou poyo mayan ra ralalom ru londom ru gaun.

¹³Raino nambaal aku Rirun ra rondo' baloi ondo' maindon, koson intok ayanan Muno ra mantilayun.”

¹⁴Tatanga' ru mamagun matimung ra giu' no, pagilong Raja' Salomo risilo, am pakitaak ri Aki Kapuuno' mambarakat risilo.

¹⁵Indagu raja', “Koompor noyo TUHAN, i Aki Kapuuno' ru Israil! Nanugut Io ra bantu' ondo' binaal Nano ra ama' kuli, Raja' Daut, paat ra Io minindagu ra Raja' Daut koon ragitio,

¹⁶‘Intor ra Aku nagibit ra ulun Kuno miningkual intor ra Misir, kalo poyo igondo' Aku nampili' ra bandar ra ati pana ra titikop ru Israil koson ra intok pambaalan ra baloi, intok sambayangan Raki'. Kaa' nampili' Aku rirun Daut, koson mamarinta ra ulun Kuno.’ ”

¹⁷Indagu poyo Raja' Salomo, “Ama' kuli, Raja' Daut, nangatang koson mambaal ra rondo' baloi koson ra intok sumambayang ra TUHAN, i Aki Kapuuno' ru Israil.

¹⁸Kaa' indagu TUHAN riso, ‘Kuayan muno mambaal Raki' ra rondo' baloi no moonsoi,

¹⁹kaa' okou kalo mambaal raginio. Anak muno, anak muno galama' mambaal ra baloi Kuno.’

²⁰Raino TUHAN nanugut ra bantu' Nano. Namalit aku ra ama' kuno koson ra raja' ru Israil, am nambaal aku ra rondo' baloi koson intok sumambayang ra TUHAN, i Aki Kapuuno' ru Israil.

²¹Nambaal aku niayuk ra intok giu' ra ralalom ru Baloi ru TUHAN koson Kaban Nabantuan ondo' sinuangan ra batu nabantuan ru TUHAN am kinamatuaan takali, paat ra Io nagibit risilo miningkual intor ra Misir.”

²²Kopongo raginio giu' ra saang ru mamagun, minigor Raja' Salomo tumingkuang ra altar. Potoroyo' no karuo-ruo kalindu' nano

²³am pakiasi', “Iou TUHAN, i Aki Kapuuno' ru Israil, kolondo' ondo' koson Rirun giu' ra limbowon kapoam ra tana' ti. Nanugut Kou ra bantu' Muno ra ulun Muno, am pinakito Mu togom Muno risilo paat ra ilo gumagaya' Rirun ra sotopot-topot ru guang.

²⁴Nanugut Kou ra bantu' Muno ra ama' kuli, Raja' Daut. Paat ra orou raiti', nanugut Kou ra atan ondo' binantu' Muli.

²⁵Ginio ra, iou TUHAN, i Aki Kapuuno' ru Israil, suguto' niayuk bantu' Muli ondo' rondo' poyo ra ama' kuli. Minindagu Kou riso ra intor ra papag nano magail mokoondo' sangulun koson mamarinta koson ra raja' ru Israil, ondo' ayuk ra ilo totopot gumagaya' Rirun koson ra Raja' Daut.

²⁶Ginio ra, iou i Aki Kapuuno' ru Israil, suguto' noyo ngaangai' ondo' binantu' Muno ra ama' kuli Raja' Daut, ulipon Muno.

²⁷“Kaa' iou Aki Kapuuno', totopot Kou kia masaga' mayan ra tana' ti? Kabalu' ra titikop ru limbowon pana kalo sama' malangka' Rirun, atan poyo ra Baloi ondo' binaal kutu!

²⁸Iou TUHAN, i Aki Kapuuno' kuno, aku ti ulipon Mu. Rongogo' pakiasian kutu am iowo' kitaakon kutu ra orou raiti'.

²⁹Sindungi' noyo Baloi ti orou am rondom, intok ondo' pinili' Muno koson ra intok sambayangan Rirun. Rongogo' noyo aku paat ra aku tumingkuang ra intok ti am makiasi' Rirun.

³⁰Rongogo' noyo pakiasian kutu am pakiasian ru ulun Muno paat ra ilo tumingkuang ra intok ti am makiasi'. Intor ra intok inayanan Muno giu' ra suruga', rongogo' noyo akai am ampuno' noyo akai.

³¹“Paat ra sasangulun inuwan ra makasala ra ulun ra bokon, am sinusub magibot giu' ra saang ru altar ra Baloi ti ra io kolondo' sala,

³²rongogo' noyo intor ra suruga', iou TUHAN, am akimi' noyo ulipon-ulipon Muno. Ukumi' noyo ulun ondo' makasala nogondo' ra binaal nano am palabuso' noyo ulun ondo' kolondo' sala.

³³“Paat ra ulun Muno Israil kalaan ru pantula' sabap ra makatula ilo Rirun, am sumaguli' ilo Rirun am matong ra Baloi ti am niayuk makiasi' Rirun mabaya' ra minggana' guang am makiampun,

³⁴gama' ru Okou giu' ra suruga', mangkirongog risilo. Ampuno' noyo tula ru ulun Muno, am ibito' noyo ilo sumaguli' ra pagun ondo' taakin Mu ra kinamatuaan nilai.

³⁵“Paat ra Okou napauog ra rasam sabap ra ulun Muno makatula noyo Rirun, am timinalikur ilo intor ra tula am tumingkuang ra Baloi ti, am makiasi' Rirun ra minggana' guang,

³⁶gama' ru Okou giu' ra suruga', mangkirongog risilo. Ampuno' noyo tula ru raja' am mamagun nano, ulun ru Israil. Mopongo raginio, iou TUHAN, patuuno' noyo rasam ra pagun Muti, ondo' pinataak Mu ra ulun Muno koson ra longgom nilo ra sabuoi-buoi no.

³⁷“Paat ra bitilan kapoam maruol tumapik masauk ra pagun ti, kapoam tatanom mapuso sabap ra angin malasu', maruol ru tutuu', kapoam inakan ru gapu'; kapoam paat ra ulun Muno bulunsaron ru pantula', kapoam matiu' ra maruol,

³⁸rongogo' noyo pakiasian nilo. Amon ru mokoondo' ra ulun ra gino ngai' ru ulun Muno Israil, ra mangiluk guang mopotoroi ra kalindu' am makiasi' Rirun liliwa' tumingkuang ra Baloi ti,

³⁹rongogo' noyo pakiasian nilo. Rongogo' noyo ilo intor ra intok inayanan Muno giu' ra suruga', am ampuno' am indangano' noyo ilo. Okou ayuk makapandai ra suang ru guang ru ulun. Ginio ra, baalo' noyo pamakuan ra ulun nogondo' ra binaal nano,

⁴⁰maa' raginio ulun Muno magail gumagaya' Rirun am mayan ra pagun ondo' tinaakan Muno ra kinamatuaan maili.

⁴¹“Paat ra sangulun bansa' ru bokon ondo' minayan giu' ra pagun maalur nokorongog ra kinaayo Muno, am niayuk intor ra kaimuagan-kaimuagan ondo' binaal Muno ra ulun Muno, am matong sumamba Rirun am makiasi' ra Baloi ti,

⁴²

⁴³rongogo' noyo pakiasian nano. Rongogo' noyo io intor ra intok inayanan Muno giu' ra suruga', am iowo' noyo kitaakon nano maa' raginio ngaangai' bansa' ra tana' ti makaulig Rirun am gumagaya' Rirun, koson ra ulun Muno Israil. Makapandai ilo boo ra Baloi ondo' binaal kutu iono intok sumambayang Rirun.

⁴⁴“Paat ra Okou mamarinta ra ulun Muno mangayou ra pantula', am makiasi' ilo Rirun ra ati ayuk intok nilo, liliwa' tumingkuang ra bandar ondo' pinili' Mutu am Baloi ti ondo' binaal kutu Rirun,

⁴⁵rongogo' noyo pakiasian nilo. Okou ondo' giu' ra suruga', rongogo' noyo ilo, am pamanango' ilo no.

⁴⁶“Paat ra ulun Muno makatula Rirun — sabap ra kolondo' osoi pana ondo' kolondo' tula — am sabap ra sangit Muno polosoon Mu ilo kalaan, rokopon ru pantula' am ibiton ra pagun ra bokon, kabalu' pana pagun no maalur,

⁴⁷rongogo' noyo ulun Muno. Amon ru tumalikur ilo intor ra tula am makiasi' Rirun ra pagun no, am niayuk mangiou ra makatula ilo am mambaal ra malaat, rongogo' noyo pakiasian nilo, iou TUHAN.

⁴⁸Amon ru giu' ra pagun no topot-topot ilo timinalikur intor ra tula, am makiasi' Rirun liliwa' tumingkuang tampilon ra pagun ti ondo' tinaakan Mu noyo ra kinamatuaan maili am tampilon ra bandar ondo' pinili' Muno, am niayuk Baloi ti ondo' binaal kuno Rirun,

⁴⁹rongogo' noyo pakiasian nilo. Intor ra intok inayanan Muno giu' ra suruga', rongogo' noyo kitaakon nilo am pakaasi' noyo risilo.

⁵⁰Ampuno' noyo ngaangai' tula am guor nilo Rirun, am baalo' pantula' nilono makaasi' risilo.

⁵¹Ilo ulun Muno galama', ondo' inibit Muno miningkual intor ra Misir, intok nilo inimbolo'.

⁵²“Iou TUHAN Raja', gama' ru magail Kou mangiou ra ulun Muno Israil am raja' nilo. Rongogo' noyo pakiasian nilo ra moonong ilo makiasi' Rirun ra makiindangan.

⁵³Nampili' Kou risilo intor ra ngaangai' bansa' koson masauk ra ulun Muno galama'; ginio noyo ragu Muno risilo mansail ra ulipon Muno i Musa, paat ra Okou nagibit ra kinamatuaan maili miningkual intor ra Misir.”

⁵⁴Koon raginio noyo Raja' Salomo nakiasi' ra TUHAN liliwa' minigulatur am nopotoroi ra kalindu'. Kopongo raginio bigor io ra saang ru altar.

⁵⁵Ra bolos mosongou pakiasi' io nakitaak ra TUHAN mambarakat ra ngaangai' ulun ondo' timinimung ra giu' no, kono,

⁵⁶“Koompor noyo TUHAN ondo' nanaak ra ulun Nano ra kaansayan koson ra ondo' binantu' Nano ondo' pinabala' galing ri Musa, ulipon Nano. Ngaangai' ondo' moonsoi ondo' binantu' Nano sinugut No noyo.

⁵⁷Gama' ru TUHAN, i Aki Kapuuno' takau mabaya' ritakau koson ra Io mabaya' ra kinamatuaan takali. Gama' ru kalo mangiruan Io ritakau kapoam mangimpai ritakau.

⁵⁸Gama' ru mampasauk Io ritakau ra ulun ondo' gumagaya' Riso maa' raginio magail takau maayag sumugut ra kasagaan Nano, am gumagaya' ra ngaangai' ukum am susuban ondo' tinaakan No ra kinamatuaan takali.

⁵⁹Gama' ru TUHAN, i Aki Kapuuno' takau, magail makakara' ra pakiasian am kitaakon ondo' posoboyon ku Riso ti. Gama' ru magail Io makaasi' ra ulun Nano Israil am raja' nilo, ra mangani' risilo ra atan ayuk ondo' makapakuan ra moonong orou.

⁶⁰Koon raginio ra ngaangai' bansa' ra tana' ti makapandai ra TUHAN ayuk i Aki Kapuuno', am kolondo' bokon.

⁶¹Gama' ru akau ulun Nano magail gumagaya' ra TUHAN, i Aki Kapuuno' takau, liliwa' gumagaya' ra ngaangai' ukum am susuban Nano koson ra baalon min ra orou raiti'.”

⁶²Kopongo raginio Raja' Salomo am ngaangai' ulun ondo' natitimung ra giu' no nampataak ra taak simbalui ra TUHAN.

⁶³Raja' Salomo nampataak ra 22,000 ngainan sapi' am 120,000 ngainan domba koson ra taak simbalui koson makibarakat ra TUHAN.[19] Koon raginio noyo Raja' Salomo am ngaangai' ru mamagun napaugar ra patimpokon Baloi ru TUHAN.

⁶⁴Paat ra orou raginio niayuk patimpokon ru raja' tampilon ra tanga' ru liliut, iono intok tampilon ra saang ru Baloi ru TUHAN. Giu' no nampataak io ra taak simbalui koson mapabansuk ra guang ru TUHAN,[20] taak simbalui koson paringkuanangan[21] am lomok ru bibiag intor ra taak simbalui koson makibarakat ra TUHAN.[22] Napataak raja' ra ngaangai' no ra giu' no sabap ra altar gangsa' ondo' binaal nano, boborok kaga' koson ra ngaangai' ru taak simbalui no.

⁶⁵Giu' ra Baloi ru TUHAN no niayuk, Raja' Salomo am ngaangai' ru ulun ru Israil mangiantak ra Mangkalukub ra Raun buoi tulu' ngoorou.[23] Masuang kaga' ulun matong mangiantak ra pangiantakan no. Intor ilo ra libung ra kinagalur ru Ginting Gamat giu' ra ralayo am balitan ru pagun ru Misir giu' ra rabugus.

⁶⁶Paat ra orou kabalu', Raja' Salomo nanusub ra ngaangai' ru ulun no muli'. Minuli' ilo ra naansukan, liliwa' mongompor ra raja' ra tayar ru ngaangai' barakat ondo' tinaakan ru TUHAN ra Raja' Daut, ulipon Nano, am ngaangai' ru ulun Nano Israil.