Read Timugon Murut 1 RAJA'-RAJA' 9 Bible Online

1 RAJA'-RAJA' 9 - Timugon Murut bible

1 RAJA'-RAJA' 9

¹Kopongo Raja' Salomo nambaal ra Baloi ru TUHAN am istana, am niayuk ngaangai' ondo' inatang nano,

²intalang poyo TUHAN no ra Raja' Salomo koson giu' ra Gibion ragili.

³Indagu TUHAN riso, “Norongog Ku noyo pakiasian muno. Patimpokon Ku Baloi ondo' binaal mutu koson ra intok sumambayang Raki' ra sabuoi-buoi no. Magail Aku magalung am manindung ra intok ti.

⁴Amon ru mangandoi kou ayuk Raki' ra topot-topot ru guang koson ra ama' muli i Daut, am amon ru gumagaya' kou ra ukum-ukum Kuno am niayuk mambaal ra ngaangai' ondo' nanusuban Kuno rirun,

⁵suguton Ku bantu' Kuno ra ama' muli i Daut, paat ra Aku minindagu riso ra papag nano magail mamarinta ra Israil.

⁶Kaa' amon ru okou kapoam papag muno kalo boo maya' Raki', am kalo gumagaya' ra ukum am susuban ondo' tinaakan Kuno rirun, am sumamba kou ra tuhan-tuhan ra bokon,

⁷patirin Ku ulun Kuno Israil intor ra pagun ondo' tinaakan Kuno risilo. Iruanin Ku niayuk Baloi ti ondo' timpokon Ku koson ra intok sumambayang Raki' ayuk. Ulun giu' ra ati-ati intok no manauyu' am magasab ra ulun ru Israil.

⁸Baloi ti masauk ra tuntur ru nangalunsai[24] saboi ra moonong ulun ondo' mansail ragiti maliangan am makasioro'. Mangkuot ilo, ‘Kua kia baalo' ru TUHAN koson raginio ra pagun am Baloi ti?’

⁹Ulun pana tumaam boo, ‘Sabap ra nangiruan ilo noyo ra TUHAN, i Aki Kapuuno' nilo ondo' nagibit ra kinamatuaan nilai miningkual intor ra Misir. Ilo no siminamba am nangandoi ra tuhan-tuhan ra bokon. Ginio sabap ra TUHAN naparatong ra karaat risilo.’ ”

¹⁰Ruo ngoopor ngambilor buoi ru Raja' Salomo nambaal ra Baloi ru TUHAN am istana nano.

¹¹Raja' Giram intor ra Tirus, nangani' riso ra ngaangai' tataun sidar ru Libanon, tataun sipris, mas am ngaangai' ondo' pinakai ru Raja' Salomo koson pambaalan raginio. Kopongo nambaalan no nopongo, nangani' Raja' Salomo ra Raja' Giram ra ruo ngoopor bandar giu' ra libung Galilia.

¹²Minongoi Raja' Giram pagilong ra bandar-bandar no, kaa' kalo masaga' io ra bandar-bandar no.

¹³Ginio ra indagu Raja' Giram ra Raja' Salomo, “Pabukat ku, gitio nai tupo baal ru bandar-bandar ondo' tinaakan muno raki'!” Ginio sabap ra libung no lakat poyo sabiton ra Kabul[25] saboi raino.

¹⁴Raja' Giram nangani' ra Raja' Salomo ra mas nasailan intor ra 4,000 ngakilogram.

¹⁵Raja' Salomo namakai ra kuli' koson mambaal ra Baloi ru TUHAN am istana ru raja', am koson mamumpun ra tana' giu' ra tampilon sirangon ru bandar, am niayuk mambaal ra timbok ru bandar. Io niayuk namakai ra kuli' koson mambaal saguli' ra bandar Gajor, Migido am Gijir. (

¹⁶Igondo' Raja' Misir namulunsar am nampagaau ra bandar Gijir, namatoi ra mamagun no, am niayuk nonolob ra bandar no. Kopongo raginio pinataak ru raja' ru Misir bandar no ra anak ruandu' nano koson ra tangguang ru paguatan, paat ra anak nano nagandu' ra Raja' Salomo.

¹⁷Kopongo raginio Raja' Salomo nambaal saguli' ra bandar raginio.) Namakai ra kuli', Raja' Salomo niayuk nambaal saguli' ra Bit-Oron-Rabugus,

¹⁸Baalat, Tamar giu' ra tana' kaagisan ru Jiuda,

¹⁹bandar-bandar intok pambulian ra inula', am niayuk bandar-bandar intok pambulian ra ngaangai' ru kuda am kurita' kuda. Ngaangai' inatangan ru pambaalan giu' ra Jirusalim, giu' ra Libanon, am giu' ra ati-ati intok ra titikop ru pamarintaan nano pinaugar noyo.

²⁰Kuli' ondo' pinangandoi ru Raja' Salomo iono papag ru ulun ru Kanaan, ondo' kalo pinatoi ru ulun ru Israil paat ra ilo nampagaau ra pagun no. Gitio nakaaya' ulun ru Amori, Git, Piris, Giwi am Jibusi ondo' papag nilo ti narayus nasauk ra inulipon saboi raino.

²²Raja' Salomo kalo napasauk ra osoi pana ra ulun ru Israil koson ra inulipon. Ilo no sinauk ra saujor, pagawai, panglima, tingganai ru pulalai mangkurita' kuda am ulun ru pulalai mangkuda.

²³Suang 550 ngaulun pagawai pinalansan ra koson magalung ra kandoi ru kuli' ralalom nansalinut projik pambaalan ra longgom ru Raja' Salomo.

²⁴Namumpun Raja' Salomo ra tana' giu' ra tampilon sirangon ru bandar no, kalupus andu' nano, anak ruandu' ru raja' ru Misir, minanding intor ra Bandar Daut minongoi ra istana ondo' binaal ru Raja' Salomo riso.

²⁵Intalu sambilor Raja' Salomo mampataak ra taak simbalui koson mapabansuk ra guang ru TUHAN[26] am taak simbalui koson makibarakat ra TUHAN[27] giu' ra rasawat ru altar ondo' binaal no tayar ru TUHAN. Raja' Salomo niayuk monolob ra kaminyan tayar ru TUHAN. Koon raginio noyo Raja' Salomo nomongo ra nambaalan ra Baloi ru TUHAN.

²⁶Raja' Salomo niayuk nambaal ra kapal-kapal giu' ra Ijion-Gibir, mamaar ra Ilot, giu' ra nagas ru Teluk Akaba, giu' ra tana' ru Idom.

²⁷Raja' Giram nangator ra kukula' ngaulun mangngandoi ra kapal nano ondo' nakaili' noyo koson mangandoi mababaya' ra ulun mangngandoi ra kapal ru Raja' Salomo.

²⁸Nasundoi ilo mongoi ra tana' Opir, am nagibit ra mas nasailan intor ra 14,000 ngakilogram pataakon ra Raja' Salomo.