Read Timugon Murut 2 RAJA'-RAJA' 1 Bible Online

2 RAJA'-RAJA' 1 - Timugon Murut bible

2 RAJA'-RAJA' 1

¹Kopongo minatoi Raja' Agab intor ra Israil no, pagun ru Moab no giminuor ra Israil.

²Paat ra sangarawan, Raja' Agajia intor ra Israil no naratu' intor ra langgar giu' ra tingkat rasawat ru istana nano giu' ra Samaria saboi napilatan raja' no ra masaran. Ginio ra nangator io ra kukula' ngaulun sinusub koson mangkuot ra Baal-Jibub, dewa ru ulun ru Palistin giu' ra bandar Ikron, mangimumui ru mapali' io kia kapoam kalo.

³Kaa' panusub malaikat ru TUHAN no ri Ilia, nabi intor ra Tisbi, mongoi tuum ra ulun sinusub ru Raja' Agajia am mangkuot risilo, “Kua ongoi kau pangkuot ra Baal-Jibub, dewa ru bandar Ikron no? Kalo kia nakapandai kau ra soroi i Aki Kapuuno' giu' ra Israil?

⁴Balai' raja' no ra koon raginio ragu ru TUHAN, ‘Kalo mapali' kou intor ra pilat-pilat muno. Matoi kou!’ ” Kopongo i Ilia nampasaboi ra ragu ru TUHAN no,

⁵saguli' ulun-ulun sinusub no ra raja'. Pangkuot raja' no, “Kua saguli' kau?”

⁶Taam ulun-ulun sinusub no, “Tinuum akai ru sangulun ungkuyon ondo' nanusub ramon sumaguli' am mambala' rirun ra minindagu TUHAN koon raginio rirun, ‘Kua kia pangator kou ra ulun sinusub koson mangkuot ra Baal-Jibub, dewa ru bandar Ikron no? Kalo kia nakapandai kou ra soroi i Aki Kapuuno' giu' ra Israil? Kalo mapali' kou intor ra pilat-pilat muno. Matoi kou!’ ”

⁷Pangkuot raja' no, “Ati kulaan baal ru ulun i?”

⁸Taam ilo, “Nansukub io ondo' binaal intor ra kungkung ru bibiag, am inabot ra[1] abot intor ra kungkung.” Golok raja' no, “Ulun no i Ilia!”

⁹Kopongo raginio panusub raja' no ra sangulun pagawai ru saujor nano mabaya' ra limo ngoopor ngaulun mongoi pamparakop ri Ilia. Natuum ru pagawai no i Ilia ondo' tatanga' manturung giu' ra rasawat ru bulur, am kono riso, “Okou ulipon ri Aki Kapuuno', nanusub raja' no rirun tumuun.”

¹⁰Taam i Ilia, “Amon ru aku ti ulipon ri Aki Kapuuno', polosoo' noyo apui rumatu' intor ra limbowon am mamatoi rirun am ulun-ulun muno!” Paat raginio niayuk apui riminatu' am namatoi ra pagawai no am niayuk ulun-ulun nano.

¹¹Panusub raja' no ra sangulun pagawai ru saujor ra bokon mabaya' ra limo ngoopor ngaulun. Ongoi ilo am indagu ri Ilia, “Okou ulipon ri Aki Kapuuno', nanusub raja' no rirun tumuun raino niayuk!”

¹²Taam i Ilia, “Amon ru aku ti ulipon ri Aki Kapuuno', polosoon noyo apui rumatu' intor ra limbowon am mamatoi rirun am niayuk ulun-ulun muno!” Paat raginio niayuk nampatuun i Aki Kapuuno' ra apui am namatoi ra pagawai no am niayuk ulun-ulun nano.

¹³Igondo' poyo panusub raja' no ra sangulun pagawai ru saujor mabaya' ra limo ngoopor ngaulun. Pagawai no nagaloi ra rasawat ru bulur am kuku' samba ra saang ri Ilia liliwa' mikikimasi', “Okou ulipon ri Aki Kapuuno', pakaasi' no raki' am ulun-ulun kuno. Pai' pamatoi ramon!

¹⁴Ruo ngaulun pagawai ru saujor ra bokon am ulun-ulun nilo pinatoi ru apui intor ra limbowon, kaa' pakaasi' no raki'!”

¹⁵Paat raginio niayuk malaikat ru TUHAN mindagu ri Ilia, “Tuun no mabaya' riso, am pai' kalaa'.” Ginio ra ongoi i Ilia nabaya' ra pagawai no, am uma' ra raja'.

¹⁶Kon ri Ilia ra raja', “Koon raginio noyo ragu ru TUHAN, ‘Sabap no ra okou nangator ra ulun sinusub koson mangkuot ra Baal-Jibub, dewa ru bandar Ikron — ilain koson kolondo' i Aki Kapuuno' giu' ra Israil koson kuatin — kalo mapali' kou; matoi kou!’ ”

¹⁷Raja' Agajia pana minatoi boo nontopot koson ra ragu ru TUHAN ondo' pinasaboi ri Ilia. Kolondo' anak ungkuyon ru Raja' Agajia, ginio ra pabukat nano i Joram namalit riso koson ra raja'. Baal ragitio nasauk paat ra bilor karuo ru pamarintaan ru Raja' Jigoram anak ungkuyon ru Raja' Josapat giu' ra Jiuda.

¹⁸Ngaangai' binaal ru Raja' Agajia tinulisan ralalom ru buuk Sejarah ru Raja'-Raja' ru Israil.