Read Timugon Murut 2 RAJA'-RAJA' 11 Bible Online

2 RAJA'-RAJA' 11 - Timugon Murut bible

2 RAJA'-RAJA' 11

¹Paat ri Atalya, ina' ru Raja' Agajia, nokorongog ra namatayan ra anak ungkuyon nano, ina' ru raja' no nanusub maa' raginio ngaangai' pabukat ru raja' potoyon.

²I Joas ayuk, anak ungkuyon ru Raja' Agajia ondo' nakapagiru' intor ra pamatayan no. Maar noyo mapatoi i Joas mababaya' ra anak ungkuyon ru raja' ra bokon, kaa' i Joas binayag ru kaminan nano, i Josiba anak ruandu' ru Raja' Jigoram; i Josiba pabukat ru Raja' Agajia, rondo' ama' nansuai ra ina'. I Josiba nagibit ri Joas am magagalung ri Joas ra rondo' lamin giu' ra Baloi ru TUHAN am nampasibuni riso intor ri Atalya, maa' raginio i Joas kalo mapatoi.

³Onom ngambilor buoi ri Josiba nagalung ri Joas am niayuk nampasibuni riso giu' ra Baloi ru TUHAN, liliwa' i Atalya mamarinta koson ra raja' ruandu'.

⁴Kaa' paat ra bilor katulu', Imam Joyada nanusub ra tingganai-tingganai ru pulalai magagalung ra raja' am magagalung ra istana koson muma' riso giu' ra Baloi ru TUHAN. Panusub io risilo magibot maa' raginio maya' ra inatangan nano. Nampakito io ri Joas, anak ungkuyon ru Raja' Agajia no risilo

⁵am nanusub ragitio, “Paat ra akau mangandoi ra orou Sabat, sampitalu intor ramuyun musiti' magalung ra istana;

⁶sampitalu poyo musiti' magalung giu' ra Kulobon Garabang Sur am ondo' bokon no magalung giu' ra talikuron ru magagalung-magagalung ra bokon.

⁷Ruo pulalai ondo' tumangus paat ra orou Sabat musiti' magalung giu' ra Baloi ru TUHAN koson magalung ra raja'.

⁸Akau musiti' magalung ri Joas ra ilang ondo' paakangon am mamaya' riso ra ati ayuk angayan nano. Osoi ayuk pana ondo' minggaar no musiti' min potoyon.”

⁹Ginagaya' ru tingganai-tingganai no susuban ri Joyada am nagibit ra pulalai nilo riso, iono ulun ondo' timinangus paat ra orou Sabat am ilo ondo' mangandoi paat ra orou Sabat.

¹⁰Nangani' i Joyada ra tingganai-tingganai no ra tutura' am perisai longgom ru Raja' Daut, ondo' binulian giu' ra Baloi ru TUHAN.

¹¹Nanusub i Joyada ra ulun-ulun magagalung ondo' nagibit ra ilang paakangon maa' raginio magalung giu' ra liput tampilon ra saang ru Baloi ru TUHAN koson mangampin ra raja'.

¹²Kopongo raginio nagibit i Joyada ri Joas miningkual, am nampakaraun ri Joas am nangani' riso ra rondo' ralin ru ukum intor ra pamarintaan ru raja'. I Joas pana linantik boo ra raja' am baal raginio pinatanou ra mamagun. Mamagun nagilakup liliwa' giminolok, “Kaayag no raja'!”

¹³Raja' Ruandu' Atalya nokorongog ra ginia' ru ulun-ulun magagalung am mamagun, Raja' Ruandu' Atalya pana nagindibok minongoi giu' ra Baloi ru TUHAN, intok ru ulun masuang timinimung.

¹⁴Nakito ru Raja' Ruandu' Atalya no raja' bagu no minigor ra sapapa' ru lugu', maar ra kulobon ru Baloi ru TUHAN, intok ru raja' no linantik. Raja' bagu no liniputan ru pagawai-pagawai am ulun manamput ra bujung. Ngaangai' ru mamagun posogolos am maansukan, liliwa' nanamput ra bujung. Raja' Ruandu' Atalya namparilak ra bayang nano sabap ra mangiluk guang, am golok, “Mamparuung! Mamparuung!”

¹⁵Kalo mangiou i Joyada ra Raja' Ruandu' Atalya potoyon giu' ra liliut ru Baloi ru TUHAN. Kon ri Joyada ra tingganai-tingganai ru pulalai nano, “Ibito' raja' ruandu' no mugar mansail ra barisan ru ulun magagalung. Potoyo' osoi ayuk ondo' kuminam mamayag ra raja' ruandu' no.”

¹⁶Namparakop ilo ra Raja' Ruandu' Atalya, am ibito' io giu' ra istana, am namatoi ra raja' ruandu' no giu' ra Kulobon Garabang ru Kuda.

¹⁷Panusub Imam Joyada ra Raja' Joas am mamagun mambaal ra rondo' nabantuan ra TUHAN ra masauk ilo ra ulun ru TUHAN. Nambaal i Joyada niayuk ra nabantuan ru raja' am mamagun.

¹⁸Kopongo raginio umpos mamagun ra ralalom ru kuil Baal am nampalunsai ra kuil no. Inumok nilo ngaangai' altar am sinungkalalaing sambaan ra giu' no. Namatoi ilo ri Matan, imam ru Baal, giu' ra saang ru altar-altar no. Panusub i Joyada ra ulun-ulun magagalung ra magalung giu' ra Baloi ru TUHAN,

¹⁹am i Joyada galama', pagawai-pagawai nano, ulun magalung ra raja', am ulun magalung ra istana, magalung ra raja' intor ra Baloi ru TUHAN mongoi ra istana, liliwa' binaya' ru ngaangai' mamagun. Umpos Raja' Joas ra istana nansail ra Kulobon Magagalung am panturung ra rasawat ru panturungan ru raja'.

²⁰Ngaangai' ulun maansukan am bandar pana nasauk ra mamimio sabap i Atalya pinatoi noyo giu' ra istana.

²¹Tulu' ngambilor umur ru Raja' Joas paat io nasauk ra raja' ru Jiuda.