Read Timugon Murut 2 RAJA'-RAJA' 12 Bible Online

2 RAJA'-RAJA' 12 - Timugon Murut bible

2 RAJA'-RAJA' 12

¹Paat ra bilor katulu' ru pamarintaan ru Raja' Jigu giu' ra Israil, Raja' Joas nasauk ra raja' ru Jiuda. Raja' Joas namarinta giu' ra Jirusalim ra apat ngoopor ngambilor buoi no. Ina' nano makainggalan ri Jibya intor ra bandar Birsyiba.

²Buoi ru bayag nano nambaal Raja' Joas ra baal-baal ondo' kaansayin ru TUHAN, sabap Imam Joyada maminson riso.

³Kabalu' pana raginio, intok sambaan ra dewa kalo pinuso, am mamagun lakat poyo mampataak ra taak simbalui am niayuk monolob ra kaminyan ra giu' no.

⁴Pampiau Raja' Joas ra imam-imam am panusub risilo manimung ra ruit ondo' inapu koson ra pataakon giu' ra Baloi ru TUHAN, ondo' ruit pinambayar ra manalingapu ra taak simbalui, am niayuk ruit pataakon ayuk toojo.

⁵Moonong imam pinalansan ra ruit ondo' apuon intor ra ulun manaak, am ruit no pakayon koson mamuna' ra Baloi ru TUHAN.

⁶Kaa' saboi ra bilor karuo ngoopor am talu ru pamarintaan ru Raja' Joas, imam-imam no lakat poyo kalo namuna' ra nangalunsai giu' ra Baloi ru TUHAN.

⁷Ginio ra pampiau Raja' Joas ri Joyada am imam-imam ra bokon, am pangkuot risilo, “Kua kia kalo poyo namuna' kau ra Baloi ru TUHAN? Tumalimpuun raino akau kalo iowon mambuli ra ruit ondo' maapu mino. Musiti' min pataakon ngaangai' no koson mamuna' ra Baloi ru TUHAN.”

⁸Imam-imam no nangiou koson kalo manimung ra ruit ru mamagun am niayuk nangiou koson kalo manalingapu ra pamunaan ra Baloi ru TUHAN.

⁹Kopongo raginio pangalap i Joyada rondo' kaban am luangi' no tataub no, am pabantaa' ra sapapa' ru altar, giu' ra tampilon pamiris ru kulobon umpasan ra Baloi ru TUHAN. Imam-imam ondo' mangandoi ra kulobon no mampasubol ra ngaangai' ruit pataakon ondo' apuon intor ra ulun masuang ra ralalom ru kaban no.

¹⁰Pogonong raginio, paat ra ruit ralalom ru kaban no masuang noyo, mamamatik ru raja' am Tingganai Maayo Imam matong koson manguntob ra ruit ondo' soroi ra giu' no, am pasubolon ginilo ra ralalom ru kantungan.[16]

¹¹Kopongo nanulis ra suang ru ruit ra motopot, pataako' nilo ruit no ra pagawai-pagawai ondo' magalung ra pamunaan ra Baloi ru TUHAN. Pagawai-pagawai no pana mambayar ra gaji' ru ulun mangintaun, ulun manambaloi,

¹²ulun mangimbatu am ulun manuyu' ra batu. Ilo niayuk nambali ra tataun am batu koson mamuna' ra Baloi ru TUHAN, am niayuk nambayar ra ngaangai' balanja' ra bokon.

¹³Ruit no kalo pinakai koson mambayar ra mambaal ra sangkir pirok, mangkuk, bujung kapoam kuliamos ru lampung, kapoam kuliamos ra bokon ondo' binaal intor ra pirok kapoam mas.

¹⁴Ngaangai' ru ruit no pinakai koson mambayar ra gaji' ru ulun manukang am koson mambali ra kuliamos-kuliamos ondo' makapakuan.

¹⁵Pagawai-pagawai ondo' mantamung ra kandoi no mabanis toojo guang. Ginio ra kalo kitaakon ilo mambaal ra laporan ru ruit.

¹⁶Ruit ondo' apuon ra tayar ru taak simbalui no koson mambayar ra kalubatan am taak simbalui koson mangampun ra tula kalo pasubolon ra kaban no. Ruit raginio pataakon ra imam-imam.

¹⁷Paat raginio Raja' Gajail, raja' ru Siria namulunsar ra bandar Gat am kinala no. Kopongo raginio makaguang io mamulunsar ra Jirusalim.

¹⁸Raja' Joas, panguasa' ru Jiuda, nanimung ra ngaangai' taak ondo' patimpokon noyo ra TUHAN ru raja'-raja' ondo' namarinta ra nakapagulu riso, iono Raja' Josapat, Raja' Jigoram am Raja' Agajia. Raja' Joas namparuang raginio ra taak nano galama' am niayuk ngaangai' mas giu' ra ralalom ru pambulian ra kuliamos ru Baloi ru TUHAN am istana. Kopongo raginio ngaangai' no inataran ru Raja' Joas ra Raja' Gajail. Ginio ra Raja' Gajail kalo nanugut ra guangon nano koson mamulunsar ra Jirusalim.

¹⁹Ngaangai' binaal ru Raja' Joas tinulisan ra ralalom ru buuk Sejarah ru Raja'-Raja' Jiuda.

²⁰Pagawai-pagawai ru Raja' Joas naguguum manggal riso. Ruo ngaulun intor risilo, iono i Jojakar anak ri Simiat am i anak ri Somir, namatoi ra Raja' Joas giu' ra baloi ondo' binaal ra rasawat ru namumpunan ra tana' giu' ra tampilon sirangon ru Jirusalim, iono giu' ra ralan mongoi ra bandar Sila. Raja' Joas linobong giu' ra kalabangan ru raja' giu' ra Bandar Daut, am i Amajia, anak ungkuyon nano minalit riso koson raja'.