Read Timugon Murut 2 RAJA'-RAJA' 13 Bible Online

2 RAJA'-RAJA' 13 - Timugon Murut bible

2 RAJA'-RAJA' 13

¹Paat ra bilor karuo ngoopor am talu ru pamarintaan ru Raja' Joas anak ungkuyon ru Raja' Agajia giu' ra Jiuda, Raja' Jigoagas anak ungkuyon ru Raja' Jigu nasauk ra raja' giu' ra Israil, am namarinta io giu' ra Samaria buoi mopor am tulu' ngambilor.

²Koson ra Raja' Jirobiam ondo' namarinta ra nakapagulu riso, Raja' Jigoagas niayuk makatula ra TUHAN am nangkinibit ra ulun ru Israil makatula.

³Ginio ra siminangit TUHAN ra Israil. TUHAN nopoloso ra Raja' Gajail, raja' ru Siria am Raja' Bingadad anak ungkuyon ru Raja' Gajail, ruruli' nangala ra Israil.

⁴Kopongo raginio Raja' Jigoagas nakiasi' ra TUHAN, am nakapandai TUHAN ra mapara' kinalaat ru raja' ru Siria nangimbolo' ra ulun ru Israil. Nangiou boo TUHAN ra pakiasian ru Raja' Jigoagas.

⁵Nangator TUHAN ra sangulun tingganai ondo' nampalabus ra Israil intor ra pangimbalaan ru ulun ru Siria. Intor ragili Israil naayag ra mamimio koson ra kaindalaman.

⁶Kaa' ilo lakat poyo kalo timinalikur intor ra tula ondo' nakinibitan ru Raja' Jirobiam. Kalo liminonggo' ilo ra nambaal ra tula, am sinungkalalaing ru Dewi Asyira lakat poyo soroi ra Samaria.

⁷Kolondo' boo ra Raja' Jigoagas no pulalai mangayou ondo' ak am limo ngoopor ngaulun saujor mangkuda, mopor kurita' kuda, am mopor ngaribu ngaulun saujor mantana'. Raja' ru Siria namuso ra pulalai mangayou ru Raja' Jigoagas am kikinjangi' no ilo koson ra kaau.

⁸Ngaangai' binaal ru Raja' Jigoagas, nakaaya' kinapanggol nano, tinulisan ra ralalom ru buuk Sejarah ru Raja'-Raja' ru Israil.

⁹Raja' Jigoagas minatoi am linobong giu' ra Samaria. I Jigoas, anak ungkuyon nano minalit riso koson ra raja'.

¹⁰Paat ra bilor katalu ngoopor am tulu' ru pamarintaan ru Raja' Joas giu' ra Jiuda, Raja' Jigoas anak ungkuyon ru Raja' Jigoagas nasauk ra raja' giu' ra Israil, am namarinta io giu' ra Samaria buoi no mopor am onom ngambilor.

¹¹Raja' Jigoas niayuk makatula ra TUHAN, am minaya' ra binaal ru Raja' Jirobiam ondo' nangkinibit ra ulun ru Israil makatula.

¹²Ngaangai' binaal ru Raja' Jigoas, nakaaya' kinapanggol tumula' nano ralalom pangayawan manggal ra Raja' Amajia intor ra Jiuda, tinulisan ra ralalom ru buuk Sejarah ru Raja'-Raja' ru Israil.

¹³Raja' Jigoas minatoi am linobong giu' ra kalabangan ru raja' giu' ra Samaria, am i Jirobiam II, anak ungkuyon nano minalit riso koson ra raja'.

¹⁴Rondo' paat ri Ilisa, nabi no marualan ra masaran. Paat ri Ilisa maar matoi, Raja' Jigoas, raja' ru Israil no minatong pagilong riso. Liliwa' mantangi' indagu Raja' Jigoas, “Ama' kuno, ama' kuno! Okou noyo manaung ra Israil ondo' mapanggol!”

¹⁵Kon ri Ilisa riso, “Alapo' panah ti am kukula' ngantaun pamanah no.” Raja' Jigoas pana nangalap raginio.

¹⁶Panusub i Ilisa ra Raja' Jigoas tumampos koson mamanah, am io pana timinampos. Patampako' ri Ilisa kalindu' nano ra kalindu' ru raja'.

¹⁷Kopongo raginio, nabaya' ra susuban ru nabi no, ukabo' ru Raja' Jigoas gigimpalan ondo' tumingkuang ra pagun ru Siria. Kon ri Ilisa, “Palabuso' pamanah no!” Pakalabus ayuk ru raja' pamanah no, kon ru nabi no, “Okou raja' noyo pamanah ru TUHAN. Mumbaya' rirun raja', kalaan ru TUHAN pagun ru Siria. Okou raja' mampapatoi ra ulun ru Siria giu' ra Apik saboi kou mangala risilo.”

¹⁸Kopongo raginio panusub i Ilisa ra raja' mangalap ra pamanah ra bokon am mapalamba' ra tana' ra pamanah no. Lambaa' ru raja' no tana' saboi intalu am langgai'.

¹⁹Sangit i Ilisa am kono ra raja', “Kua kalo linamba' mu inlimo kapoam inggonom maa' raginio malingon mu maala ulun ru Siria? Kaa' raino intalu kou ayuk makapangala ra ulun ru Siria.”

²⁰Kalo nabuoi raginio i Ilisa minatoi am linobong. Moonong bilor, santimungan ulun malaat ru Moab maindalom mamulunsar ra pagun ru Israil.

²¹Paat ra sangarawan no, bulintok ra ulun ru Israil tatanga' mompolobong ra ulun minatoi, nakito nilo santimungan ulun malaat ru Moab. Sabap ra nangalaa', pinapatir nilo baangkai no ra ralalom ru lobong ri Ilisa am pagigiru'.[17] Pakatiu' ayuk baangkai no ra bungul-bungul ri Ilisa, kaayag saguli' baangkai no am bigor.

²²Buoi ra pamarintaan ru Raja' Jigoagas, Raja' Gajail intor ra Siria nangimbolo' ra ulun ru Israil.

²³Kaa' moonsoi guang ru TUHAN ra ulun ru Israil am makaasi' Io risilo. Kalo mopoloso Io ra ulun ru Israil pusoon. Mangindangan Io risilo sabap ra nabantuan Nano am i Abragam, i Isak am i Jakub. Kalo igondo' TUHAN nampalilian ra ulun Nano.

²⁴Paat ra Raja' Gajail intor ra Siria no minatoi, i Bingadad anak ungkuyon nano nasauk ra raja'.

²⁵Paat raginio Raja' Jigoas intor ra Israil, intalu nangala ra Raja' Bingadad. Raja' Jigoas nampagaau saguli' ra bandar-bandar ondo' pinarinta ru Raja' Bingadad paat ra pamarintaan ru Raja' Jigoagas, ama' ru Raja' Jigoas.