Read Timugon Murut 2 RAJA'-RAJA' 14 Bible Online

2 RAJA'-RAJA' 14 - Timugon Murut bible

2 RAJA'-RAJA' 14

¹Paat ra bilor karuo pamarintaan ru Raja' Jigoas anak ungkuyon ru Raja' Jigoagas giu' ra Israil, Raja' Amajia anak ungkuyon ru Raja' Joas nasauk ra raja' giu' ra Jiuda.

²Paat raginio umur ru Raja' Amajia ruo ngoopor am limo ngambilor. Namarinta io giu' ra Jirusalim buoi ruo ngoopor am siam ngambilor. Ina' nano makainggalan ri Jigoadin intor ra Jirusalim.

³Nambaal Raja' Amajia ra atan ondo' mapabansuk ra guang ru TUHAN, kaa' io kalo koson ra kinamatuaan nali Raja' Daut. Minaya' io ra ondo' binaal ru ama' nali Raja' Joas.

⁴Kalo linunsai ru Raja' Amajia intok-intok sambaan ra sinungkalalaing am mamagun kalo lumonggo' mampataak ra taak simbalui am niayuk monolob ra kaminyan ra giu' no.

⁵Paat ra pamarintaan ru Raja' Amajia maikang noyo, namatoi io ra pagawai-pagawai ondo' namatoi ra ama' nali, raja' ondo' nagulu namarinta intor riso.

⁶Raja' Amajia kalo namatoi ra anak-anak nilo sabap ra siminugut io ra susuban ru TUHAN ralalom ru Ukum ri Musa ondo' mokobolos koon raginio, “Matuo kalo paukumin ra matoi sabap ra kasalaan ru anak nilo. Anak-anak kalo paukumin ra matoi sabap ra kasalaan ru matuo nilo. Moonong ulun musiti' ukumin ra matoi sabap ra kasalaan ondo' binaal nano galama' ayuk.”

⁷Raja' Amajia namatoi ra mopor ngaribu ngaulun saujor giu' ra Limayak Asin, am nampagaau ra bandar Sila. Ininggalanan no bandar no ra Joktiil. Saboi raino bandar no lakat poyo makainggalan ra Joktiil.

⁸Kopongo raginio nanusub Raja' Amajia ra kukula' ngaulun mongoi ra Raja' Jigoas giu' ra Israil koson magangat riso makimangayou.

⁹Kaa' taam Raja' Jigoas ra pagangatan no koon raginio, “Rondo' paat no ra bulungkut makaruui giu' ra Gunung Libanon mangator ra tanou ra puun sidar, ‘Iowo' noyo anak ruandu' muno magandu' ra anak ungkuyon kuno.’ Kaa' sanginan bibiag masigo nansail ra giu' no am nanginjang ra bulungkut makaruui no.

¹⁰Okou Raja' Amajia, malupus nangala ra ulun ru Idom, Raja' Amajia nasauk ra malilimbau! Mamanggo ra kamanangan raino am porondon no ra baloi. Kua paguguyum ra panguyatan ondo' pupus no maparatong ra karaat ra inan ru Raja' Amajia am mamagun?”

¹¹Kaa' Raja' Amajia kalo nampalio ra bilin raginio. Raja' Jigoas pana am saujor-saujor nano miningkual minanggal ra Raja' Amajia giu' ra Bit-Simis giu' ra Jiuda.

¹²Saujor ru Raja' Amajia kinala, am ngaangai' saujor nano nagigiru' minuli' ra baloi ru sigagama'.

¹³Rinakop ru Raja' Jigoas no Raja' Amajia, am namparayus ra pamulunsaran nano giu' ra Jirusalim. Tinuyas no timbok ru bandar ra kinagalur ru 200 ngamito, intor ra Kulobon Garabang Ipraim saboi ra Kulobon Garabang Pisuk.

¹⁴Inalap ru Raja' Jigoas ngaangai' pirok am mas ondo' natuum nano, ngaangai' kakamot ru Baloi ru TUHAN am ngaangai' kuliamos ru istana, am saguli' io ra Samaria. Io niayuk nagibit ra kukula' ngaulun rinakop nababaya' riso.

¹⁵Ngaangai' binaal ru Raja' Jigoas, nakaaya' kinapanggol nano tumula' ralalom ru pangayawan minanggal ra Raja' Amajia intor ra Jiuda tinulisan ra ralalom ru buuk Sejarah ru Raja'-Raja' ru Israil.

¹⁶Raja' Jigoas minatoi am linobong giu' ra kalabangan ru raja' giu' ra Samaria. Kopongo raginio i Jirobiam II, anak ungkuyon nano minalit riso koson ra raja'.

¹⁷Raja' Amajia, raja' ru Jiuda, naayag mopor am limo ngambilor poyo nalupus pinatayan ru Raja' Jigoas, raja' ru Israil.

¹⁸Ngaangai' binaal ru Raja' Amajia tinulisan ra ralalom ru buuk Sejarah ru Raja'-Raja' ru Jiuda.

¹⁹Kukula' ngaulun giu' ra Jirusalim naguguum koson mamatoi ra Raja' Amajia. Ginio ra nagiru' io minongoi ra bandar Lakgis, kaa' inilou io ru pantula'-pantula' nano ra giu' no am namatoi riso.

²⁰Kopongo raginio baangkai ru Raja' Amajia inaut ra kuda minongoi ra Jirusalim, am linobong giu' ra kalabangan ru raja' giu' ra Bandar Daut.

²¹Mamagun ru Jiuda nampalantik ri Ujia,[18] anak ungkuyon ru Raja' Amajia, ondo' makaumur mopor am onom ngambilor nasauk ra raja'.

²²Kopongo pinatayan ru ama' nano, Raja' Ujia nampagaau saguli' ra bandar Ilat, am nanirong raginio saguli'.

²³Paat ra bilor koopor am limo ra pamarintaan ru Raja' Amajia anak ungkuyon ru Raja' Joas giu' ra Jiuda, Raja' Jirobiam anak ungkuyon ru Raja' Jigoas nasauk ra raja' giu' ra Israil. Namarinta Raja' Jirobiam giu' ra Samaria buoi apat ngoopor am rondo' ngambilor.

²⁴Makatula Raja' Jirobiam ra TUHAN, sabap minaya' ra binaal ru Raja' Jirobiam anak ri Nibat, raja' ra nakapagulu i, ondo' nangkinibit ra ulun ru Israil makatula.

²⁵Raja' Jirobiam nampagaau saguli' ra ngaangai' wilayah ondo' ragili linonggom ru Israil, intor ra Ginting Gamat giu' ra ralayo saboi ra Raat Matoi giu' ra rabugus. Koon raginio noyo ondo' binantu' ragili ru TUHAN, i Aki Kapuuno' ru Israil, pinabala' galing ra ulipon Nano, Nabi Junus anak ri Amitai intor ra Gat-Gipir.

²⁶Nakito ru TUHAN ra ulun ru Israil naimbolo' kaga', am kolondo' osoi pana mangindangan risilo.

²⁷Kolondo' guang ru TUHAN koson mamuso ra Israil ra sabuoi-buoi no. Ginio ra namayag Io risilo pinaumbaya' ra Raja' Jirobiam II.

²⁸Ngaangai' binaal ru Raja' Jirobiam II, nakasimpung kinapanggol nano ralalom pangayawan am ati kulaan io nampagaau saguli' ra Damsyik am Gamat intor ra Jiuda koson ra Israil, tinulisan ralalom ru buuk Sejarah ru Raja'-Raja' ru Israil.

²⁹Raja' Jirobiam minatoi am linobong giu' ra kalabangan ru raja'. I Jakaria anak ungkuyon nano namalit riso koson ra raja'.