Read Timugon Murut 2 RAJA'-RAJA' 16 Bible Online

2 RAJA'-RAJA' 16 - Timugon Murut bible

2 RAJA'-RAJA' 16

¹Paat ra bilor koopor am tulu' ra pamarintaan ru Raja' Pika anak ri Rimalia giu' ra Israil, Raja' Agas anak ungkuyon ru Raja' Jotam nasauk ra raja' giu' ra Jiuda.

²Paat ragili umur ru Raja' Agas ruo ngoopor ngambilor, am namarinta io giu' ra Jirusalim buoi mopor am onom ngambilor. Kalo minaya' io ra binaal moonsoi ru kinamatuaan nali Raja' Daut. Kaa' nambaal io ra atan ondo' kalo mapabansuk ra guang ru TUHAN, i Aki Kapuuno' nano.

³Minaya' io ra binaal ru raja'-raja' ru Israil, am poyo nampataak io ra anak nano galama' koson ra taak simbalui ra dewa-dewa. Minaya' io ra kaindalaman ru mamagun ru pagun ondo' pinagiru' ru TUHAN paat ra ulun ru Israil siminubol ra pagun raginio.

⁴Giu' ra intok sambaan ra sinungkalalaing giu' ra bulur-bulur am ra saau ru puun tataun ondo' magana', nampataak Raja' Agas ra taak simbalui am nonolob ra kaminyan.

⁵Raja' Rijin intor ra Siria am Raja' Pika intor ra Israil, namulunsar ra Jirusalim. Inawangan nilo ruo bandar no kaa' kalo nakapangala ra Raja' Agas. (

⁶Paat raginio raja' ru Idom[23] nakasugut nanguasa' saguli' ra bandar Ilat. Pinagiru' ru raja' no ulun ru Jiuda ondo' minayan ra giu' no. Ginio ra, ulun ru Idom minayan ra bandar no am liminayun ra giu' no saboi raino.)

⁷Nanusub Raja' Agas ra kukula' ngaulun mongoi ra Raja' Pul, intor ra Asyur, am ra bilin ragitio, “Gagayaan tokou. Ginio ra ratong no koson mamayag raki' intor ra raja'-raja' ru pagun Siria am Israil ondo' tatanga' mamulunsar raki' raino.”

⁸Inalap ru Raja' Agas pirok am mas intor Baloi ru TUHAN am lamin pambulian ra kuliamos ru istana, am pataako' no ngaangai' no ra Raja' Pul koson ra tangguang.

⁹Nangiou Raja' Pul ra kitaakon ru Raja' Agas. Raja' Pul am saujor nano namulunsar ra Damsyik, nampagaau ra bandar no am namatoi ra Raja' Rijin. Raja' Pul nagibit niayuk ra mamagun ru bandar Damsyik mongoi ra Kir koson ra ulun rinakop.

¹⁰Paat ra Raja' Agas minongoi ra Damsyik koson tumuum ra Raja' Pul, nakito no altar ra giu' no am nangator ra tiluan ru altar no nabaya' ra gayo nano ondo' motopot ra Imam Uria.

¹¹Binaal ri Uria rondo' altar koson raginio, am pinongo no ra kalo poyo siminaguli' Raja' Agas.

¹²Paat ra Raja' Agas siminaguli' intor ra Damsyik, nakito no ra altar no ra nopongo noyo.

¹³Nampataak Raja' Agas ra taak simbalui koson mapabansuk ra guang ru TUHAN,[24] am taak simbalui koson paringkuanangan[25] Riso, giu' ra rasawat ru altar no. Nampataak io niayuk ra wain am raraa' intor ra taak simbalui makibarakat intor ra TUHAN.[26]

¹⁴Altar gangsa' ondo' patimpokon ra TUHAN pinabanta' ra lolot ru altar bagu no am Baloi ru TUHAN. Ginio ra binandingan ru Raja' Agas altar gangsa' no ra tampilon ralayo ru altar bagu no.

¹⁵Kopongo raginio nanusub Raja' Agas ri Uria, “Pakayo' altar kuno ondo' maayo ti koson ra taak simbalui ondo' solobon paat ra susuab ti am taak ra kaunaran paat ra mamai', koson taak simbalui ondo' solobon am taak kaunaran ondo' pataakon ru raja' am mamagun, am niayuk koson taak wain intor ra mamagun. Pasasaro' raraa' ru ngaangai' bibiag ondo' pataakon koson ra taak simbalui giu' ra rasawat ru altar no. Altar gangsa' ondo' lairon no pakayon ku koson ra makitulu'.”

¹⁶Binaal ri Uria nanusuban ru Raja' Agas.

¹⁷Nangukab Raja' Agas ra ngaangai' kurita' pedati gangsa' ondo' pinakai giu' ra Baloi ru TUHAN, am nangiru' ra bisin-bisin ondo' pinabanta' ra rasawat ru kurita'-kurita' pedati no. Inalap no niayuk tangki' gangsa' intor ra rasawat ru sapi'-sapi' tambaga' no, am pinabanta' no ra rasawat ru antulan ru batu.

¹⁸Koson mangambi' ra guang ru raja' Asyur no, linungkib niayuk ru Raja' Agas pantas koson ra kurisi' ru raja' giu' ra Baloi ru Tuhan, am inangaban kulobon sumubol ra Baloi ru TUHAN ondo' subalan ru raja' ayuk.

¹⁹Ngaangai' binaal ru Raja' Agas tinulisan ra ralalom ru buuk Sejarah ru Raja'-Raja' ru Jiuda.

²⁰Raja' Agas minatoi am linobong giu' ra kalabangan ru raja' giu' ra Bandar Daut. I Gijkia, anak ungkuyon nano minalit riso koson ra raja'.