Read Timugon Murut 2 RAJA'-RAJA' 17 Bible Online

2 RAJA'-RAJA' 17 - Timugon Murut bible

2 RAJA'-RAJA' 17

¹Paat ra bilor koopor am ruo ra pamarintaan ru Raja' Agas giu' ra Jiuda, i Gosia anak ri Ila nasauk ra raja' giu' ra Israil. Raja' Gosia namarinta giu' ra Samaria buoi siam ngambilor.

²Makatula Raja' Gosia ra TUHAN, kaa' tula nano kalo maayo koson ra raja'-raja' ondo' namarinta ra Israil ragili.

³Paat raginio Raja' Salmanisir intor ra Asyur nangayou ra Raja' Gosia. Raja' Gosia nakiala ra Raja' Salmanisir am nambayar riso ra cukai ra moonong bilor.

⁴Kaa' rondo' bulintok no, nangator Raja' Gosia ra kukula' ngaulun sinusub nano ra Raja' So, raja' ru Misir[27] koson makiindangan riso. Kopongo raginio Raja' Gosia liminonggo' nambayar ra cukai kabilaran ra raja' ru Asyur. Kapandayi' ru Raja' Salmanisir ginio, rokopo' no Raja' Gosia am aputo' no ra lamin pangaputan.

⁵Raja' Salmanisir namulunsar ra Israil am nagawang ra Samaria. Kopongo talu ngambilor,

⁶iono paat ra bilor kasiam ra pamarintaan ru Raja' Gosia, raja' ru Asyur[28] nangala ra Samaria. Inibit no ulun ru Israil giu' ra Asyur koson ra ulun rinakop. Santayaran ra ulun ru Israil no pinaayan no giu' ra bandar Galag, santayaran no giu' ra kiing ru Sungoi Gabor giu' ra libung ru Gojan, am santayaran poyo giu' ra bandar-bandar ru pagun Madai.

⁷Bandar Samaria naratu' sabap ra ulun ru Israil makatula ra TUHAN, i Aki Kapuuno' nilo, ondo' namayag noyo risilo intor ra raja' ru Misir am nagibit risilo miningkual intor ra pagun ru Misir. Sinamba nilo ra tuhan-tuhan ra bokon,

⁸am niayuk minaya' ra kaindalaman ru bansa' ondo' pinagiru' ru TUHAN paat ra ulun ru Israil minayan ra pagun no. Minaya' ulun ru Israil ra kaulayan ondo' inaru' ru raja'-raja' ru Israil.

⁹Nambaal ilo ra baal-baal ondo' ininggalaran ru TUHAN, i Aki Kapuuno' nilo. Nambaal ilo ra intok-intok sambaan giu' ra ngaangai' ru bandar nilo, intor ra kampung ondo' boborok kaga' saboi ra bandar ondo' maayo kaga'.

¹⁰Giu' ra ngaangai' bulur am giu' ra saau ru moonong puun tataun, nambaal ilo ra lugu'-lugu' batu am sinungkalalaing Dewi Asyira.

¹¹Nonolob ilo ra kaminyan giu' ra rasawat ru ngaangai' altar tayar ru dewa, minaya' ra kaindalaman ru bansa' ondo' pinagiru' ru TUHAN intor ra pagun no. Napasingkual ilo ra sangit ru TUHAN sabap ra ngaangai' binaal nilo ondo' malaat no,

¹²am kalo giminagaya' ra TUHAN ondo' nanginggalar risilo sumamba ra sinungkalalaing.

¹³Nanusub TUHAN ra kukula' ngaulun am nabi Nano koson mampakara' toojo ra Israil am Jiuda. Ragu ru TUHAN, “Longgo' kano mambaal ra malaat am gagayaa' min susuban Kuno ondo' nakasimpung ralalom ru Ukum ondo' tinaakan Kuno ra kinamatuaan mini am niayuk akau ondo' pinabala' galing ra nabi-nabi, ulipon-ulipon Kuno.”

¹⁴Kaa' marara' ilo gumagaya'; mokotog ulu nilo koson ra kinamatuaan nilai ondo' kalo mangintopot ra TUHAN, i Aki Kapuuno' nilo.

¹⁵Marara' ilo gumagaya' ra susuban Nano. Kalo linio nilo nabantuan ondo' binaal ru TUHAN am kinamatuaan nilai. Kalo rinongog nilo ondo' pinakara'-pinakara' ru TUHAN. Sinamba nilo sinungkalalaing ondo' kolondo' onong, saboi ilo galama' nasauk ra kolondo' onong. Minaya' ilo ra kaindalaman ru bansa'-bansa' giu' ra liliut nilo, kabalu' pana nanginggalar noyo TUHAN ra baal raginio.

¹⁶Inanggal nilo ngaangai' ukum ru TUHAN, i Aki Kapuuno' nilo, am niayuk nambaal ra ruo sinungkalalaing ru sapi' intor ra basi' koson ra sambaan. Nambaal ilo niayuk ra sinungkalalaing Dewi Asyira, sumamba ra butitin-butitin am Baal.

¹⁷Pinataak nilo anak-anak nilo koson ra taak simbalui ondo' solobon ra dewa-dewa. Minongoi ilo pakiilong ra babalian am mangingilong. Mingkotog ilo toojo mambaal ra atan ondo' malaat ra pagilangan ru TUHAN, am napasingkual ra sangit Nano.

¹⁸Siminangit TUHAN ra ulun ru Israil saboi pinatiran ilo intor ra tana' ondo' tinaakan Nali risilo; ondo' soroi ayuk am pamarintaan ru Jiuda.

¹⁹Kaa' ulun ru Jiuda pana kalo giminagaya' ra ukum ru TUHAN, i Aki Kapuuno' nilo. Minaya' ilo ra kaindalaman ondo' binaal ru ulun ru Israil.

²⁰Inimpayan ru TUHAN ngaangai' ulun ru Israil. Nangukum Io risilo am pinataak ra pantula' ondo' malaat, saboi pupus no pinatiran No ilo intor ra tana' ondo' tinaakan Nano risilo.

²¹Kopongo TUHAN nampatuliar ra Israil intor ra Jiuda, linantik ru ulun ru Israil i Jirobiam anak ri Nibat nasauk ra raja' nilo. Nangkinibit ilo ra Raja' Jirobiam nangiruan ra TUHAN am nambaal ra tula-tula ra maayo.

²²Minaya' ilo ra binaal ru Raja' Jirobiam am kalo liminonggo' nambaal ra ngaangai' tula ondo' binaal ru Raja' Jirobiam.

²³Pupus no namatir TUHAN risilo intor ra tana' ondo' tinaakan Nano risilo. Baal raginio nasauk nontopot ra pinakara' ondo' tinaakan ru TUHAN ra ulipon-ulipon Nano. Ginio ra ulun ru Israil pinatiran giu' ra Asyur, intok inayanan nilo saboi raino.

²⁴Nagibit raja' ru Asyur ra ulun intor ra bandar Babil, Kuta, Awa, Gamat am Siparwaim minongoi ra bandar-bandar giu' ra Samaria[29] koson mamalit ra ulun ru Israil ondo' pinatiran ra pagun. Sinalingapu nilo ra bandar-bandar no am ayan ra giu' no.

²⁵Paat ra ilo nakasaboi galing giu' ra pagun no, kalo siminamba ilo ra TUHAN. Ginio ra nangator TUHAN ra singa' koson mamatoi ra santayaran intor risilo.

²⁶Raja' ru Asyur pana binalaan boo ra ulun sinusub nano minayan giu' ra bandar-bandar Samaria no am kalo nakapandai ra ukum ru dewa ru pagun raginio, am nangator dewa no ra singa' koson mamatoi risilo.

²⁷Ginio ra indagu raja' ru Asyur, “Atari' saguli' sangulun intor ra imam ondo' rinakop takau. Susubo' io[30] muli' am mayan ra giu' koson mangila' ra ulun giu' ra intok no intor ra ukum ru dewa ru pagun raginio.”

²⁸Ginio ra sangulun imam ru Israil ondo' pinatiran intor ra Samaria pinoongoi ra Asyur, siminaguli' am ayan ra Bitil. Nangila' io ra ulun ru giu' no ra ati kulaan sumambayang ra TUHAN.

²⁹Kaa' mamagun ru Samaria lakat poyo mambaal ra sinungkalalaing nilo galama', am pinaayan nilo sinungkalalaing no giu' ra kuil-kuil ondo' binaal ru ulun ru Israil. Moonong ulun nambaal ra sinungkalalaing ru sigagama':

³⁰Ulun ru Babil nambaal ra sinungkalalaing Dewa Sukot-Binot, ulun ru Kuta nambaal ra sinungkalalaing Nirgal, ulun ru Gamat nambaal ra sinungkalalaing Asima,

³¹ulun ru Awa nambaal ra sinungkalalaing Nibas am Tartak, am ulun ru Siparwaim nampataak ra anak nilo koson ra taak simbalui ondo' solobon ra Adramilik am Anamilik, dewa-dewa nilo.

³²Sumamba ilo niayuk ra TUHAN, am nampili' ilo ra ulun ru ilo po ngai' koson mangandoi ra imam giu' ra intok-intok sambaan ra sinungkalalaing, am niayuk mampataak ra taak simbalui ra sinungkalalaing no ra giu' no.

³³Sumamba ilo ra TUHAN, kaa' sumamba ilo niayuk ra dewa-dewa nilo galama' sumugut ra kaulayan ru pagun intor nilai.

³⁴Saboi raino lakat poyo maya' ilo ra kaulayan lair nilono. Kalo sumamba ilo ra TUHAN kapoam gumagaya' ra ukum am susuban ondo' tinaakan Nano ra papag ri Jakub, ondo' ininggalanan Nano ri Israil.

³⁵Nambaal TUHAN ra nabantuan ra ulun ru Israil, am nanusub ra, “Pai' samba ra tuhan-tuhan ra bokon; pai' igulatur, kapoam mangandoi, kapoam mampataak ra taak simbalui ra tuhan-tuhan raginio.

³⁶Gagaya' kano Raki', TUHAN ondo' nagibit ramuyun miningkual intor ra Misir ra kuasa' am kaikangan ondo' maayo; igulatur kano am pampataak ra taak simbalui Raki'.

³⁷Kasalok kano gumagaya' ra ukum am susuban ondo' tinulisan Kuno ramuyun. Pai' samba ra tuhan-tuhan ra bokon,

³⁸am pai' liliani' nabantuan ondo' binaal Kuli ramuyun. Pai' samba ra tuhan-tuhan ra bokon,

³⁹kaa' samba kano Raki', TUHAN, i Aki Kapuuno' min, mamayag Aku ramuyun intor ra pantula'.”

⁴⁰Kaa' mamagun ru Samaria marara' rumongog; lakat ilo poyo maya' ra kaulayan lair nilono.

⁴¹Sumamba ilo ra TUHAN, kaa' sumamba ilo niayuk ra sinungkalalaing nilo; saboi raino papag nilono lakat poyo mambaal raginio.