Read Timugon Murut 2 RAJA'-RAJA' 18 Bible Online

2 RAJA'-RAJA' 18 - Timugon Murut bible

2 RAJA'-RAJA' 18

¹Paat ra bilor katalu ra pamarintaan ru Raja' Gosia anak ri Ila koson ra raja' ru Israil, i Gijkia, anak ungkuyon ru Raja' Agas nasauk ra raja' giu' ra Jiuda.

²Paat ragili umur ru Raja' Gijkia ruo ngoopor am limo ngambilor, am namarinta io giu' ra Jirusalim buoi ruo ngoopor am siam ngambilor. Ina' nano ininggalanan ri Abia anak ri Jakaria.

³Raja' Gijkia namaya' ra kinamatuaan nali Raja' Daut, sabap ra nambaal io ra atan ondo' mapabansuk ra guang ru TUHAN.

⁴Linunsai no intok-intok sambaan ra sinungkalalaing, nomopol ra lugu'-lugu' batu, am nampalunsai ra sinungkalalaing Dewi Asyira. Io niayuk nangumok ra kukuo gangsa' ondo' binaal ri Musa ragili, ondo' nauligan ra Nigustan, sabap ra saboi paat raginio ulun ru Israil lakat poyo monolob ra kaminyan koson mangurumat ra kukuo gangsa' no.

⁵Mangintopot Raja' Gijkia ra TUHAN, i Aki Kapuuno' ru Israil. Kalo boo igondo' Jiuda mokoondo' ra raja' koson ra Raja' Gijkia, iou ra kalo poyo kapoam malupus pamarintaan nano.

⁶Gumagaya' Raja' Gijkia ra TUHAN, am kalo igondo' minanggal Riso. Topot-topot io gumagaya' ra ngaangai' susuban ru TUHAN ondo' pinasaboi galing ri Musa.

⁷Ginio ra TUHAN mabaya' riso, am nakasugut io ra ralalom ru ngaangai' kandoi nano. Giminuor io ra raja' ru Asyur am marara' makiala riso.

⁸Kinala ru Raja' Gijkia no ulun ru Palistin am nanalingaau ra libung nilo, intor ra kampung ondo' boborok kaga' saboi ra bandar ondo' maayo kaga', nakaaya' Gaja am liliut no.

⁹Paat ra bilor kaapat ra pamarintaan ru Raja' Gijkia, iono paat ra bilor katulu' ra pamarintaan ru Raja' Gosia giu' ra Israil, Raja' Salmanisir intor ra Asyur namulunsar ra Israil am nagawang ra bandar Samaria.

¹⁰Kopongo talu ngambilor, bandar ru Samaria kinala. Baal raginio nasauk paat ra bilor koonom ra pamarintaan ru Raja' Gijkia, am bilor kasiam ra pamarintaan ru Raja' Gosia.

¹¹Kopongo raginio raja' ru Asyur[31] nagibit ra ulun ru Israil minongoi ra Asyur koson ra ulun rinakop, am pinaayan santayaran intor risilo giu' ra bandar Galag, santayaran giu' ra kiing ru Sungoi Gabor giu' ra libung Gojan, am santayaran poyo giu' ra bandar-bandar ru pagun Madai.

¹²Samaria naratu' sabap ra ulun ru Israil kalo giminagaya' ra TUHAN, i Aki Kapuuno' nilo. Liminungkang ilo ra nabantuan ondo' binaal ru TUHAN risilo, am inanggal nilo ngaangai' ukum ondo' tinaakan ri Musa, ulipon ru TUHAN. Marara' ilo rumongog kapoam gumagaya'.

¹³Paat ra bilor koopor am apat ra pamarintaan ru Raja' Gijkia, Raja' Sanirib intor ra Asyur, namulunsar ra bandar-bandar ondo' makakubu giu' ra Jiuda am niayuk nangala ra ngaangai' no.

¹⁴Nangator Raja' Gijkia ra tanou ra Raja' Sanirib ondo' paat raginio soroi giu' ra Lakgis. Indagu Raja' Gijkia, “Makasala aku. Langgai' bulunsar muno. Bayarin tokou ra atan ayuk ondo' kitaakon muno.” Nakitaak Raja' Sanirib ra 10,000 ngakilogram pirok am 1,000 ngakilogram mas intor ra Raja' Gijkia.

¹⁵Nangator Raja' Gijkia riso ra ngaangai' pirok giu' ra baloi ru TUHAN am giu' ra intok pambulian ru istana.

¹⁶Nangalap io niayuk mas intor ra kulobon-kulobon ru Baloi ru TUHAN am mas ondo' pinakai nano koson mampalimpot ra lugu'-lugu' ru kulobon no. Nangator Raja' Gijkia ra ngaangai' no ra Raja' Sanirib.

¹⁷Kaa' raja' ru Asyur nangirim ra rondo' pulalai ru saujor ondo' maayo intor ra Lakgis koson mamulunsar ra Raja' Gijkia giu' ra Jirusalim. Pulalai raginio tiningganai ru talu ngaulun pagawai masawat ru saujor, iono sangulun panglima, sangulun manukang ra inumon[32] am sangulun tingganai ru magalung ra raja'. Paat ra ilo nakasaboi giu' ra Jirusalim, inaru' nilo intok giu' ra ralan, intok mambaal ra konoon no mangandoi, maar ra napaususan ra timug intor ra kulam giu' ra tampilon ra rasawat.

¹⁸Kopongo raginio nampiau ilo ra Raja' Gijkia, kaa' talu ngaulun pagawai nano minatong tuum risilo, iono i Iliakim anak ri Ilkia, manalingapu ra istana; i Sibna, mamamatik ru istana am i Joa anak ri Asap, mamamatik ru pagun.

¹⁹Indagu sangulun intor ra pagawai ru saujor ru Asyur no, “Posoboyo' ragu ru raja' ru Asyur ra Raja' Gijkia, ‘Kua kia ra raja' no malansan kaga'?

²⁰Mangkara' io kia ra ragu-ragu makapalit ra katasikan am kaikangan ru saujor? Osoi kia lansanin mu raja' koson mangindangan rirun gumuor ra Asyur?

²¹Malansan kou raja' ra indangan intor ra Misir, kaa' baal raginio koson ra ulun ondo' mamakai ra galaga koson ra jujuga'. Jujuga' no mapandak am manujok ra kalindu' muno galama'. Koson raginio noyo raja' ru Misir ra osoi ondo' malansan riso.’ ”

²²Rayuso' poyo ru pagawai Asyur no, “Kapoam maaru' lair ra malansan kau ra TUHAN, i Aki Kapuuno' mino? Paat raginio Raja' Gijkia manusub ra ulun ru Jiuda am Jirusalim sumambayang giu' ra altar giu' ra Jirusalim ayuk, ondo' pinuso nali altar am intok-intok sambaan ra TUHAN galama'.

²³Makimantaru aku ramuyun ralalom inggalan ru raja' ru Asyur. Aniin takamin ra ruo ngaribu ngainan kuda amon ru mokoondo' kau ra ulun ra kinasuang raginio koson mangura' ra ngaangai' ru kuda no!

²⁴Kalo makaanggal kau ramon inda' pana ru pagawai ru Asyur ra magana' kaga' pana, kaa' malansan kau ra ulun ru Misir mangator ra kurita' kuda am pulalai mangkuda ramuyun.

²⁵Mangkara' kau kia ra mamulunsar aku ra pagun min am mamuso raginio ra kalo indanganon ru TUHAN? TUHAN galama' nanusub raki' mamulunsar am niayuk mamuso raginio.”

²⁶I Iliakim, i Sibna am i Joa pana mindagu boo ra pagawai no, “Tuan, indagu ramon ra ragu ru Aram. Pai' indagu ra ragu ru Ibrani. Ngaangai' ru ulun giu' ra rasawat ru timbok no makarati'.”

²⁷Kaa' taam pagawai no, “Karaan min kia ra raja' ru Asyur no nanusub raki' mampasaboi ra ngaangai' ru baal ragitio ramuyun am raja' mino ayuk? Kalo. Posoboyon ku niayuk ngaangai' ti ra ulun ondo' manturung giu' ra rasawat ru timbok no, sabap ra ilo pana musiti' mangakan ra ampangara' am manginum ra sasabu galama' koson ramuyun.”

²⁸Pagawai no pana minigor boo am golok ra ragu ru Ibrani, “Rongogo' ragu ru raja' ru Asyur ramuyun!

²⁹Mampakara' io ramuyun maa' raginio kalo ruungon ru Raja' Gijkia. Kalo makapamayag Raja' Gijkia ramuyun.

³⁰Pai' polosoo' Raja' Gijkia manusub ramuyun malansan ra TUHAN. Pai' karaa' ra mamayag TUHAN ramuyun, am manginggalar ra pulalai ru saujor ru Asyur mampagaau ra bandar min.

³¹Pai' rongogo' Raja' Gijkia. Manusub raja' ru Asyur ramuyun maa' raginio mingkual intor ra bandar min am makirakop. Akau ngaangai' iowon mangakan ra kawa' ru anggur intor ra puun ru anggur min galama' am kawa' ru ara intor ra kawa' ru ara min galama', am manginum ra timug intor ra tulubong min galama',

³²saboi ra raja' ru Asyur mapabanding ramuyun giu' ra pagun ondo' nogondo' ra pagun min. Giu' no mokoondo' masuang umo ru anggur ondo' manangampos ra wain am gandum koson mambaal ra ruti'. Pagun no nososok ra puun ru jaitun, am ruu' ru maningot. Amon ru gumagaya' kau ra susuban ru raja', maayag kau am kalo matoi. Pai' karuung ru Raja' Gijkia. Pai' karaa' ra mamayag TUHAN no ramuyun.

³³Dewa-dewa ru pagun ra ati kia nakaili' namayag ra pagun nano intor ra raja' ru Asyur?

³⁴Ati kia dewa-dewa ru pagun ru Gamat am Arpad raino? Ati kia dewa-dewa Siparwaim, Gina am Iwa? Nakaili' kia osoi-osoi namayag ra Samaria?

³⁵Ati kia ra dewa ondo' nakaili' namayag ra pagun nano intor ra raja' mai? Kua kia pangkara' kau ra TUHAN no makapamayag ra Jirusalim?”

³⁶Nongkokoror ayuk mamagun koson ra ondo' nanusuban ru Raja' Gijkia. Kalo mindagu ilo ra rondo' ragu pana.

³⁷I Iliakim, i Sibna am i Joa pana namparilak boo ra bayang nilo sabap ra mangiluk. Pinabala' nilo ragu-ragu ru pagawai ru Asyur no ra Raja' Gijkia.