Read Timugon Murut 2 RAJA'-RAJA' 2 Bible Online

2 RAJA'-RAJA' 2 - Timugon Murut bible

2 RAJA'-RAJA' 2

¹Paat no nasaboi ra TUHAN koson mangkayang ri Ilia ra suruga' ralalom ru bagiu'. Paat raginio i Ilia am i Ilisa minintor intor ra Gilgal.

²Giu' ra tanga' ralan indagu i Ilia ri Ilisa, “Soroi ayuk ragiti; TUHAN nanusub noyo raki' mongoi ra Bitil.” Kaa' taam i Ilisa, “Magibot aku sabap ra gagaya' kuno ra TUHAN ondo' maayag am okou ra kalo iruanin tokou.” Ginio ra ilo ruo minongoi ra Bitil.

³Santimungan ru nabi ondo' minayan giu' ra Bitil mininggaar ri Ilisa am pangkuot riso, “Nakapandai kono kia ra TUHAN no mangalap ra tuan muno intor rirun ra orou raiti'?” Taam i Ilisa, “Nakapandai aku, kaa' pai' takano raguo' baal raginio.”

⁴I Ilia pana mindagu boo ri Ilisa, “Soroi ayuk ragiti; TUHAN no nanusub noyo raki' mongoi ra Jiriko.” Kaa' taam i Ilisa, “Magibot aku sabap ra gagaya' kuno ra TUHAN ondo' maayag am okou ra kalo iruanin tokou.” Ginio ra ilo ruo minongoi ra Jiriko.

⁵Santimungan ru nabi ondo' minayan giu' ra Jiriko mininggaar ri Ilisa am pangkuot riso, “Nakapandai kono kia ra TUHAN no mangalap ra tuan muno intor rirun ra orou raiti'?” Taam i Ilisa, “Nakapandai aku, kaa' pai' takano raguo' baal raginio.”

⁶I Ilia pana mindagu boo ri Ilisa, “Soroi ayuk ragiti; TUHAN no nanusub noyo raki' mongoi ra Sungoi Jordan.” Kaa' taam i Ilisa, “Magibot aku sabap ra gagaya' kuno ra TUHAN ondo' maayag am okou ra kalo iruanin tokou.” Ginio ra rinayus nilo pangkiralanan.

⁷Limo ngoopor ngaulun intor ra santimungan ru nabi minaya' risilo mongoi ra Sungoi Jordan. I Ilia am i Ilisa minuog ra kiing ru sungoi, am limo ngoopor ngaulun nabi no minigor kalo maalur intor ra giu' no.

⁸Kopongo raginio aluso' ri Ilia sukub nano, ruluno' no, am palambaa' ra timug ru sungoi no. Kalapak timug ru sungoi no napiruo saboi i Ilia am i Ilisa nakalaup ra sungoi minugar ra lonor ondo' mapua'.

⁹Giu' no indagu i Ilia ri Ilisa, “Raguo' noyo atan kasagaan muno baalon ku rirun ra aku kalo poyo ibiton mugar.” Taam i Ilisa, “Iowo' aku no manungkus ra kuasa' muno maa' raginio makapalit aku rirun.”[2]

¹⁰Kon ri Ilia, “Kitaakon muno mapagon iowon. Kaa' amon ru makito mu aku paat ra aku ibiton mugar, makaapu kou ra kitaakon muno. Amon ru kalo, kalo makaapu kou raginio.”

¹¹Narayus ilo nagindagu liliwa' namparayus ra pangkiralanan. Pulusat ru rondo' kurita' kuda makaapui ondo' binunduk ru kukula' ngainan kuda makaapui napatuliar risilo, am i Ilia kinayang ra suruga' ru bagiu' mapuor kaga'.

¹²Kakito ri Ilisa baal raginio, am i pana mompogolok ri Ilia, “Ama' ku, ama' ku! Manaung maikang ru Israil! Minugar noyo i ama'!” Ginio ra liot ri Ilia intor ra pagilangan ri Ilisa. Nabaya' ra kangilukan rilako' ri Ilisa sukub nano nasauk ra ruo rilak.

¹³Kopongo raginio alapo' no sukub ri Ilia ondo' naratu'. Saguli' boo i Ilisa am bigor ra kiing ru Sungoi Jordan.

¹⁴Lambaa' no timug ru sungoi no ra sukub ri Ilia, am indagu, “Ati nua' TUHAN, i Aki Kapuuno' ri Ilia?” Kopongo raginio lambaa' no poyo timug ru sungoi no, am kapiruo timug no, ugar boo i Ilisa laup ra sungoi no.

¹⁵Limo ngoopor ngaulun nabi intor ra Jiriko no nakakito ri Ilisa am indagu, “Kuasa' ri Ilia soroi ri Ilisa!” Inggaar ilo riso, am kubu samba ra saang nano,

¹⁶am indagu, “Akai limo ngoopor ngaulun ragiti, am ngaangai' mai maikang. Polosoon noyo akai maguyum ri Ilia, tuan muli. Maaru' Ambiluo ru TUHAN nagibit riso am nangiruan riso giu' ra rasawat ru gunung kapoam giu' ra limayak.” Indagu i Ilisa, “Pai', kalo pana mugar!”

¹⁷Kaa' jumajal ilo saboi nangiou i Ilisa risilo mugar. Buoi talu ngoorou, limo ngoopor ngaulun no naguyum ri Ilia ra ati-ati, kaa' kalo natuum nilo io.

¹⁸Kopongo raginio saguli' ilo ri Ilisa ondo' tatanga' maginaa giu' ra Jiriko. Kon ri Ilisa risilo, “Nanginga' aku no alia ramuyun mugar?”

¹⁹Kukula' ngaulun intor ra Jiriko mindagu ri Ilisa, “Koson ra napandayan muno, moonsoi bandar ti, kaa' timug nano kalo moonsoi am mangkinibit ra masuang ruandu' maapang mairuan.”

²⁰Kon ri Ilisa, “Suangi' ra usi' rondo' mangkuk baguon am ibito' mangkuk no raki'.” Ilo pana nagibit raginio ri Ilisa.

²¹Ongoi i Ilisa ra taur ru timug, am patiaso' usi' no ralalom ru timug, am indagu, “Koon raginio ragu ru TUHAN, ‘Kapasawon ku timug ti maa' raginio kalo boo mangkinibit ra patayan kapoam kairuan.’ ”

²²Intor raginio moonsoi timug no koson ra ondo' rinagu ri Ilisa.

²³Nangiruan i Ilisa ra Jiriko am ongoi ra Bitil. Giu' ra tanga' ralan, kukula' ngaulun lalaing ungkuyon ondo' minatong intor ra bandar no nagasab riso. Konilo, “Okou naampakan, pagiru' intor ragiti!”

²⁴Likar i Ilisa, ponontong ra lalaing-lalaing no, am pagulas risilo ralalom inggalan ru TUHAN. Kopongo raginio ruo ngainan baawang ruandu' miningkual intor ra kataunan am bibinsango' inan ru apat ngoopor am ruo ngaulun intor ra lalaing-lalaing no.

²⁵Rinayus ri Ilisa pangkiralanan nano mongoi ra Gunung Karmil, kalupus raginio minuli' io ra Samaria.