Read Timugon Murut 2 RAJA'-RAJA' 21 Bible Online

2 RAJA'-RAJA' 21 - Timugon Murut bible

2 RAJA'-RAJA' 21

¹Mopor am ruo ngambilor umur ru Raja' Manasi paat ra io nasauk ra raja' ru Jiuda. Limo ngoopor am limo ngambilor buoi nano namarinta giu' ra Jirusalim. Inggalan ru ina' nano i Gipjiba.

²Makatula Raja' Manasi ra TUHAN. Minaya' io nambaal ra baal malaat ondo' binaal ru bansa'-bansa' ondo' pinagiru' ru TUHAN paat ra ulun Nano namagun ra pagun no.

³Binaal no saguli' intok-intok sumamba ra sinungkalalaing ondo' pinuso noyo ru ama' nali, Raja' Gijkia. Nambaal Raja' Manasi ra altar koson sumamba ra Baal am mambaal ra sinungkalalaing Dewi Asyira, koson ra ondo' binaal ru Raja' Agab, panguasa' ru Israil.

⁴Nambaal io ra altar tayar ru dewa-dewa giu' ra ralalom Baloi ru TUHAN, intok ondo' inaru' ru TUHAN koson ra intok sumambayang Riso.

⁵Giu' ra ruo liliut ra Baloi ru TUHAN, Raja' Manasi niayuk nambaal ra altar-altar koson intok sumamba ra bibiag-bibiag.

⁶Nampataak io ra anak ungkuyon nano koson ra taak simbalui ondo' solobon. Nambaal io ra mangilong am sihir, am nakitulu'[39] io ra mangngilong am babalian. Maayo tula nano ra TUHAN am napasingkual ra sangit Nano.

⁷Pinabanta' ru Raja' Manasi sinungkalalaing ru Dewi Asyira giu' ra Baloi ru TUHAN, ondo' intok raginio inindaguan ru TUHAN ri Daut am i Salomo anak ungkuyon nano, “Baloi Kutu am bandar Jirusalim ti ondo' pinili' Ku noyo intor ra wilayah mopor am ruo bansa' ru Israil, iono intok ondo' inaru' Ku koson ra intok sumambayang Raki'.

⁸Amon ru ulun Kuno Israil gumagaya' ra susuban Kuno am niayuk sumugut ra ngaangai' Ukum ondo' pinataak ri Musa, ulipon Kuli risilo, Aku pana kalo mompoloso risilo pagiruon intor ra pagun ondo' tinaakan Ku noyo ra kinamatuaan nilai.”

⁹Kaa' ulun ru Jiuda kalo giminagaya' ra TUHAN. Raja' Manasi nangkinibit risilo makatula ra maayo poyo intor ra tula ru bansa'-bansa' ondo' pinagiru' ru TUHAN paat ra ulun Nano siminubol ra pagun no.

¹⁰Pinabala' galing ra nabi-nabi, ulipon-ulipon Nali, minindagu TUHAN,

¹¹“Raja' Manasi nambaal ra baal-baal ondo' majaka', ondo' majaka' poyo intor ra binaal ru ulun ru Kanaan. Ra ondo' sinungkalalaing nano, nangkinibit io ra mamagun ru Jiuda makatula.

¹²Ginio ra Aku, TUHAN, i Aki Kapuuno' ru Israil, maparatong ra karaat ondo' makalalaa' ra Jirusalim am Jiuda, saboi moonong ulun ondo' mangkirongog no makatigog.

¹³Mangukum Aku ra Jirusalim koson ra Aku nangukum ra Samaria am Raja' Agab, panguasa' ru Israil, am niayuk papag nano. Pusoon Ku mamagun ru Jirusalim koson ra ulun mampaliung ra pinggan am palapiaton no.

¹⁴Iruanin Ku ilo ondo' lakat poyo naayag am pataakin ilo ra pantula'. Kalaan ilo ru pantula' am manalingaau ra pagun nilo.

¹⁵Baalon Ku ginio ra ulun Kuno sabap ra makatula ilo noyo Raki', am napasingkual ra sangit Kuno intor ra kinamatuaan nilo miningkual intor ra Misir saboi raino.”

¹⁶Namatoi Raja' Manasi ra masuang kaga' ulun ondo' kolondo' sala saboi raraa' nalayak giu' ra ralan-ralan giu' ra Jirusalim. Suai ra binaal raginio, Raja' Manasi niayuk nangkinibit ra mamagun ru Jiuda siminamba ra sinungkalalaing, saboi ilo makatula ra TUHAN.

¹⁷Ngaangai' binaal ru Raja' Manasi, nakaaya' tula ondo' binaal nali, tinulisan ra ralalom ru buuk Sejarah ru Raja'-Raja' ru Jiuda.

¹⁸Raja' Manasi minatoi am linobong giu' ra taman ru istana, iono taman Uja. I Amon, anak ungkuyon nano minalit riso koson ra raja'.

¹⁹Umur ru Raja' Amon ruo ngoopor am ruo ngambilor paat ra io nasauk ra raja' ru Jiuda am namarinta io ra Jirusalim buoi ruo ngambilor. Ina' nano makainggalan ri Misulimit anak ri Garus intor ra bandar Jotba.

²⁰Koson ra Raja' Manasi, ama' nano, Raja' Amon niayuk makatula ra TUHAN.

²¹Minaya' Raja' Amon ra binaal ru ama' nali, am siminamba ra dewa-dewa ondo' sinamba ru ama' nali.

²²Raja' Amon nangiruan ra TUHAN, i Aki Kapuuno' ru kinamatuaan nali. Kalo giminagaya' io ra susuban ru TUHAN.

²³Pagawai-pagawai ru Raja' Amon naguguum minanggal riso, am namatoi riso giu' ra istana.

²⁴Kaa' mamagun ru Jiuda no poyo namatoi ra ulun ondo' namatoi ra Raja' Amon, am pilio' nilo i Josia, anak ungkuyon nano nasauk ra raja'.

²⁵Ngaangai' binaal ru Raja' Amon tinulisan ra ralalom ru buuk Sejarah ru Raja'-Raja' ru Jiuda.

²⁶Raja' Amon linobong giu' ra taman Uja, am i Josia, anak ungkuyon nano minalit riso koson ra raja'.