Read Timugon Murut 2 RAJA'-RAJA' 23 Bible Online

2 RAJA'-RAJA' 23 - Timugon Murut bible

2 RAJA'-RAJA' 23

¹Nampiau Raja' Josia ra ngaangai' tingganai ru Jiuda am Jirusalim,

²am nababaya' ilo minongoi ra Baloi ru TUHAN. Minaya' risilo imam-imam, nabi-nabi am ngaangai' mamagun, ondo' langkaya' am niayuk ondo' musikin. Giu' ra saang nilo ngaangai', nambasa' raja' ra ngaangai' suang ru kitab nabantuan ondo' natuum giu' ra ralalom Baloi ru TUHAN.

³Minigor io ra sapapa' ru lugu' ondo' timpokon ra raja', am nambaal ra nabantuan ra TUHAN, koson gumagaya' Riso, am sumugut ra ukum am susuban Nano ra totopot ru guang am salibuor nano, am niayuk manugut ra ngaangai' kitaakon ru nabantuan ondo' tinulisan ra ralalom ru kitab no. Ngaangai' mamagun ru pagun no nambantu' koson gumagaya' ra nabantuan no.

⁴Kopongo raginio Raja' Josia namarinta ra Tingganai maayo Imam Ilkia, imam ra mangingindangan, am mantamung ondo' mangandoi giu' ra kulobon Baloi ru TUHAN maa' raginio mangingkual ra ngaangai' kuliamos ondo' pinakai koson sumamba ra Baal, Dewi Asyira, am butitin-butitin. Sinolob ru Raja' Josia ngaangai' kuliamos no giu' ra liwar ru bandar, mamaar ra Limayak Kidron, am kaau no inibit ra Bitil.

⁵Pinolonggo' ru Raja' Josia no ngaangai' imam ondo' linantik ru raja'-raja' Jiuda koson mampataak ra taak simbalui giu' ra altar-altar ru dewa giu' ra bandar-bandar Jiuda, am giu' ra intok-intok giu' ra liliut ru Jirusalim. Ngaangai' ru imam no nampataak ra taak simbalui ra Baal, mato ru orou, bulan, planit, am butitin-butitin.

⁶Pinaingkual ru Raja' Josia tatandu' ru Dewi Asyira intor ra Baloi ru TUHAN, am inibit no miningkual ra bandar, giu' ra Limayak Kidron koson solobon. Kopongo raginio baa nano tinutu saboi nasauk ra kaau, am pinatauk giu' ra kalabangan ru mamagun.

⁷Linunsai ru Raja' Josia intok inayanan ru ulun-ulun mantalan ra inan ru kuil[40] giu' ra Baloi ru TUHAN. (Giu' no bala ruandu' mambaal ra sukub ondo' bayangon sumamba ra Dewi Asyira.)

⁸Raja' Josia nagibit ra ngaangai' imam intor ra bandar-bandar giu' ra Jiuda minongoi ra Jirusalim, am giu' ra titikop ru pagun no jinamalan no altar-altar intok ru imam-imam mampataak ra taak simbalui. Nampalunsai io niayuk ra altar-altar ondo' mamaar ra kulobon garabang ondo' binaal ri Josua, gabenor ru bandar no. Kulobon garabang no giu' ra tampilon ru kait ra kulobon garabang maayo giu' ra ralan sumubol ra bandar.

⁹Imam-imam kalo iowon mampaugar ra sambayang giu' ra Baloi ru TUHAN, kaa' iowon ilo mangakan ra ruti' ondo' kalo linatakan ra ragi, ondo' pinongo tayar ru imam, rangan-rangan nilo.

¹⁰Nampajamol niayuk Raja' Josia ra Topit, intok sambaan ra dewa giu' ra Limayak Ginom, maa' raginio kolondo' osoi pana makapapataak ra anak nano koson ra taak simbalui ondo' solobon ra Dewa Molok.

¹¹Namatir niayuk Raja' Josia ra ngaangai' kuda ondo' timpokon ra raja'-raja' ru Jiuda koson sumamba ra mato ru orou. Nonolob io ra ngaangai' kurita' kuda ondo' pakayon koson sumamba ra mato ru orou. (Kuliamos-kuliamos raginio binulian giu' ra liliut Baloi ru TUHAN, mamaar ra kulobon garabang, kalo maalur intor ra intok inayanan ri Natan Milik, sangulun pagawai maatang.)

¹²Linunsai no altar-altar ondo' binaal ru raja'-raja' ru Jiuda giu' ra taap ru istana, rasawat ru lamin-lamin ru Raja' Agas. Nampalunsai niayuk Raja' Josia ra altar-altar ondo' binaal ru Raja' Manasi giu' ra ruo liliut Baloi ru TUHAN. Inumok ru Raja' Josia altar no am pinatiran no ra ralalom ru Limayak Kidron.

¹³Nampajamol niayuk Raja' Josia ra altar-altar ondo' binaal ru Raja' Salomo giu' ra tampilon sirangon ru Jirusalim, tampilon ra rabugus ru Bulur Jaitun[41] intok sambaan ra dewa-dewa ondo' makatataman, iono Asyitorit, dewa ru ulun ru Sidon; Kamos, dewa ru ulun ru Moab; am Milkom, dewa ru ulun ru Amon.

¹⁴Nomopol Raja' Josia ra tatandu' ondo' timpokon ra Dewi Asyira, am nangumok ra lugu'-lugu' batu, am namumpun ra tana' no ra bungul-bungul ru ulun.

¹⁵Nampalunsai niayuk Raja' Josia ra intok sambaan giu' ra Bitil, ondo' binaal ru Raja' Jirobiam anak ri Nibat, ondo' nangkinibit ra Israil makatula. Nampalunsai Raja' Josia ra altar giu' ra intok sambaan no. Inumok no batu-batu ru altar no,[42] am tinutu no nasauk ra kaau. Io niayuk nonolob ra sinungkalalaing Dewi Asyira.

¹⁶Kopongo raginio nampulolou Raja' Josia ra liliut nano am nakakito ra kukula' lobong giu' ra rasawat ru bulur. Kinali no lobong-lobong raginio, am nangingkual am nonolob ra bungul intor ra lobong-lobong raginio, giu' ra rasawat ru altar. Ginii noyo binaal ru Raja' Josia nampajamol ra altar no. Koon raginio noyo ragu inala' ru sangulun nabi paat ra pangiantakan, bulintok Raja' Jirobiam miningor mamaar ra altar no. Nampulolou poyo Raja' Josia ra liliut nano, am nakakito ra rondo' lobong ra bokon.

¹⁷Pangkuot Raja' Josia, “Osoi ra lobong gitio?” Indagu mamagun ru Bitil, “Gitio noyo lobong ru nabi intor ra Jiuda ondo' nambala' ra baal-baal ondo' bagu ayuk binaal muni ra altar ti.”

¹⁸Raja' Josia pana mindagu, “Polosoon lobong raginio. Pai' bandingi' bungul nano!” Ginio ra bungul ru nabi intor ra Jiuda no kalo binandingan. Bungul ru nabi intor ra Samaria pana kalo binandingan.

¹⁹Giu' ra moonong bandar ra Israil, linunsai ru Raja' Josia ngaangai' intok sambaan ra dewa ondo' binaal ru raja'-raja' ru Israil, ondo' napasingkual ra sangit ru TUHAN. Pinamakuan no ra altar-altar no koson ra pinamakuan no giu' ra Bitil.

²⁰Pinatoi ru Raja' Josia ngaangai' imam ondo' nangandoi giu' ra intok sambaan ra dewa no giu' rasawat ru altar-altar nilo galama'. Io niayuk nonolob ra bungul ru ulun giu' ra rasawat ru moonong altar. Kopongo raginio Raja' Josia siminaguli' ra Jirusalim.

²¹Raja' Josia pana nanusub boo ra mamagun nano mangiantak ra Paska koson mangurumat ra TUHAN, i Aki Kapuuno' nilo, koson ra ondo' tinulisan ra ralalom ru kitab nabantuan.

²²Kalo igondo' Paska koson raginio iniantak ru ati-ati pana raja' ru Israil kapoam raja' ru Jiuda intor ra bulintok ru ulun-ulun tutumula' namarinta ra Israil.

²³Kaa' raino, paat ra bilor koopor am balu' ru pamarintaan ru Raja' Josia, Paska iantakon giu' ra Jirusalim.

²⁴Koson manugut ra ukum-ukum ondo' nakasuang ralalom ru kitab ondo' natuum ru Tingganai maayo Imam Ilkia giu' ra Baloi ru TUHAN no, pinagiru' ru Raja' Josia no ngaangai' mampiau ra ambiluo ulun minatoi am mangingilong intor ra Jirusalim. Raja' Josia namatir niayuk ra ngaangai' dewa ru baloi, sinungkalalaing sambaan am ngaangai' kuliamos ondo' pinakai sumamba ra dewa.

²⁵Kalo poyo igondo' sangulun raja' koson ra Raja' Josia, ondo' mangandoi ra TUHAN ayuk ra sototopot ru guang, am niayuk nampakito raginio ralalom ru ralan kaayagan am binaal nano, nontopot ra ngaangai' ru Ukum ri Musa. Kopongo Raja' Josia, kolondo' boo raja' ondo' koson riso.

²⁶Kaa' sangit ru TUHAN ra Jiuda ondo' pinasingkual ru Raja' Manasi nanimbula' toojo saboi paat raginio pana TUHAN lakat poyo sumangit.

²⁷Indagu TUHAN, “Atan ondo' binaal Kuno ra Israil baalon Ku niayuk ra Jiuda. Patirin Ku mamagun ru Jiuda intor ra pagun ondo' pataakin Ku risilo. Impayin Ku Jirusalim, bandar pinili' Kuno, am Baloi ru TUHAN, ondo' inaru' Ku koson ra intok sumambayang Raki'.”

²⁸Ngaangai' binaal ru Raja' Josia tinulisan ra ralalom ru buuk Sejarah ru Raja'-Raja' ru Jiuda.

²⁹Paat ra pamarintaan ru Raja' Josia, Raja' Niko intor ra Misir naningganai ra saujor nano mongoi ra Sungoi Iprat koson mangindangan ra raja' ru Asyur. Mangkinam Raja' Josia mongompong ra saujor ru Misir giu' ra Migido, kaa' Raja' Josia pinatoi ralalom ru pangayawan.

³⁰Pagawai-pagawai ru Raja' Josia napasakoi ra baangkai nano ra rondo' kurita' kuda am inibit minuli' ra Jirusalim. Linobong io ra kalabangan ru raja'. Kopongo raginio mamagun ru Jiuda nampili' ri Joaas, anak ungkuyon ru Raja' Josia, am nampalantik riso ra raja'.

³¹Umur ru Raja' Joagas ruo ngoopor am talu ngambilor paat ra io nasauk ra raja' giu' ra Jiuda. Raja' Joagas namarinta giu' ra Jirusalim buoi talu ngansila'. Ina' nano ininggalanan ri Gamutal anak ri Jirimia intor ra bandar Libna.

³²Makatula Raja' Joagas ra TUHAN koson ra binaal ru kinamatuaan nali.

³³Pamarintaan nano napupusan paat ra Raja' Niko intor ra Misir namparakop riso giu' ra Ribla, giu' ra pagun Gamat. Raja' Niko nampajajal ra mamagun ru Jiuda nambayar 3,400 ngakilogram pirok am 34 ngakilogram mas koson ra cukai.

³⁴Raja' Niko nampalantik ri Iliakim, anak ungkuyon ru Raja' Josia, koson namalit ra Raja' Josia masauk ra raja', am nangalig ra inggalan ri Iliakim nasauk ri Joyakim. Raja' Joagas inibit ru Raja' Niko minongoi ra Misir, tauli no Raja' Joagas minatoi ra giu' no.

³⁵Koson mambayar ra cukai ondo' kinitaak ru raja' ru Misir, Raja' Joyakim nampalulur ra cukai intor ra mamagun sumugut ra kamaanan ru sigagama'.

³⁶Umur ru Raja' Joyakim ruo ngoopor am limo ngambilor paat ra io nasauk ra raja' ru Jiuda. Namarinta io ra Jirusalim buoi mopor am rondo' ngambilor. Ina' nano ininggalanan ri Jibuda anak ri Pidaya intor ra bandar Ruma.

³⁷Makatula niayuk Raja' Joyakim ra TUHAN, koson ra binaal ru kinamatuaan nali.