Read Timugon Murut 2 RAJA'-RAJA' 3 Bible Online

2 RAJA'-RAJA' 3 - Timugon Murut bible

2 RAJA'-RAJA' 3

¹Paat ra bilor koopor am balu' ru pamarintaan ru Raja' Josapat giu' ra Jiuda, Raja' Joram ti anak ungkuyon ru Raja' Agab nasauk ra raja' ru Israil. Raja' Joram namarinta ra Samaria buoi mopor am ruo ngambilor.

²Makatula Raja' Joram ra TUHAN, kaa' laat nano sala' ka koson ra Raja' Agab, ama' nano kapoam i Ijibil, ina' nano. Linunsai ri Raja' Joram sinungkalalaing ondo' binaal ru ama' nano koson sumamba ra Baal.

³Kaa' koson ra Raja' Jirobiam anak ri Nibat ragili, Raja' Joram niayuk nangkinibit ra Israil makatula am kalo masaga' io tumalikur intor ra tula.

⁴Raja' Misa intor ra Moab, mokoondo' ra tinambiag ra domba. Moonong bilor mangani' io ra raja' ru Israil ra cukai suang no 100,000 ngainan anak domba, am bulu domba intor ra 100,000 ngainan domba.

⁵Kaa' paat ra Raja' Agab intor ra Israil no minatoi, giminuor Raja' Misa no ra Israil.

⁶Ginio ra nataki' Raja' Joram nangiruan ra Samaria am nanimung ra ngaangai' saujor nano.

⁷Nampakirim io ra tanou ragitio ra Raja' Josapat giu' ra Jiuda, “Raja' ru Moab no giminuor raki'. Masaga' kou kia mangayou mabaya' raki' koson gumula' ra raja' ru Moab?” Taam Raja' Josapat, “Iou, nakatampos aku no mangindangan rirun. Koon niayuk ra ulun-ulun am pulalai mangkuda kuno.

⁸Ati kia ra ralan musiti' takau bayaan koson mamulunsar risilo?” Indagu Raja' Joram, “Moonsoi maya' takau ra ralan maalur, ondo' mansail ra tana' kaagisan ru Idom.”

⁹Koon raginio noyo Raja' Joram nabaya' ra raja' ru Jiuda am raja' ru Idom minongoi ra pangayawan. Kopongo tulu' ngoorou pangkiralanan, nakayaan ilo ra timug inumon, saboi pinaason saujor nilo am bibiag pangaut ra kuliamos nilo.

¹⁰Golok Raja' Joram, “Aibui boo ritakau, sabap ra TUHAN no nangatang noyo koson mampataak ritakau talu ti ra raja' ru Moab!”

¹¹Pangkuot Raja' Josapat, “Mokoondo' kia ra sangulun nabi ragiti, maa' raginio makitulu' takau intor ra TUHAN?” Taam sangulun pagawai ru saujor ru Raja' Joram no, “I Ilisa anak ri Sapat soroi ragiti. Ragili io mangindangan ri Ilia.”

¹²Kon ru Raja' Josapat, “Topot! Totopot mindagu TUHAN no riso.” Talu ngaulun raja' no pana minongoi ri Ilisa.

¹³Indagu i Ilisa ra raja' ru Israil, “Kua musiti' aku mangindangan rirun? Ongoi no pangkuot ra nabi-nabi ru ama' am ina' muno ragili!” Taam Raja' Joram, “Kalo, sabap ra TUHAN no nangatang noyo koson mampataak ramon talu ngaulun ti ra raja' ru Moab.”

¹⁴Kon ri Ilisa, “Magibot aku ralalom inggalan ru TUHAN ondo' maayag no, ra amon ru sala' ka aku ti mangurumat ra Raja' Josapat intor ra Jiuda, kalo indanganon tokou.

¹⁵Raino piawo' sangulun mangkuli ra jitor.” Liliwa' ulun no mangkuli ra jitor nano, kuasa' ru TUHAN no liminibung ri Ilisa,

¹⁶am kono, “Koon raginio ragu ru TUHAN, ‘Pangkali no ra kukula' parit ra lonor ru sungoi boborok ondo' mapua' ti.

¹⁷Kabalu' pana kolondo' rasam kapoam angin, lonor ru sungoi boborok ti mototop ra timug. Okou pana am niayuk bibiag ra tinambiag am bibiag pagaut ra kuliamos muno maukapan ra timug inumon.’ ”

¹⁸Rayuso' poyo ri Ilisa, “Baal ragitio maluoi ra TUHAN. Io niayuk mangani' rirun ra kamanangan ra ulun ru Moab.

¹⁹Kalaan mu ngaangai' bandar nilo ondo' mokoondo' ra kubu am ondo' moonsoi. Tagaron mu ngaangai' puun kikinawa' nilo, mongompong ra ngaangai' taur ru timug am ngaangai' ru umo nilo ondo' malabung no bobolon ra batu saboi maluluyak kalingon.”

²⁰Suabon no, paat ra taak simbalui ra susuab ti kaindalaman pataakon, timug tumilis intor ra tampilon ru Idom am mamanu' ra lonor ru sungoi ondo' mapua' no.

²¹Paat ra ulun ru Moab nokorongog ra talu ngaulun raja' no nakasaboi noyo koson mamulunsar risilo, ngaangai' ru ungkuyon ondo' makaandar mangayou, intor ra ondo' matutuo noyo kaga' saboi ra ondo' mamulok poyo kaga', piniau am pinosoroi giu' ra balitan ru pagun.

²²Paat ra ilo timinirong ra suabon no, mato ru orou nakasinda ra ralimbou ru timug saboi makito malia' koson ra raraa'.

²³Golok ilo, “Ilai' nong, raraa'! Katalu-talu ru saujor ru pantula' takau maaru' nagagabu' am nampapatoi ra rondo' am bokon! Ibok takau ongoi pantakou ra pangkiman nilono!”

²⁴Kaa' paat ra ulun ru Moab nakasaboi giu' ra intok pangkiman, saujor ru Israil namulunsar am nangala risilo. Narayus ulun ru Israil nangilou liliwa' namatoi ra ulun ru Moab

²⁵am niayuk nampalunsai ra bandar-bandar nilo. Paat ra ilo nansail ra umo ondo' malabung, moonong ulun ru Israil nompobobol ra batu ra giu' no, saboi ngaangai' ru umo no natauban ru batu. Ilo niayuk nongompong ra ngaangai' taur ru timug ra giu' no am nantagar ra ngaangai' puun ru kikinawa'. Pupus no Pusor bandar Kir-Garisit ayuk soroi. Bandar raginio niayuk inawangan am binobol ra batu ru ulun momobol.

²⁶Paat ra raja' ru Moab nakaliman ra naala io noyo, pagibit io ra 700 ngaulun saujor ondo' nanangilang nababaya' riso, am kuminam sumubol ra tampilon ra raja' ru Idom,[3] kaa' kalo naalap.

²⁷Ginio ra nagibit raja' ru Moab no ra anak ungkuyon ra katuaan nano minongoi ra rasawat ru timbok ru bandar no am pataako' no io koson ra taak simbalui no ra dewa ru pagun ru Moab. Nangalaa'[4] ulun ru Israil saboi liminugut ilo intor ra bandar no, am uli' ra pagun nilo galama'.