Read Timugon Murut 2 RAJA'-RAJA' 6 Bible Online

2 RAJA'-RAJA' 6 - Timugon Murut bible

2 RAJA'-RAJA' 6

¹Paat ra sangarawan, pulalai ru nabi ondo' inila' ri Ilisa mindagu ri Ilisa, “Intok inayanan takati mapisok kaga'!

²Iowo' akai mongoi pantagar ra tataun mamaar ra Sungoi Jordan, maa' raginio makapanambaloi akai ra intok ayanan ra giu' no.” Taam i Ilisa, “Iou noyo.”

³Sangulun intor risilo nampajajal ri Ilisa maa' raginio maya' risilo; nangiou i Ilisa.

⁴Ginio ra nababaya' ilo minugar. Paat ra ilo nakasaboi mamaar ra Sungoi Jordan, tumalimpuun ilo mangandoi.

⁵Bulintok ra sangulun intor risilo mantagar ra sampuun tataun, pulali' ru ulu ru panaa' nano naratu' ra timug. Golok ulun no ri Ilisa, “Atan kia musiti' kuno baalon? Panaa' no iniraan ku intor ra ulun bokon!”

⁶Pangkuot i Ilisa, “Ati kia naratuan ru ulu ru panaa' no?” Panulu' ulun no ra intok no. Putulo' ri Ilisa rondo' tataun am papatiro' no ra intok no. Pulali' ru ulu ru panaa' intor ra basi' no liminabui ra ralimbou ru timug.

⁷Kon ri Ilisa, “Alapo'.” Tauro' ru ulun no ra kalindu' nano am alapo' ulu ru panaa' no.

⁸Rondo' paat ra raja' ru pagun ru Siria tatanga' mangayou ra Israil. Kopongo nansusunur ra panglima-panglima nano, pampili' raja' ru Siria no ra rondo' intok, am pangkim io ra giu' no.

⁹Kaa' panusub i Ilisa ra ulun mambala' ra baal raginio ra raja' ru Israil, am niayuk nampakara' maa' raginio kalo minggaar ra intok raginio, sabap ra ulun ru Siria tatanga' mawang ra giu' no.

¹⁰Nampakara' raja' ru Israil ra ulun ondo' minayan ra giu' no maa' raginio pagilalain nilo. Koson raginio noyo ra ingkukula' i Ilisa nampakara' ra raja'.

¹¹Raja' ru pagun ru Siria malasu' guang sabap ra baal raginio. Pampiau io ra panglima-panglima nano am pangkuot risilo, “Osoi kia intor ramuyun ondo' sumaung ra raja' ru Israil?”

¹²Taam sangulun intor risilo, “Kolondo' osoi pana, raja' kuno. Nabi Ilisa ondo' nambala' ra raja' ru Israil ra baal raginio, am niayuk ondo' rinagu muno giu' ra lamin pambalangan.”

¹³Kon ru raja', “Uyumo' io, am rokopon ku io.” Kabalai' raja' no ra soroi i Ilisa giu' ra Dotan,

¹⁴pangator io ra sampulalai maayo mongoi ra giu' no nabaya' ra kuda am kurita' kuda. Pulalai ru saujor no nakasaboi giu' ra bandar iorondom, am pinagawangan nilo bandar no.

¹⁵Suabon ra iosusuab tirong ulipon ri Ilisa, am ingkual intor ra baloi am nakakito ra saujor ru Siria nabaya' ra kuda am kurita' kuda nilo nampaliput ra bandar no. Saguli' io ri Ilisa am golok, “Alii boo ritakau ti, tuan! Atan kinua' musiti' baalon takau?”

¹⁶Kon ri Ilisa, “Pai' kalaa', ondo' bala takau masuang poyo intor risilo no.”

¹⁷I Ilisa pana pakiasi' boo, “Iou TUHAN, poloromo' mato ru ulipon kutu maa' raginio makakito io!” Nangiou TUHAN ra pakiasian nano. Ulipon ri Ilisa no nagilong am nakakito ra bulur no nososok ra kuda am kurita' kuda makaapui giu' ra libung ri Ilisa.

¹⁸Paat ra saujor ru Siria namulunsar risilo, pakiasi' i Ilisa, “Iou TUHAN, bolowo' mato ru ngaangai' ulun ti!” Nangiou TUHAN ra pakiasian nano am binolou mato nilono.

¹⁹Ratong i Ilisa risilo am indagu, “Nakalayau kau ra ralan! Gitio sala' ka bandar uyumon min. Sunu' kau raki'. Ibiton takamin ra ulun ondo' uyumon min.” Io pana nangaak risilo mongoi ra Samaria.

²⁰Pakasubol ilo ra bandar no, pakiasi' i Ilisa, “Ukabo' mato nilo ti, iou TUHAN. Polosoo' ilo makakito.” Nangiou TUHAN ra pakiasian nano am nangukab ra mato ru ngaangai' ulun no. Ilo pana nakatutun ra soroi ilo giu' ra Samaria.

²¹Pakakito raja' ru Israil ra saujor ru Samaria, pangkuot io ri Ilisa, “Tuan, musiti' kia potoyon ku ilo?”

²²Taam i Ilisa, “Pai'. Saujor-saujor pana ondo' rinakop muno ralalom ru pangayawan pana kalo pinatoi mu. Anii' ilo ra akanon am inumon, am polosoon ilo muli' ra raja' nilo.”

²³Ginio ra nambaal raja' ru Israil no ra bunsag maayo risilo. Pakaakan am pakainum ilo, panusub raja' no risilo muli' ra raja' ru Siria. Intor ragili ulun ru Siria kalo boo namulunsar ra pagun ru Israil.

²⁴Kalo nabuoi raiti, Raja' Bingadad intor ra pagun ru Siria naningganai ra ngaangai' ru saujor nano minanggal ra Israil am nagawang ra bandar Samaria.

²⁵Kinibit nano, bitilan ra makalalaa' nasauk giu' ra bandar raginio saboi rondo' ulu ru kaladai logo no 80 ngampila' ruit pirok am 200 ngagram tatai' ru susuit asang[8] logo no 5 ngampila' ruit pirok.

²⁶Tatanga' raja' ru Israil no mangkiralan giu' ra rasawat ru timbok ru bandar paat ra sangulun ruandu' giminolok riso, “Raja' kuno, indangano' aku!”

²⁷Taam raja' no, “Amon ru kalo mangindangan TUHAN no rirun, ati kulaan aku ti mangindangan rirun? Kolondo' gandum kapoam wain kutu!

²⁸Atan kapaganan muno?” Kon ru ruandu' no, “Ruandu' ti nangatang maa' raginio akai ruo mangakan ra anak kuno galing, am orou sumunu' no mangakan ra anak nano.

²⁹Ginio ra mangansak akai ra anak kuno am akanon mai ginio. Susuab no mambala' aku riso ra musiti' mai akanon anak nano boo, kaa' sinibuni no anak nano!”

³⁰Pokorongog raja' raginio, rilako' no bayang nano sabap ra mangiluk guang. Ngaangai' ru ulun ondo' mamaar ra timbok no nakakito ra raja' no nambayang ra karung pinaralalom ra bayang nano.

³¹Golok raja' no, “Gama' ru i Aki Kapuuno' mamatoi raki' amon ru ulu ri Ilisa kalo ingguluin ra orou raiti'!”

³²Ginio ra panusub raja' ra ulun mamparakop ri Ilisa. Paat raginio soroi i Ilisa giu' ra baloi nababaya' ra kukula' ngaulun tingganai ru mamagun ondo' nanambului riso. Kalo poyo nakasaboi ulun sinusub ru raja', indagu i Ilisa ra tingganai-tingganai no, “Ulun mamatoi no tatanga' manusub ra ulun mamatoi raki'! Paat ra ulun no makasaboi, kaputi' kulobon am pai' io pasubolo'. Raja' galama' matong sumunu' riso.”

³³Kalo poyo nakai' ragu-ragu ri Ilisa, raja'[9] pana minatong am indagu, “TUHAN naparatong ra kapaganan ti ritakau! Atan kia onong kuno maginaa ra indangan Nano?”