Read Timugon Murut 2 RAJA'-RAJA' 7 Bible Online

2 RAJA'-RAJA' 7 - Timugon Murut bible

2 RAJA'-RAJA' 7

¹Indagu i Ilisa, “Rongogo' noyo ragu ru TUHAN! Susuab no olo'-olo' paat ragitio, giu' ra Samaria ulun makabali ra 3 ngakilogram gandum ondo' moonsoi kaga' kapoam 6 ngakilogram barli ra logo sampila' ruit pirok.”

²Kaa' indagu pagawai saujor ru raja' no ri Ilisa, “Bai-bai boo! Kabalu' pana TUHAN galama' mamparatu' ra rasam[10] ra raino ti niayuk, bai-bai boo ru baal raginio!” Taam i Ilisa, “Makainono' kou raginio, kaa' kalo makaakan kou ra akanon no.”

³Apat ngaulun ondo' makamaruol ru kungkung ondo' makalalaa' tatanga' soroi giu' ra liwar ru bandar Samaria. Pasakuot ilo ra rondo' am bokon, “Atan onong takau maginaa ra matoi ragiti?

⁴Kolondo' onong takau mumpos ra bandar, sabap ra matoi takau ra maitilan ra giu' no. Amon ru mayan takau ragiti, matoi takau niayuk. Ibok ongoi takau ra pangkiman ru ulun ru Siria; ondo' mabaal nilo mamatoi ritakau, kaa' osoi makapandai ra maaru' lair kalo mampajamar ilo ritakau.”

⁵Ginio ra paat ra orou tumalimpuun palunggai', ongoi ilo ra pangkiman ru ulun ru Siria. Kaa' paat ra ilo nakasaboi ra intok no, kolondo' ulun ra giu' no.

⁶TUHAN noyo nangkinibit ra saujor ru Siria nokorongog ra bolos koson ayuk ra rondo' pulalai ru saujor maayo ondo' minatong pamulunsar risilo ra kuda am kurita' kuda. Indoson ru saujor ru Siria ra raja' ru Israil nagakut ra raja' ru ulun ru Git am raja' ru ulun ru Misir am ngaangai' saujor nilo koson mamulunsar ra saujor ru Siria.

⁷Ginio ra, paat ra mamai' no saujor ru Siria nagigiru' am niayuk nanatang ra kim, kuda, kaladai nilo koon raginio ayuk giu' ra pangkiman.

⁸Pakasaboi apat ngaulun no giu' ra kiing ru pangkiman, umpos ilo ra rondo' ra kim no. Akano' am inumo' nilo atan ayuk ondo' soroi ra giu' no. Nangalap ilo ra pirok, mas am bayang ondo' nauliat nilo. Binuni nilo kuliamos-kuliamos raginio, am umpos poyo ra kim ra bokon no; binaal nilo baal ra nogondo'.

⁹Kopongo raginio indagu ilo ra rondo' am bokon, “Itakau kalo musiti' mambaal ragitio! Mokoondo' takau ra tanou moonsoi, am ginio kalo moopot takau. Amon ru maginaa takau saboi ra susuab no, maaru' ukumin takau. Ibok ugar takau ra mataki' am pambala' ra pagawai-pagawai ru raja'!”

¹⁰Ginio ra iruani' nilo pangkiman ru ulun ru Siria am saguli' ra Samaria. Golok ilo ra ulun magalung ra kulobon ru bandar, “Minongoi akai ra pangkiman ru ulun ru Siria, kaa' kolondo' nakito kapoam norongog mai ra osoi pana. Kuda am kaladai nilo lakat poyo narukugan ra intok no, am pangkiman no iniruanan koon raginio ayuk.”

¹¹Ulun magalung ra kulobon no nampatanou raginio, saboi ulun nampasaboi raginio ra istana.

¹²Orou lakat poyo molondom, kaa' tirong raja' am indagu ra pagawai-pagawai nano, “Balain takamin ra atan arati' ru ulun ru Siria no! Nakapandai ilo ra itakau nangaitilan. Ginio ra nangiruan ilo ra pangkiman am pansibuni giu' ra limayak. Malansan ilo ritakau mingkual maguyum ra akanon, am ilo pana mamparakop ritakau ra maayag ti am mampagaau ra bandar takau.”

¹³Sangulun intor ra pagawai ru raja' no mindagu, “Kabalu' pana raginio mamagun ru bandar ti matoi koson risilo ondo' minatoi noyo. Moonsoi poyo mangator takau ra kukula' ngaulun mangkuda ra limo ngainan ondo' lakat poyo soroi, maa' raginio makapandai takau ra atan ondo' nasauk.”

¹⁴Nampili' ilo ra kukula' ngaulun, am raja' pana nanusub risilo sumakoi ra ruo kurita' kuda. Sinusub ilo mangimumui ra atan ondo' nasauk ra saujor ru Siria no.

¹⁵Minugar ilo saboi ra Sungoi Jordan, am giu' ra galur ru ralan nakakito ilo ra bayang am kuliamos-kuliamos ondo' tinatang ru ulun ru Siria paat ra ilo nagigiru'. Kopongo raginio ulun-ulun sinusub no siminaguli' am pambala' ra raja' ra baal raginio.

¹⁶Ingkual boo mamagun ru Samaria am nanalingaau ra pangkiman ru ulun ru Siria. Koson ra ragu ru TUHAN, 3 ngakilogram gandum ondo' moonsoi kaga' kapoam 6 ngakilogram barli tinalan ru ulun ra logo sampila' ruit pirok ayuk.

¹⁷Nakainamot paat raginio, pagawai saujor ru raja' pinangandoi magalung ra kulobon garabang ru bandar. Minatoi io ra giu' no sabap ra nakinjangan ru ulun masuang. Koon raginio noyo ondo' rinagu ri Ilisa paat raja' timinuum riso.

¹⁸Nambala' noyo i Ilisa ra raja' ra paat raginio ra suabon no, 3 ngakilogram gandum ondo' moonsoi kaga' kapoam 6 ngakilogram barli ondo' talanon giu' ra Samaria ra logo sampila' ruit pirok.

¹⁹Paat raginio indagu pagawai saujor ru raja' no, “Bai-bai boo! Kabalu' pana TUHAN galama' mamparatu' ra rasam[11] ra raino ti niayuk, bai-bai boo ru baal raginio!” Taam i Ilisa, “Makainono' kou raginio, kaa' kalo makaakan kou ra akanon no.”

²⁰Ginio noyo ondo' nasauk riso — minatoi io nakinjangan ru mamagun ru bandar giu' ra kulobon garabang.