Read Timugon Murut 1 TUNUNG RU BANSA' ISRAIL 10 Bible Online

1 TUNUNG RU BANSA' ISRAIL 10 - Timugon Murut bible

1 TUNUNG RU BANSA' ISRAIL 10

¹Ulun ru Palistin nangayou ra ulun ru Israil giu' ra Gunung Gilboa. Masuang ulun ru Israil pinatoi ra giu' no, am ondo' bokon no, nakaaya' Raja' Saul am anak-anak ungkuyon nano, nagigiru'.

²Kaa' ulun ru Palistin nangilou risilo am namatoi ra talu ngaulun anak ungkuyon ru Raja' Saul, iono i Jonatan, Abinadab am Malkisua.

³Pangayawan moporos kaga' no giu' ra intok ru Raja' Saul, am napilatan io sabap ra natiu' ra panah ru pantula'.

⁴Kopongo raginio indagu Raja' Saul ra buayoi ondo' nagibit ra kinandoi nano, “Butuso' ilang muno am toboko' aku, maa' raginio aku kalo kukulion ru ulun ru Palistin ondo' kalo makaulig ri Aki Kapuuno'.” Kaa' malaa' kaga' buayoi no mambaal raginio. Ginio ra alapo' ru Raja' Saul ilang nano galama' am gaba' io ra rasawat ru ilang no.

⁵Kakito ru buayoi no ra minatoi Raja' Saul, io niayuk giminaba' ra rasawat ru ilang nano am patoi.

⁶Ginio ga boo ra Raja' Saul am talu anak ungkuyon nano minatoi, am napupusan noyo pamarintaan nano; kolondo' sangulun pana intor ra papag nano nasauk ra raja' nalupus raginio.

⁷Paat ra ngaangai' ulun ru Israil ondo' minayan giu' ra Limayak Jijriil nokorongog ra saujor nilo nagigiru', am ra Raja' Saul am talu anak ungkuyon nano minatoi noyo, iniruanan nilo bandar-bandar nilo am pagigiru'. Kopongo raginio ratong ulun ru Palistin am ayan ra bandar-bandar no.

⁸Songorou nalupus pangayawan no, ulun ru Palistin nanguliat ra baangkai ru saujor ru Israil. Natuum nilo baangkai ru Raja' Saul am talu anak ungkuyon nano giu' ra Gunung Gilboa.

⁹Inalusan nilo Raja' Saul ra bayang mangayou, am iningguluan ulu nano, am inibit minugar. Kopongo raginio nangator ilo ra ulun sinusub minongoi ra titikop pagun ru Palistin koson mampasaboi ra tanou moonsoi no ra bansa' am dewa-dewa nilo.

¹⁰Binulian nilo bayag mangayou ru Raja' Saul giu' ra ralalom ru rondo' kuil nilo, am nampatair ra ulu ru Raja' Saul giu' ra ralalom ru kuil Dagon, dewa nilo.

¹¹Paat ra mamagun ru Jabis giu' ra Giliad nokorongog ra atan ondo' binaal ru ulun ru Palistin ra Raja' Saul,

¹²kukula' ngaulun risilo ondo' baani kaga' minongoi pangalap ra baangkai ru Raja' Saul am anak-anak ungkuyon nano. Inibit nilo baangkai-baangkai no ra Jabis, am linobong baangkai raginilo giu' ra saau ru puun makalu. Kopongo raginio nampapali ilo buoi tulu' ngoorou.

¹³Raja' Saul minatoi sabap ra kalo giminagaya' io ra TUHAN, am kalo siminugut ra susuban ru TUHAN. Nakitulu' Raja' Saul intor ra ambiluo ru ulun namagatoi,

¹⁴am kalo nakitulu' intor ra TUHAN. Ginio ra TUHAN nangukum matoi ra Raja' Saul am nampataak ra pamarintaan nano ri Daut anak ri Isai.