Read Timugon Murut 1 TUNUNG RU BANSA' ISRAIL 14 Bible Online

1 TUNUNG RU BANSA' ISRAIL 14 - Timugon Murut bible

1 TUNUNG RU BANSA' ISRAIL 14

¹Raja' Giram intor ra Tirus nanusub ra duta-duta nano mongoi ra Raja' Daut, am nangator niayuk ra tataun sidar, ulun manukang ra tataun, am niayuk ulun manukang ra batu koson mambaal ra istana.

²Ginio ra nakaliman Raja' Daut ra TUHAN nangikang ra intok nano koson ra raja' ru Israil am nangikang ra pamarintaan nano koson ra kaatangan ru ulun ru TUHAN.

³Giu' ra Jirusalim, Raja' Daut nanangandu' ra kukula' ngaulun poyo, am nokoowot ra masuang poyo anak ungkuyon am ruandu'.

⁴Gitilo noyo anak-anak ungkuyon nano ondo' inanak giu' ra Jirusalim: I Syamua, Sobab, Natan, Salomo.

⁵Jibgar, Ilisua, Ilpilit,

⁶Noga, Nipig, Japia,

⁷Ilisama, Biilyada,[27] am Ilipilit.

⁸Paat ra ulun ru Palistin nokorongog ra Raja' Daut nasauk noyo ra raja' ru titikop ru Israil, minatong ilo koson mamparakop riso. Ginio ra minongoi Raja' Daut pangayou risilo.

⁹Ulun ru Palistin nakasaboi giu' ra Limayak Ripaim am tumalimpuun mantakou.

¹⁰Nokorongog raginio, pangkuot Raja' Daut ri Aki Kapuuno', “Musiti' kia bulunsaron ku ulun ru Palistin? Aniin Mu kia aku ra kamanangan?” Taam TUHAN, “Bulunsaro' noyo! Aniin Tokou ra kamanangan!”

¹¹Ginio ra Raja' Daut namulunsar ra ulun ru Palistin giu' ra Baal-Pirasim am nangala risilo. Indagu Raja' Daut, “Koson ra liur maayo, jinunjung ri Aki Kapuuno' pantula' kuno ondo' pinaumbaya' raki'.” Ginio sabap ra intok no ininggalanan ra Baal-Pirasim.[28]

¹²Paat ra saujor ru Palistin nagigiru', iniruanan nilo sinungkalalaing sambaan nilono. Nanusub Raja' Daut koson monolob ra sinungkalalaing raginio.

¹³Kalo nabuoi raginio, ulun ru Palistin siminaguli' ra Limayak Ripaim am nantakou poyo.

¹⁴Igondo' poyo Raja' Daut nakitulu' intor ri Aki Kapuuno', am taam i Aki Kapuuno', “Pai' ilo bulunsaro' ragiti, kaa' ugar no ra lumiput am bulunsaro' ilo intor ra sandaup, mamaar ra puun-puun tataun kertau.

¹⁵Paat ra akau mokorongog ra bolos kinuralap giu' ra rasawat ru puun-puun tataun no, pamulunsar kano, sabap ra mugar Aku magulu ramuyun koson mangala ra saujor ru Palistin.”

¹⁶Sinugut ru Raja' Daut nanusuban ri Aki Kapuuno' riso. Raja' Daut am pulalai nano nangala toojo ra ulun ru Palistin, timinalimpuun intor ra Gibion saboi ra Gijir.

¹⁷Ginio ra inggalan ru Raja' Daut nauligan kaga' giu' ra ati-ati intok, am TUHAN nangkinibit ra ngaangai' bansa' malaa' ra Raja' Daut.