Read Timugon Murut 1 TUNUNG RU BANSA' ISRAIL 17 Bible Online

1 TUNUNG RU BANSA' ISRAIL 17 - Timugon Murut bible

1 TUNUNG RU BANSA' ISRAIL 17

¹Sangarawan raiti, paat ra Raja' Daut norondon noyo ra istana nano, piniau ru Raja' Daut i Nabi Natan am indagu, “Ilai', minayan aku ra istana ondo' binaal intor ra tataun sidar, liliwa' Kaban Nabantuan ru TUHAN soroi ayuk giu' ra ralalom ru kim!”

²Taam i Natan, “Baalo' noyo atan ayuk kasagaan muno raja' sabap ra i Aki Kapuuno' mabaya' rirun.”

³Kaa' paat rondom raginio minindagu TUHAN ri Natan,

⁴“Ongoi posoboyo' ragu Kutu ra ulipon Kuno i Daut, ‘Sala' ka okou mambaal ra baloi Kuno.

⁵Intor ra Aku nampalabus ra ulun ru Israil intor ra Misir saboi raino, kalo poyo igondo' Aku ayan ra rondo' baloi. Masalok Aku mayan ra kim am manding intor ra rondo' intok mongoi ra intok ra bokon.

⁶Buoi ru pangkiralanan Kuno am ulun ru Israil, kalo poyo igondo' Aku pangkuot ra osoi pana tingganai ondo' linantik Kuno, atan sabap ra ilo kalo nambaal Raki' ra baloi intor ra tataun sidar.’

⁷Ginio ra balai' ulipon Kuno i Daut ra Aku, TUHAN Ondo' Maayo Kaga' Kuasa' minindagu riso, ‘Okou inalap Ku intor ra kandoi muno koson ra magagalung ra domba giu' ra padang, am nampasauk rirun ra raja' ru ulun Kuno Israil.

⁸Nabaya' Aku rirun ra ati ayuk angayan muno, am kalaan Ku ngaangai' pantula' muno paat ra okou mangayou. Okou pasaukon Ku ra mauligan kaga' koson ra tingganai-tingganai maayo kaga' ra tana' ti.

⁹Pinili' Ku rondo' pagun ra tayar ru ulun Kuno Israil, am pinaayan Ku ilo ra giu' no. Ilo kalo boo imboloon ru osoi pana. Intor ra ilo minayan ra pagun no, am ra ilo kolondo' poyo raja', binulunsar ilo ru ulun malaat, kaa' intor raino baal raginio kalo boo maluli'. Binantu' Ku mangala ra ngaangai' pantula' muno, am okou aniin Ku ra papag.

¹¹Paat ra masaboi patayan muno, am lobongon kou giu' ra kalabangan ru kinamatuaan muno, lantikon Ku sangulun intor ra anak ungkuyon muno masauk ra raja', am ikangon Ku pamarintaan nano.

¹²Io noyo ondo' mambaal ra baloi Kuno, am tutunon ku koson ra sabubuoi no sangulun intor ra papag nano mamarinta koson ra raja'.

¹³Masauk Aku ra Ama' nano, am masauk io ra anak Kuno. Magulayun Aku moonsoi riso nontopot ra bantu' Kuno. Bantu' Kuno riso magulayun Ku guuton, am kalo koson ra binaal Kuli ri Saul ondo' inimpayan Kuli intor ra intok nali maa' raginio okou masauk ra raja'.

¹⁴Anak ungkuyon muno ondo' pilion Kuno saukon Ku ra raja' ru ulun Kuno am pamarintaan Kuno koson ra sabubuoi no, am anak akupu nano ra mansusugul mamarinta koson ra raja'.’ ”

¹⁵Nambala' i Natan ra Raja' Daut ra ngaangai' ondo' pinabala' ri Aki Kapuuno' riso.

¹⁶Raja' Daut pana minumpos boo ra ralalom ru Kim ru TUHAN. Nanturung Raja' Daut am pakiasi', “Iou TUHAN i Aki Kapuuno', aku am sasambaloi kuno kalo maaya' mangapu ra ngaangai' moonsoi ondo' pinakito Muno raki' ra buoi ti.

¹⁷Kaa' raino nambaal Kou ra nasailan intor ra ngaangai' no; nakimabantu' Kou intor ra papag kuno ra orou matong. Okou niayuk poyo, iou TUHAN i Aki Kapuuno', nambaal raki' koson ra sangulun tingganai maayo.

¹⁸Atan poyo ondo' maragu kuno Rirun! Nakapandai Kou ra ngaangai' no intor ra ulipon Mutu, kaa' nangani' Kou ra pangurumatan raki'.

¹⁹Sabap ra kasagaan Muno am inatangan Muno, binaal Mu ngaangai' baal maayo ti raki', am koson nampakito ra kinaayo kuno paat ra orou matong, raki'.

²⁰Iou TUHAN, kolondo' mokogondo' Rirun; intor ragili, nakapandai akai noyo ra Okou noyo rorondo' i Aki Kapuuno'.

²¹Giti ra titikop ru tana' ti kolondo' bansa' koson ra Israil, ondo' binayag Mu intor ra pangulipanan, koson mampasauk risilo ra ulun Muno galama'. Binaal maayo am makaimuag ondo' binaal Muno risilo, mampasauk ra inggalan Muno mauligan kaga' ra titikop ru tana' ti. Pinalabus Mu ulun Muno intor ra Misir, am napagiru' ra bansa'-bansa' ra bokon paat ra ulun Muno minongoi pangayou.

²²Pinasauk Mu Israil ra ulun Muno galama' ra sabubuoi no. Okou, iou TUHAN, masauk ri Aki Kapuuno' nilo.

²³“Raino, iou TUHAN, suguto' noyo bantu' ondo' rinagu Muno intor ra inan kuno am papag kuno, koson ra kalo lalanggain. Baalo' noyo atan ondo' binantu' Muno.

²⁴Okou mauligan kaga' ra sabubuoi no, am koson ra sabubuoi no ulun mindagu, ‘TUHAN Ondo' Maayo Kaga' Kuasa' iono i Aki Kapuuno' ru ulun ru Israil.’ Ginio ra, Okou mangaru' ra sangulun intor ra papag kuno mamarinta koson ra raja' ra kalo lumonggo'-longgo'.

²⁵Baani aku makiasi' koon raginio, iou Aki Kapuuno' kuno, sabap ra Okou nambala' ra ngaangai' no raki', ulipon Mutu. Nambala' Kou raki' ra papag kuno pasaukon Mu ra raja'-raja' ru bansa' ragitio.

²⁶Iou TUHAN, Okou no i Aki Kapuuno', am binantu' Mu baal ra moonsoi kaga' ti raki'.

²⁷Kitaakon ku, kasaga' no mambarakat ra papag kuno maa' raginio magulayun ilo makaliman ra togom Muno ra sabubuoi no. Okou, iou TUHAN, nambarakat noyo risilo am magulayun Kou mambarakat risilo saboi ra sabubuoi no.”