Read Timugon Murut 1 TUNUNG RU BANSA' ISRAIL 19 Bible Online

1 TUNUNG RU BANSA' ISRAIL 19 - Timugon Murut bible

1 TUNUNG RU BANSA' ISRAIL 19

¹Kukula' buoi raiti, Raja' Nagas, ondo' namarinta ra pagun ru Amon minatoi, i Ganun boo, anak ungkuyon nano nasauk ra raja'.

²Indagu Raja' Daut, “Raja' Nagas noyo rangan kuno toojo. Ginio ra musiti' aku niayuk rumangan toojo ri Ganun, anak nano.” Ginio ra nangator Raja' Daut ra ulun sinusub koson mampasaboi ra ragu mangiluk ra Raja' Ganun sabap ra pinatayan ru ama' nano. Paat ra ulun-ulun sinusub no nakasaboi giu' ra Amon,

³tingganai-tingganai ru pagun ru Amon minindagu ra Raja' Ganun, “Pai' noyo karaa' ra nangator Raja' Daut ra ulun-ulun sinusub no koson mampasaboi ra ragu mangiluk sabap ra masaga' io mangurumat ra ama' muno raja'. Nangator Raja' Daut ra ngaangai' ru ulun no ragiti koson ra mansigo am koson mangintutun ra pagun takau, maa' raginio magaau no!”

⁴Rinakop ru Raja' Ganun ulun sinusub ru Raja' Daut, am sinukur jangut nilo, pinutul bayang nilo saboi ra puun ru paa, nalupus raginio sinusub ilo minugar.

⁵Ulun-ulun sinusub no mauyu' kaga' muli'. Paat ra baal raginio pinabala' ra Raja' Daut, nangator io ra bilin maa' raginio ulun-ulun sinusub no mayan ra Jiriko saboi jangut nilo tumuu' saguli'.

⁶Kopongo raginio Raja' Ganun am ulun ru Amon nakaliman ra ilo nampasauk ra Raja' Daut ra pantula' nilo. Ginio ra nambayar ilo 34,000 ngakilogram pirok koson maniwa' ra kurita' kuda am ulun magibit intor ra Ralayo Misopotamia, am niayuk intor ra Maakga am Joba giu' ra pagun Siria.

⁷Kurita' kuda ra suang no 32,000 ondo' siniwaan nilo, am niayuk saujor ru raja' Maakga minatong pangkim mamaar ra Midiba. Ulun ru Amon niayuk miningkual intor ra ngaangai' bandar nilo am timinampos koson mangayou.

⁸Paat ra Raja' Daut nokorongog ra baal raginio, nanusub io ri Joab am ngaangai' pulalai ru saujor maa' raginio mongoi anggal ra pantula'.

⁹Ulun ru Amon miningkual am nampatampos ra saujor nano giu' ra saang ru kulobon garabang Raba, pusor bandar nilo; liliwa' raja'-raja' ondo' minatong koson mangindangan risilo, nampatampos ra saujor nilo giu' ra padang.

¹⁰Nakaliman i Joab ra naaput io ru pulalai ru pantula' giu' ra saang am giu' ra talikuron. Ginio ra nampili' io ra saujor-saujor ru Israil ondo' moonsoi kaga' am pinosoroi ilo maguma' ra saujor ru Siria.

¹¹Pinataak ri Joab pulalai ru saujor ra bokon no ra boborok nano, i Abisai. Pinosoroi ri Abisai ilo giu' ra saang ru saujor ru Amon.

¹²Kon ri Joab ra boborok nano, “Amon ru kalo noyo maala ku saujor ru Siria, ribaki' ratong no pangindangan raki'. Kaa', amon ru kalo noyo maala mu saujor ru Amon, matong aku mangindangan rirun.

¹³Kaikango' guang muno! Ibok takau manggal ra baani koson ra bansa' takau am koson ra bandar-bandar ri Aki Kapuuno' takau. Gama' ru baalon ru TUHAN atan ondo' kasagaan Nano.”

¹⁴I Joab am pulalai nano minongoi pangayou, saboi nagiru' saujor ru Siria.

¹⁵Paat ra saujor ru Amon nakakito ra nagiru' saujor ru Siria, iniruanan nilo i Abisai am subol ra ralalom ru bandar. Kopongo raginio minuli' i Joab ra Jirusalim.

¹⁶Nakaliman ulun ru Siria ra kinala ilo ru ulun ru Israil. Ginio ra piniau nilo saujor nilo ondo' soroi giu' ra tampilon sirangon ru Sungoi Iprat, am nanusub risilo mongoi pangayou ra tiningganai ri Sobak, panglima saujor ru Raja' Gadadijir, ondo' namarinta giu' ra Joba.

¹⁷Pokorongog Raja' Daut ra baal raginio, tinimung no ngaangai' pulalai ru Israil, am liminaup ra Sungoi Jordan am nampatampos ra saujor nano maguma' ra saujor ru Siria. Timinalimpuun ilo nampatoi.

¹⁸Saujor ru Israil nampalugut ra saujor ru Siria. Raja' Daut am saujor nano namatoi ra 7,000 ngaulun magibit ra kurita' kuda am 40,000 ngaulun intor ra pulalai mantana'. Ilo niayuk namatoi ri Sobak, panglima saujor ru Siria.

¹⁹Paat ra raja'-raja' ondo' kinuasa' ru Raja' Gadadijir nakaliman ra kinala ilo ru saujor ru Israil, nobobonsoi raja'-raja' no ra Raja' Daut am kiminuku' ra kuasa' nano. Intor raginio kalo boo masaga' ulun ru Siria mangindangan ra ulun ru Amon.