Read Timugon Murut 1 TUNUNG RU BANSA' ISRAIL 21 Bible Online

1 TUNUNG RU BANSA' ISRAIL 21 - Timugon Murut bible

1 TUNUNG RU BANSA' ISRAIL 21

¹Masaga' Tingganai ru riwato mantipagon ra ulun ru Israil; ginio boo ra inambi' no Raja' Daut maa' raginio manguntob ra mamagun ru Israil.

²Nanusub Raja' Daut ri Joab am pagawai-pagawai nano ra bokon, “Untobo' mamagun giu' ra titikop ru Israil, sabap ra moogot aku makapandai ra suang ru mamagun ru Israil.”

³Taam i Joab, “Gama' ru ruangin poyo ru TUHAN suang ru mamagun ru Israil saboi maatus ruli' intor ra suang ondo' soroi raino ti. Raja' kuno, kalo kia nakito toojo ra kiminuku' ilo rirun raja'? Kua musiti' paugaron panguntaban? Maagu no, sabap ra kasalaan raginio, ngaangai' bansa' makinibitan raginio!”

⁴Kaa' rinayus ru raja' susuban nano, i Joab pana minongoi ra titikop ru Israil, kalupus raginio siminaguli' ra Jirusalim.

⁵Pinabala' ri Joab ampos ru panguntaban no ra Raja' Daut. Suang ru ungkuyon ondo' sasama' koson maya' ra saujor iono 1,100,000 ngaulun giu' ra Israil am 470,000 ngaulun giu' ra Jiuda.

⁶Kaa' bansa' ru Liwi am bansa' ru Binjamin kalo nakaaya' ra panguntaban no. Kalo inuntob ilo ri Joab sabap ra kalo nangiou io ra susuban ru raja' no.

⁷Siminangit i Aki Kapuuno' sabap ra atan ondo' nasauk, Io pana nangukum ra ulun ru Israil.

⁸Raja' Daut pana pakiasi' boo ri Aki Kapuuno', “Iou Aki Kapuuno', nambaal aku no ra tula maayo! Ampuno' aku no, sabap ra binaal kuno sasambungon kaga'.”

⁹TUHAN pana mindagu boo ri Gad, nabi ondo' nangandoi ra Raja' Daut,

¹⁰“Ongoi balai' Raja' Daut ra aniin Ku io ra talu pilion. Atan ayuk pilion nano baalon Ku.”

¹¹Minuma' i Gad ra Raja' Daut am nampasaboi ra ragu ru TUHAN no, kono, “Ati ka rondo' ondo' pilion muno raja'?

¹²Pagun ti matiu' ra bitilan buoi talu ngambilor, kapoam magiru' kou ilowon ru pantula' buoi talu ngansila', kapoam buoi ru talu ngoorou titikop pagun ti bulunsaron ru TUHAN ra ilang Nano ondo' ginio maruol tumapik am malaikat Nano magibit ra kapatayan ra ngaangai' intok. Taaman ra atan kia musiti' ku posoboyon ra TUHAN?”

¹³Indagu Raja' Daut ri Gad, “Baal kutu mapagon kaga'! Pai' noyo ra ulun mangukum raki'. Moonsoi poyo ra TUHAN galama' ondo' mangukum raki', sabap ra asi' Nano maayo.”

¹⁴Ginio ra pinaratong ru TUHAN maruol tumapik ra ulun ru Israil saboi 70,000 ngaulun intor risilo minatoi.

¹⁵Kopongo raginio nanusub TUHAN ra rondo' malaikat koson mamuso ra Jirusalim. Kaa' paat ra malaikat no nakasaboi mamaar ra pangagikan ra gandum longgom ri Arauna ulun ru Jibusi, kinulau ru TUHAN kapatasan Nano koson mangukum ra Jirusalim. Indagu Io ra malaikat no, “Sama' noyo! Langgai'!”

¹⁶Nakito ru Raja' Daut malaikat no minigor ra pangkilolot ru limbowon am tana' ti, liliwa' nampaguut ra ilang ondo' pinaakang, nakatampos koson mamuso ra Jirusalim. Raja' Daut am tingganai-tingganai pana ondo' nambayang ra karung koson tatandu' pansagulian, kiminuku' nokosonor ra tana'.

¹⁷Pakiasi' Raja' Daut, “Iou Aki Kapuuno', aku noyo ra sala. Aku noyo ondo' nanusub ra ulun nampaugar ra panguntaban no. Atan kia kasalaan ru bansa' ragitio? Iou TUHAN, Aki Kapuuno' kuno, ukumi' aku no am sasambaloi kuno, kaa' painggaluro' karaat ti intor ra ulun Muno.”

¹⁸Kopongo raginio nanusub malaikat ru TUHAN ri Gad mambala' ra Raja' Daut maa' raginio mongoi ra intok mangagik ra gandum longgom ri Arauna am mambaal ra altar ru TUHAN ra giu' no.

¹⁹Ginio ra minongoi Raja' Daut sumugut ra susuban ru TUHAN ondo' pinasaboi ri Gad riso.

²⁰Giu' ra intok pangagikan, i Arauna am apat ngaulun anak ungkuyon nano tatanga' mangagik ra gandum. Paat ra ilo nakakito ra malaikat no, kaapat-apat ngaulun anak ri Arauna nagiru' minongoi pansibuni.

²¹Paat ri Arauna nakakito ra Raja' Daut matong, inuma' no io am igulatur ra saang nano.

²²Indagu Raja' Daut riso, “Masaga' aku mambaal ra altar ru TUHAN ra intok ragitio. Ginio ra talano' tana' ti raki'. Raguo' noyo kula' logo no, am bayarin ku.”

²³Taam i Arauna, “Raja' kuno, alapo' noyo, baalo' noyo ngaangai' kasagaan muno raja'. Alapo' noyo sapi'-sapi' ti koson ra taak simbalui koson mapabansuk ra guang ru TUHAN, am alapo' noyo papan pangagikan koson ra luton. Alapo' noyo gandum koson pataakon koson ra taak simbalui kaunaran. Taakin ku ngaangai' no rirun raja'. Kalo pana bayarin mu logo no.”

²⁴Kaa' taam raja', “Kalo, masaga' aku mambali raginio ra logo toojo. Marara' aku mampataak ra longgom muno ra TUHAN, kapoam ngaangai' ondo' maalap kuno ra kalo bayarin.”

²⁵Raja' Daut pana nambayar boo ra 600 ngampila' ruit mas ri Arauna koson intok raginio.

²⁶Nambaal Raja' Daut rondo' altar ru TUHAN ra giu' no, am nampataak ra taak simbalui koson mapabansuk ra guang ru TUHAN am taak simbalui koson makibarakat ra TUHAN.[35] Io pana pakiasi' boo am nangiou TUHAN ra pakiasian nano ra namparatu' ra apui intor ra limbowon koson monolob ra taak-taak simbalui raginio giu' ra rasawat ru altar no.

²⁷Nanusub TUHAN ra malaikat mampasubol ra ilang nano ra angkap, malaikat no pana giminagaya'.

²⁸Nakakito Raja' Daut ra nangiou TUHAN ra pakiasian nano, io pana nampataak ra taak simbalui giu' ra rasawat ru altar no.

²⁹Paat raginio Kim ru TUHAN ondo' binaal ri Musa giu' ra tana' kaagisan, am altar intok pampataakan ra taak simbalui koson mapabansuk ra guang ru TUHAN,[36] lakat poyo giu' ra intok sambayangan giu' ra Gibion.

³⁰Kaa' kalo makakau' Raja' Daut mongoi ra giu' koson sumamba ri Aki Kapuuno', sabap ra malaa' io ra ilang ru malaikat ru TUHAN.