Read Timugon Murut 1 TUNUNG RU BANSA' ISRAIL 23 Bible Online

1 TUNUNG RU BANSA' ISRAIL 23 - Timugon Murut bible

1 TUNUNG RU BANSA' ISRAIL 23

¹Paat ra Raja' Daut matutuo noyo kaga', linantik no anak nano, i Salomo, nasauk ra raja' ru Israil.

²Tinimung ru Raja' Daut ngaangai' tingganai ru Israil, imam am ulun ru Liwi,

³am nanguntob ra ngaangai' ungkuyon ru bansa' ru Liwi ondo' umur no talu ngoopor ngambilor am nasailan. Suang nilo 38,000 ngaulun.

⁴Kopongo raginio 24,000 ngaulun risilo pinangandoi ru Raja' Daut koson manalingapu ra kandoi giu' ra Baloi ru TUHAN, 6,000 ngaulun koson manalingapu ra kandoi ru upis pamarintaan am mangakim ra pansangaran,

⁵4,000 ngaulun koson ra ulun magalung, am 4,000 ngaulun koson mongompor ra TUHAN am kuliamos ru miujik ondo' tinampos ru raja'.

⁶Tinayar ru Raja' Daut ulun ru Liwi ra talu pulalai sumugut ra bansa' nilo: Girson, Kigat am Mirari.

⁷I Girson mokoondo' ruo anak ungkuyon, iono i Ladan am i Simii.

⁸I Ladan mokoondo' talu anak ungkuyon: Jiwil, Jitam am Joil.

⁹Ilo tingganai ru bansa' ru papag ri Ladan. (I Simii mokoondo' talu anak ungkuyon: Silomit, Gajiil am Aran.)[38]

¹⁰Apat ngaulun anak ungkuyon ri Simii sumugut ra umur nilo iono i Jagat, Jina, Jius am i Biria. Papag ri Jius am i Biria kalo masuang, ilo pana kinara' ra rondo' bansa'.

¹²I Kigat mokoondo' apat ngaulun anak ungkuyon: Amram, Jijgar, Gibron am Ujiil.

¹³Anak katuaan ri Kigat, iono i Amram, iono ama' ri Arun am i Musa. (Koson ra sabubuoi no, i Arun am papag nano linili' koson manalingapu ra kuliamos ru sambayang, monolob ra kaminyan ra TUHAN, mangandoi ayuk Riso, am mambarakat ra mamagun ralalom inggalan ru TUHAN.

¹⁴Anak-anak ungkuyon ri Musa, ulipon ri Aki Kapuuno' no, nakasimpung ra ralalom ru bansa' ru Liwi.)

¹⁵I Musa mokoondo' ruo ngaulun anak ungkuyon, i Girsom am i Iliijir.

¹⁶Ulun ondo' nasauk ra tingganai ru anak-anak ri Girsom iono i Sibuil.

¹⁷I Iliijir mokoondo' rondo' ayuk anak ungkuyon, iono i Rigabia, kaa' i Rigabia mokoondo' ra masuang kaga' anak.

¹⁸I Jijgar, anak ungkuyon ri Kigat ra karuo, mokoondo' sangulun anak ungkuyon ininggalanan ri Silomit, ondo' nasauk ra tingganai ru bansa'.

¹⁹I Gibron, anak ungkuyon ri Kigat ra katalu, mokoondo' apat ngaulun anak ungkuyon: Jiria, Amarya, Jagajiil am Jikamiam.

²⁰I Ujiil, anak ungkuyon ri Kigat ra kaapat, mokoondo' ruo anak ungkuyon, i Mika am i Jisia.

²¹I Mirari mokoondo' ruo anak ungkuyon, i Magli am i Musi. I Magli niayuk mokoondo' ruo anak ungkuyon, i Iliajar am Kis,

²²kaa' i Iliajar minatoi ra kolondo' anak ungkuyon; mokoondo' io ayuk ra anak-anak ruandu'. Anak-anak ruandu' nano nangindalaki ra pantukir nilo, iono anak-anak ungkuyon ri Kis.

²³I Musi, anak ungkuyon ri Mirari ra karuo, mokoondo' talu anak ungkuyon: Magli, Idir am Jirimot.

²⁴Ginilo noyo inggalan ru papag ri Liwi ondo' tinulisan sumugut ra inggalan ru tingganai ru bansa' am sasambaloi ru sigagama'. Umur nilo ruo ngoopor ngambilor am nasailan am nokoowot ra kandoi giu' ra Baloi ru TUHAN.

²⁵Kon ru Raja' Daut, “TUHAN i Aki Kapuuno' ru Israil, nangani' ra kaansayan ra ulun Nano, am Io galama' minayan giu' ra Jirusalim koson ra sabubuoi no.

²⁶Ginio ra kalo boo pana saanin ru ulun ru Liwi Kim ru TUHAN am ngaangai' kuliamos ondo' pinakai koson ra sambayang.”

²⁷Sumugut ra susuban pupus intor ra Raja' Daut, ngaangai' ulun ru Liwi musiti' tulisin inggalan koson mangandoi paat umur no ruo ngoopor ngambilor.

²⁸Musiti' ilo mangindangan ra imam-imam papag ri Arun ralalom kandoi upacara sambayang giu' ra Baloi ru TUHAN, magalung ra liliut am lamin giu' ra Baloi ru TUHAN, am niayuk magalung ra ngaangai' ondo' pinatimpok noyo ra TUHAN maa' raginio kalo masauk ra majamol.

²⁹Ilo niayuk musiti' mambaal ra baal ragitilo: ruti' ondo' pataakon ri Aki Kapuuno', tapung moonsoi kaga' ondo' pakayon koson ra taak, kuui malilis ondo' binaal kalo linatakan ra ragi, taak ondo' solobon, am tapung ondo' linatakan ra umau jaitun. Ilo niayuk musiti' manimbang am manuku' ra taak ondo' ibiton ra Baloi ru TUHAN.

³⁰Suai raginio musiti' ilo marimbai koson mongompor ra TUHAN ra moonong susuab am mamai',

³¹am moonong ra taak simbalui solobon koson ra TUHAN paat ra orou Sabat, paat ra pangiantakan ra Sila' Bagu, am paat ra pangiantakan-pangiantakan ra bokon. Suang ru ulun ru Liwi ondo' musiti' mangandoi ra moonong igondo', niayuk mokoondo' ra aturan no. Ulun ru Liwi musiti' mampaugar ra kandoi no ra sabubuoi no.

³²Pinangandoi ilo niayuk koson magalung ra Kim ru TUHAN am Baloi ru TUHAN, am niayuk mangindangan ra pabukat-pabukat nilo, iono imam-imam papag ri Arun, ralalom ru panalingapuan ra sambayang giu' ra intok no.