Read Timugon Murut 1 TUNUNG RU BANSA' ISRAIL 29 Bible Online

1 TUNUNG RU BANSA' ISRAIL 29 - Timugon Murut bible

1 TUNUNG RU BANSA' ISRAIL 29

¹Indagu Raja' Daut ra ngaangai' ulun ondo' natimung ra giu' no, “Anak kuno, i Salomo pinili' timpoko' ri Aki Kapuuno'. Kaa' io lakat poyo mamulok am kolondo' natandaan, alika kandoi ti maayo kaga'. Ra am poyo ondo' baalon sala' ka istana ru ulun, kaa' baloi ru TUHAN i Aki Kapuuno'.

²Kuliamos-kuliamos koson ra baloi no am parabot nano tinampos ku noyo ra ngaangai' ru nasaanan kuno. Inula' ku noyo mas, pirok, gangsa', basi', tataun, batu-batu mologo, am batu-batu ru intan, batu nansalinut batik koson ra pamunga', am batu marmar ondo' masuang kaga'.

³Suai raginio, pinataak ku noyo pirok am mas intor ra rapu' longgom kuno galama' sabap ra togom kuno ra baloi ri Aki Kapuuno' kuno.

⁴Nangani' aku nasailan 100 ngatan mas ondo' moonsoi kaga' am mamaar 240 ngatan pirok kopoyo, koson palapison ra rinding ru Baloi ru TUHAN, am koson ra kuliamos ondo' musiti' baalon ru ulun manukang. Ginio ra raino osoi poyo masaga' mangani' ra taak ra TUHAN ra guang maansayan?”

⁶Kopongo raginio tingganai-tingganai ru bansa', tingganai ru bansa' boborok, panglima, am ulun manalingapu ra longgom ru raja' nambala' ra kasagaan nilo koson mangani' ra paindanganon.

⁷Nangani' ilo ragitio koson ra pambaalan ra Baloi ru TUHAN: nasailan 170 ngatan mas, nasailan 340 ngatan pirok, mamaar 620 ngatan tambaga' am nasailan 3, 400 ngatan basi'.

⁸Ulun ondo' mokoondo' ra batu intan, pinataak no ginio ri Jiwil koson pasubolon ra intok ru kuliamos ra ralalom Baloi ru TUHAN. (I Jiwil sangulun Liwi intor ra bansa' ru Girson).

⁹Mamagun nangani' ra pinaindangan ra TUHAN ra kabanisan am kasagaan ru guang. Naansukan ilo sabap ra masuang taak pinaindangan am Raja' Daut pana naansukan.

¹⁰Giu' ra saang ru ngaangai' ulun ondo' natimung ra giu' no, nongompor Raja' Daut ra TUHAN. Nakiasi' io, “Iou TUHAN i Aki Kapuuno' ri Jakub, kinamatuaan mai, koompor Kono ra sabubuoi no!

¹¹Okou maayo kaga' am makakuasa'. Matulai Kou, masawat kaga' am maayo kaga'! Ngaangai' giu' ra limbowon am ra tana' ti longgom Muno. Okou no raja' ra maayo kaga', panguasa' ra ngaangai' no.

¹²Ngaangai' rapu' am kalangkayaan intor noyo Rirun; ngaangai' no Okou nanguasa' ra kaikangan am kuasa' Muno; Okou makakuasa' mambaal ra osoi ayuk masauk ra ulun maayo am maikang.

¹³Raino, iou Aki Kapuuno' mai, maringkuanang akai Rirun am mongompor akai ra inggalan Muno ondo' maayo.

¹⁴Aku am mamagun kuno sotopot no kalo makapangani' ra atan pana Rirun, sabap ra ngaangai' tinaakan Muno am atan ondo' taakin maiti longgom Muno niayuk.

¹⁵Okou nakapandai, iou TUHAN, ra koson ra kinamatuaan maili, akai pana naayag koson ra ulun minatong am ulun bansa' ru bokon. Kaayagan mai koson ra babara' ondo' mansail, am kalo makalabus akai intor ra kapatayan.

¹⁶Iou TUHAN, i Aki Kapuuno' mai, ngaangai' kuliamos mologo ti timungon mai ragiti koson mambaal ra rondo' baloi Rirun maa' raginio makapangurumat akai ra inggalan Muno ondo' matulai. Kaa' ngaangai' ti inapu mai intor Rirun galama' am longgom Mu niayuk.

¹⁷Nakapandai aku ra mangkinam Kou ra guang ru moonong ulun am Okou galama' masaga' ra ulun ondo' mapasau guang nano. Mabaya' ra kabanisan am kasagaan ru guang, pataakon ku ngaangai' ti Rirun. Nakainono' aku noyo ra ulun Muno ondo' natimung ragiti nagibit ra taak nilo Rirun ra guang maansukan.

¹⁸Iou TUHAN i Aki Kapuuno', ondo' sambaan ri Abragam, i Isak am i Jakub, kinamatuaan maili, gama' ru alungin Mu ulun Muno maa' raginio rumayus motogom Rirun koson ra raino ti, am indangano' ilo maa' raginio gumagaya' ilo Rirun ra sabubuoi no.

¹⁹Anii' noyo anak kutu, i Salomo, gogoton ondo' totopot koson gumagaya' ra ngaangai' susuban Muno am koson mambaal ra baloi sambayangan ondo' ula' no tinampos ku noyo.”

²⁰Kopongo pakiasian raginio, indagu Raja' Daut ra ulun masuang ondo' natimung ra giu' no, “Omporo' noyo TUHAN i Aki Kapuuno' min!” Ngaangai' ulun pana nongompor-ngompor boo ra TUHAN, i Aki Kapuuno' ondo' sambaan ru kinamatuaan nilai. Kopongo raginio igulatur ilo koson mangurumat ra TUHAN am raja'.

²¹Suabon no, nanimbalui ilo ra bibiag-bibiag koson pataakon koson ra taak simbalui ra TUHAN. Taak-taak simbalui no pana pinosonong boo ra ngaangai' mamagun. Suai raginio mokoondo' 1,000 ngainan sapi' gawayan, 1,000 ngainan domba gawayan am 1,000 ngainan domba mamulok ondo' pinataak koson ra taak simbalui koson mapabansuk ra guang ru TUHAN,[40] giu' ra rasawat ru altar. Nampataak ilo niayuk ra wain ondo' musiti' pataakon koson ra taak-taak simbalui no.

²²Paat ra orou raginio nangakan am nanginum ilo ra naansukan giu' ra saang ru TUHAN. Kopongo raginio koson ra kainduo nilo nampatanou ra i Salomo koson ra raja'. Ralalom inggalan ru TUHAN, nampalantik ilo ri Salomo nasauk ra raja', am i Jadok nasauk ra imam.

²³Koson namalit ra Raja' Daut ama' nano, nanturung i Salomo ra panturungan ru raja' ondo' inaru' noyo ru TUHAN. Raja' Salomo iono raja' ondo' nakasugut am ginagaya' ru ngaangai' ulun ru Israil.

²⁴Ngaangai' pagawai ru pamarintaan am saujor, am poyo ngaangai' anak ungkuyon ru Raja' Daut ra bokon nangiou ra kuasa' ri Salomo koson ra raja'.

²⁵TUHAN nambaal ra ngaangai' bansa' no naansayan kaga' ra Raja' Salomo, am TUHAN nampasauk riso ra raja' ondo' nauligan kaga' intor ra raja'-raja' ra bokon ondo' nakaili' namarinta ra Israil.

²⁶Raja' Daut anak i Isai namarinta ra titikop ru Israil

²⁷buoi 40 ngambilor. Io namarinta giu' ra Gibron buoi tulu' ngambilor am giu' ra Jirusalim buoi 33 ngambilor.

²⁸Io no langkaya' am inurumat kaga', am minatoi ra matutuo noyo kaga'. I Salomo, anak nano nasauk ra raja' minalit riso.

²⁹Tunung ru kaayagan ru Raja' Daut intor ra talimpuun saboi ra pupus tinulisan giu' ra ralalom kitab ru talu ngaulun nabi: Nabi Samuil, Nabi Natan am Nabi Gad.

³⁰Kitab raginio nantunung ra ugar ru pamarintaan nano, kuasa' nano am ngaangai' ondo' nasauk riso, ra Israil, am ra pamarintaan-pamarintaan giu' ra liliut ru Israil.