Read Timugon Murut 2 TUNUNG RU BANSA' ISRAIL 1 Bible Online

2 TUNUNG RU BANSA' ISRAIL 1 - Timugon Murut bible

2 TUNUNG RU BANSA' ISRAIL 1

¹Raja' Salomo, anak ungkuyon ru Raja' Daut nangikang ra pamarintaan nano ra Israil, am TUHAN, i Aki Kapuuno' nano nambarakat riso, am niayuk nampasauk riso ra totopot makakuasa'.

²Nanusub Raja' Salomo ra ngaangai' pagawai ondo' naningganai ra pulalai ondo' mokoondo' saribu ngaulun am maatus ngaulun, am ngaangai' pagawai ru pamarintaan, ngaangai' tingganai ru sasambaloi am niayuk ngaangai' ru mamagun

³maa' raginio maya' riso mongoi ra intok sambayangan giu' ra Gibion. Minongoi ilo ra giu' sabap ra Kim ru TUHAN soroi ra giu'. Kim ru TUHAN no binaal ri Musa, ulipon ru TUHAN, giu' ra tana' kaagisan. (

⁴Kaa' Kaban Nabantuan inibit noyo ra Jirusalim, am binulian giu' ra ralalom ru kim ondo' binaal ru Raja' Daut paat ra io napabanding ra Kaban no intor ra Kiryat-Jiarim.)

⁵Altar gangsa' ondo' binaal ru Bijalil anak ri Uri, akupu ri Gur, niayuk mokoondo' giu' ra Gibion, giu' ra saang ru kim ru TUHAN. Raja' Salomo am ngaangai' ru mamagun siminamba ra TUHAN ra giu' no.

⁶Giu' ra saang ru Kim no sumamba raja' ra TUHAN am mampataak ra taak simbalui giu' ra rasawat ru altar gangsa'. Nampataak io ra saribu ngainan bibiag giu' ra rasawat ru altar no, koson ra taak simbalui koson mapabansuk ra guang ru TUHAN.[1]

⁷Paat rondom raginio minintalang i Aki Kapuuno' ra Raja' Salomo am pangkuot riso, “Atan kia ondo' gogoton muno taakin Ku rirun?”

⁸Taam Raja' Salomo, “Nampakito Kou ra togom ondo' maayo ri Daut, ama' kuno. Raino nangiou Kou raki' minalit riso koson ra raja'.

⁹Iou TUHAN i Aki Kapuuno', suguto' noyo bantu' ondo' binaal Muno ra ama' kuno. Linantik Mu aku nasauk ra raja' ru rondo' bansa' ondo' maayo kaga' saboi kalo maalap ra untob.

¹⁰Ginio ra anii' aku ra kapintaran am kapandayan ondo' musiti' aku mokoondo' koson mamarinta risilo. Amon ru kalo, kalo masaga' aku mamarinta ra ulun Muno ra masuang ti.”

¹¹Indagu i Aki Kapuuno' ri Salomo, “Matanda' pinili' muno. Kalo nakitaak kou ra kalangkayaan, kapoam rapu', kapoam mauligan kaga', kapoam patayan ru pantula' muno, kapoam painawo maawar muno galama'; kaa' nakitaak kou ra kapintaran am kapandayan maa' raginio makapamarinta kou ra ulun Kuno, am okou sinauk Ku ra raja' nilo.

¹²Mangani' Aku rirun ra kapintaran am kapandayan. Suai raginio, mangani' Aku niayuk rirun ra kalangkayaan am rapu' ondo' masuang poyo kaga', am niayuk mampasauk rirun ra mauligan kaga' intor ra raja' ra bokon ondo' paat ra galing i am poyo paat ra orou tauli no.”

¹³Raja' Salomo pana nangiruan[2] boo ra intok sambayangan giu' ra Gibion, iono intok ru Kim ru TUHAN, am uli' io ra Jirusalim. Giu' no namarinta io ra Israil.

¹⁴Inukapan ru Raja' Salomo pulalai ru saujor nano ra 1,400 kurita' kuda, am 12,000 ngainan kuda koson ra pulalai mangkuda. Santayaran ra pulalai no pinosoroi giu' ra Jirusalim, am ondo' bokon no pinosoroi giu' ra mansalinut bandar ra bokon.

¹⁵Paat ra pamarintaan ru Raja' Salomo, pirok am mas nasauk ra kuliamos ru kaindalaman koson ra batu giu' ra Jirusalim, am tataun sidar pana masuang koson ra tataun ara giu' ra lonson toojo ru bulur giu' ra Jiuda.

¹⁶Ulun-ulun mantatalan ondo' nangandoi koson ra raja', nambali ra kuda intor ra Musri[3] am Kilikia,[4]

¹⁷am nambali ra kurita' kuda intor ra Misir. Kopongo raginio kuda am kurita' kuda no tinalan ra raja'-raja' ru Git am raja'-raja' ru Siria ra logo 150 ngampila' ruit pirok ra sanginan kuda, am 600 ngampila' ruit pirok ra rondo' kurita' kuda.