Read Timugon Murut 2 TUNUNG RU BANSA' ISRAIL 11 Bible Online

2 TUNUNG RU BANSA' ISRAIL 11 - Timugon Murut bible

2 TUNUNG RU BANSA' ISRAIL 11

¹Pakasaboi Raja' Rigabiam ra Jirusalim, tinimung no 180,000 ngaulun saujor ondo' moonsoi kaga' intor ra bansa' ru Binjamin am Jiuda. Masaga' Raja' Rigabiam mangayou koson mapatapuli' ra kuasa' nano ra bansa'-bansa' ru Israil ondo' giu' ra ralayo.

²Kaa' nanusub TUHAN ra Nabi Simaya

³mampasaboi ra ragu Nano ra Raja' Rigabiam am ngaangai' ulun ru bansa' ru Jiuda am Binjamin,

⁴“Pai' bulunsaro' gino ngai' ulun ru Israil. Uli' kano ngaangai'! Atan ondo' nasauk no iono kasagaan Kuno.” Ilo ngaangai' gumagaya' ra susuban ru TUHAN am kalo minongoi pangayou ri Jirobiam.

⁵Minayan Raja' Rigabiam giu' ra Jirusalim am nambaal ra kubu ra bandar-bandar ragitio giu' ra Jiuda am Binjamin:

⁶Bitligim, Itam, Tikoa,

⁷Bit-Jur, Sokgo, Adulam,

⁸Gat, Maris, Jiip,

⁹Adoraim, Lakgis, Ajika,

¹⁰Jora, Ayalon am Gibron.

¹¹Nambaal io ra kubu-kubu ondo' mapiot am nampalantik ra sangulun panglima ra moonong ru bandar no. Inukapan no moonong bandar no ra ula' ru akanon, umau jaitun am wain,

¹²am niayuk perisai am tutura'. Koon raginio noyo io nanguasa' ra wilayah ru Jiuda am Binjamin.

¹³Intor ra titikop intok ra pagun ru Israil, imam-imam am ulun-ulun ru Liwi minongoi ra rabugus, giu' ra pagun ru Jiuda.

¹⁴Ulun ru Liwi nangiruan ra padang sakot nilo am tana' ra bokon, am minanding ilo ra Jiuda am Jirusalim, sabap ra Raja' Jirobiam ondo' namarinta ra Israil am raja'-raja' ondo' minalit riso kalo nangiou risilo mangandoi koson ra imam ru TUHAN.

¹⁵Nampalantik Raja' Jirobiam ra imam-imam nano galama' koson mangandoi giu' ra altar-altar sambaan ra sinungkalalaing am ambiluo malaat, am niayuk sinungkalalaing ru anak sapi' gawayan ondo' binaal nano.

¹⁶Intor ra ngaangai' bansa' ru Israil, ulun ondo' totopot masaga' sumamba ra TUHAN, i Aki Kapuuno' ru Israil, minaya' ra ulun ru Liwi minongoi ra Jirusalim, maa' raginio makapampataak ilo ra taak simbalui ra TUHAN, i Aki Kapuuno' ru kinamatuaan nilai.

¹⁷Koon raginio noyo pamarintaan ru Jiuda pinaikang. Buoi talu ngambilor ilo nanungka' ra Raja' Rigabiam anak ru Raja' Salomo. Kaayagan nilo koson ra galing i, ragana' ru pamarintaan ru Raja' Daut am Raja' Salomo.

¹⁸Raja' Rigabiam nagandu' ri Magalat. Ama' ri Magalat iono i Jirimot, anak ru Raja' Daut. Ina' ri Magalat iono i Abiail anak ri Iliab am akupu ri Isai.

¹⁹Raja' Rigabiam am i Magalat mokoondo' talu anak ungkuyon: I Jius, Simarya am Jagam.

²⁰Raja' Rigabiam pana nagandu' boo ri Maakga anak ri Absalom, am mokoondo' apat anak ungkuyon: I Abia, Atai, Jija am Silomit.

²¹Raja' Rigabiam mokoondo' 18 ngaulun andu' am 60 ngoopor ngaulun ruandu' parulug. Mokoondo' io 28 ngaulun anak ungkuyon am 60 ngaulun anak ruandu'. Intor ra ngaangai' andu' am ruandu' parulug nano, i Maakga ondo' tagamin no kaga'.

²²Intor ra ngaangai' anak ungkuyon am ruandu' nano, i Abia anak ungkuyon ri Maakga ondo' tagamin nano kaga'. Pinili' ru Raja' Rigabiam i Abia koson malit riso koson ra raja' ra tauli no.

²³Mabaya' ra kapintaran Raja' Rigabiam nangani' ra kandoi ra anak-anak ungkuyon nano am nampaayan risilo giu' ra titikop ru Jiuda am Binjamin, giu' ra bandar-bandar ondo' mokoondo' ra kubu. Inanian no ilo ra akanon ondo' malabaan, am niayuk nanambili' ra masuang andu' risilo.